臺灣台語・第 2 階　第 11 課　生理構造（11／11）

面肉消瘦

臉部消瘦了

bīn-bah siau-sán

透早洗手面的時，愛會記得提面巾共牢佇目墘的目屎膏拭拭咧。

早晨盥洗的時候，要記得拿毛巾將黏在眼眶的眼屎擦一擦。

Thàu-tsá sé tshiú-bīn ê sî, ài ē-kì-tit the̍h bīn-kin kā tiâu tī ba̍k-kînn ê ba̍k-sái-ko tshit-tshit--leh.

囡仔豚當咧轉成，莫怪一頓食幾若碗飯。

青少年正在發育，難怪一餐吃好幾碗飯。

Gín-á-thûn tng-teh tńg-tsiânn, bo̍k-kuài tsi̍t tǹg tsia̍h kuí-nā uánn pn̄g.

囡仔豚轉成變大人矣。

青少年發育成長轉變為成人了。

Gín-á-thûn tńg-tsiânn piàn tuā-lâng--ah.

一般來講，查埔囡仔轉大人的時會變聲，是因為頷珠開始發育矣。

一般來說，男孩子在青春期會變聲，是因為喉結開始發育了。

It-puann lâi kóng, tsa-poo gín-á tńg-tuā-lâng ê sî ē piàn-siann, sī in-uī ām-tsu khai-sí huat-io̍k--ah.

關節炎若夯起來，骨目就會痠軟疼。

關節炎如果發作，骨節就會又痠又痛。

Kuan-tsat-iām nā giâ--khí-lâi, kut-ba̍k tō ē sng-nńg-thiànn.

尿酸若躘懸，就較會著疼風，傷重的連骨節都變形去。

尿酸若飆高，很容易得到痛風，嚴重的話連關節都會變形。

Jiō-sng nā liòng kuân, tō khah ē tio̍h thiànn-hong, siong-tiōng--ê liân kut-tsat to piàn-hîng--khì.

俗語講：「七坐八爬九發牙」，毋過這馬的囡仔六個月就咧發奶齒矣。

俗語說：「七坐八爬九發牙」，不過現在的小孩子六個月就長乳牙了。

Sio̍k-gí kóng, “tshit tsē peh pê káu huat-gê”, m̄-koh tsit-má ê gín-á la̍k kò gue̍h tō teh huat ling-khí--ah.

講著以早的可憐代，嚨喉管就滇。

講到可憐的過去，就哽咽。

Kóng-tio̍h í-tsá ê khó-liân-tāi, nâ-âu-kńg tō tīnn.

你愛會記得吩咐剃頭師傅，毛繐莫閣鉸甲遐短矣。

你要記得叮囑理髮師，瀏海別再剪得那麼短了。

Lí ài ē-kì-tit huan-hù thì-thâu sai-hū, mn̂g-sui mài koh ka kah hiah té--ah.

我這馬歲頭都食甲七、八十矣，鬢跤的毛繐攏齊白矣。

我都活到七老八十了，鬢毛都已斑白。

Guá tsit-má huè-thâu to tsia̍h kah tshit, peh-tsa̍p--ah, pìn-kha ê mn̂g-sui lóng tsiâu pe̍h--ah.

這聲銃子去彈著肚臍空，穩死的！

這下子子彈正中肚臍眼，必死無疑！

Tsit-siann tshìng-tsí khì tuānn-tio̍h tōo-tsâi-khang, ún sí--ê!

咱人的心臟佮紅筋連做伙，成做血路循環的系統，若出問題，健康就會有影響。

我們人的心臟與血管連結，形成血液循環系統，若出問題就會影響健康。

Lán-lâng ê sim-tsōng kah âng-kin liân tsò-hué, tsiânn-tsò hueh-lōo sûn-khuân ê hē-thóng, nā tshut būn-tê, kiān-khong tō ē ū íng-hióng.

這馬有的人嫌家己的鼻刀傷凹，想欲去手術。

現在有些人嫌自己鼻梁不夠高，想去動手術。

Tsit-má ū ê lâng hiâm ka-kī ê phīnn-to siunn nah, siūnn-beh khì tshiú-su̍t.

伊都感覺家己𢯾鼻𢯾鼻，較無遐嫣，按算歇熱欲去美容。

他覺得自己鼻子塌塌的，沒那麼好看，打算暑假去整形。

I to kám-kak ka-kī mooh-phīnn-mooh-phīnn, khah bô hiah ian, àn-sǹg hioh-jua̍h beh khì bí-iông.

布袋戲的小丑仔定會揀𢯾鼻的，予𪜶講著話就齆聲齆聲真笑詼。

布袋戲的丑角常會選塌鼻子的人，讓他們一開口說話就帶著鼻音很有趣。

Pòo-tē-hì ê siáu-thiú-á tiānn ē kíng mooh-phīnn--ê, hōo in kóng-tio̍h uē tō àng-siann-àng-siann tsin tshiò-khue.

阿仁佇工地縛鐵仔，較加手肚仁嘛結結結。

阿仁在工地綁鋼筋，難怪上臂內側肌肉很結實。

A-jîn tī kang-tē pa̍k thih-á, khah-ke tshiú-tóo-jîn mā kiat-kiat-kiat.

伊定定咧運動，所以筋肉加真結實，人誠粗勇。

他常運動，所以肌肉非常結實，人很健壯。

I tiānn-tiānn teh ūn-tōng, sóo-í kin-bah ke tsin kiat-si̍t, lâng tsiânn tshoo-ióng.

人較有歲了後，皮膚會變較薄，跤腿的青筋攏看現現。

人上了年紀後，皮膚會變得較薄，腿上的青筋清楚可見。

Lâng khah ū-huè liáu-āu, phuê-hu ē piàn khah po̍h, kha-thuí ê tshenn-kin lóng khuànn-hiān-hiān.

常在運動的人跤肚仁會較結實。

時常運動的人小腿肌會比較結實。

Tshiâng-tsāi ūn-tōng ê lâng kha-tóo-jîn ē khah kiat-si̍t.

你就是種著恁阿母的油耳，不時都生一寡澹澹溼溼的耳屎來共你凌治。

你就是遺傳到你媽媽的溼耳朵，時常滋生溼黏的耳屎讓你困擾不已。

Lí tō sī tsíng-tio̍h lín a-bú ê iû-hīnn, put-sî to senn tsi̍t-kuá tâm-tâm-sip-sip ê hīnn-sái lâi kā lí lîng-tī.

大多數的人攏是粗糠耳。

大多數的人都是乾耳朵。

Tuā-to-sòo ê lâng lóng sī tshoo-khng-hīnn.

聽講伊是佇火車頂生的，因由是𪜶母仔坐火車的時水帕雄雄破去，拄好有旅客是醫生，緊猛走來鬥相共，佳哉母仔囝攏平安無代誌。

聽說他是在火車上出生的，因為他媽媽搭火車的時候羊水突然破了，恰好有旅客是醫師，趕緊跑來幫忙，幸好母子都平安無事。

Thiann-kóng i sī tī hué-tshia-tíng senn--ê, in-iû sī in bú--á tsē hué-tshia ê sî tsuí-phè hiông-hiông phuà--khì, tú-hó ū lí-kheh sī i-sing, kín-mé tsáu-lâi tàu-sann-kāng, ka-tsài bú-á-kiánn lóng pîng-an bô tāi-tsì.

醫生當咧共患者開刀，欲共窒佇伊頭殼內的血凍提出來。

醫生正在替患者動手術，要清除他腦中的血塊。

I-sing tng-teh kā huān-tsiá khui-to, beh kā that tī i thâu-khak-lāi ê hueh-tàng the̍h--tshut-lâi.

小弟的面馬生做真四正，看著真古錐。

弟弟臉形長得很方正，看起來很可愛。

Sió-tī ê bīn-bé senn-tsò tsin sì-tsiànn, khuànn tio̍h tsin kóo-tsui.

流感的病毒會綴瀾鬚穢人，毋才講感著的人愛掛喙罨。

流感的病毒會隨著飛沫傳染給別人，才會建議染病的人要戴口罩。

Liû-kám ê pēnn-to̍k ē tuè nuā-tshiu uè--lâng, m̄-tsiah kóng kám--tio̍h ê lâng ài kuà tshuì-am.

伊的肌膚驚曝日，一下曝就烏趖趖。

他的皮膚很怕曬太陽，一曬就非常地黑。

I ê ki-hu kiann pha̍k-ji̍t, tsi̍t-ē pha̍k tō oo-sô-sô.

伊本底瘦枝落葉，經過調養，這馬已經較有肌膚矣。

他本來衰弱消瘦，經過調理，現在已經健壯起來了。

I pún-té sán-ki-lo̍h-hio̍h, king-kuè tiâu-ióng, tsit-má í-king khah ū ki-hu--ah.

伊頂半身穿白衫，下半身配烏裙，看著誠大範。

他上半身穿白襯衫，下半身搭黑裙，看起來很大方。

I tíng-puànn-sin tshīng pe̍h sann, ē-puànn-sin phuè oo kûn, khuànn tio̍h tsiânn tuā-pān.

頭殼若咧楞的時，共手門的穴道揤揤、掠掠咧，會當減輕無爽快的症頭。

頭暈的時候，把手掌虎口的穴道按一按、抓一抓，可以減輕不舒適的症狀。

Thâu-khak nā teh gông ê sî, kā tshiú-mn̂g ê hia̍t-tō tshi̍h-tshi̍h, lia̍h-lia̍h--leh, ē-tàng kiám-khin bô sóng-khuài ê tsìng-thâu.

拳頭師手門重，無細膩煞共這箍賊仔拍一下半小死。

拳師手勁大，不小心竟然把這個小偷打個半死。

Kûn-thâu-sai tshiú-mn̂g tāng, bô-sè-jī suah kā tsit khoo tsha̍t-á phah tsi̍t-ē puànn-sió-sí.

夯石碾會當練手骨的筋肉佮手門的力頭。

舉重可以鍛練手臂的肌肉和虎口的力道。

Giâ-tsio̍h-lián ē-tàng liān tshiú-kut ê kin-bah kah tshiú-mn̂g ê la̍t-thâu.

人到中年目睭的玻璃清有可能會退化，目睭前會有烏影。若有這種症頭，愛去揣醫生檢查。

人到中年眼睛的玻璃體可能會退化，眼前會有黑影。要是有這種症狀，得去找醫生檢查。

Lâng kàu tiong-liân ba̍k-tsiu ê po-lê-tshing ū khó-lîng ē thè-huà, ba̍k-tsiu-tsîng ē ū oo-iánn. Nā ū tsit tsióng tsìng-thâu, ài khì tshuē i-sing kiám-tsa.

阿芬的枝骨瘦閣躼，誠適合穿旗袍呢！

阿芬的骨架瘦又高，很適合穿旗袍呢！

A-hun ê ki-kut sán koh lò, tsiânn sik-ha̍p tshīng kî-phâu--neh!

你莫看這枝雨傘舊舊，枝骨猶真勇咧。

你不要看這把雨傘舊舊的，骨架還很堅固呢。

Lí mài khuànn tsit ki hōo-suànn kū-kū, ki-kut iáu tsin ióng--leh.

伊這站仔定定加班，電腦用傷久，手節毋但搐搐疼閣略仔腫腫。

他這陣子常常加班，電腦使用過久，手腕不只抽痛還稍微腫起來。

I tsit-tsām-á tiānn-tiānn ka-pan, tiān-náu iōng siunn kú, tshiú-tsat m̄-nā tiuh-tiuh thiànn koh lio̍h-á tsíng-tsíng.

第 2 階 第 11 課 生理構造（11／11）

教材來源

第 2 階　第 11 課　生理構造（11／11）