臺灣台語・第 10 階　第 18 課　個性風格（11／12）

伊性地較貓毛，閣誠𠢕拖沙，代誌定定去予延著，真正袂呵咾得。

他個性比較不乾脆，而且很會拖拖拉拉，事情常常都被延宕很久，實在令人不敢恭維。

I sìng-tē khah niau-mn̂g, koh tsiânn gâu thua-sua, tāi-tsì tiānn-tiānn khì hōo tshiân--tio̍h, tsin-tsiànn bē-o-ló--tit.

伊做代誌實在傷過貓神，一點點仔缺點都袂使有。

他做事情實在太過挑剔了，一點點缺點也不能發生。

I tsò tāi-tsì si̍t-tsāi siunn kuè niau-sîn, tsi̍t-tiám-tiám-á khuat-tiám to bē-sái ū.

這个查埔人講話、動作有淡薄仔貓神。

這個男人說話、動作有些女性化。

Tsit ê tsa-poo-lâng kóng-uē, tōng-tsok ū tām-po̍h-á niau-sîn.

彼个囡仔磕袂著就挐頭使性地，實在足毋是款！

那個孩子動不動就胡鬧耍脾氣，實在很不像樣！

Hit ê gín-á kha̍p-bē-tio̍h tō jû-thâu sái-sìng-tē, si̍t-tsāi tsiok m̄-sī-khuán!

拄著挐頭的學生，做老師的愛想辦法共引𤆬。

遇到無理取鬧的學生，當老師的要想辦法引導。

Tú-tio̍h jû-thâu ê ha̍k-sing, tsò lāu-su--ê ài siūnn pān-huat kā ín-tshuā.

伊是一个真愛烏白共人詼的詼仙，做人閣袂正經，逐家攏誠慼伊。

他是一個很喜歡隨便嘲弄他人的人，為人又不正派，大家都很討厭他。

I sī tsi̍t ê tsin ài oo-pe̍h kā lâng khue ê khue-sian, tsò-lâng koh bē tsìng-king, ta̍k-ke lóng tsiânn tsheh--i.

你做工課跤手慢鈍，是欲按怎綴人會著咧！

你做事情慢吞吞的，怎麼跟得上人家呢！

Lí tsò khang-khuè kha-tshiú bān-tūn, sī beh án-tsuánn tuè lâng ē tio̍h--leh!

伊咧做工課慢死趖，一屑仔工課愛做規晡久。

他做工作慢吞吞的，一些些工作要做大半天。

I teh tsò khang-khuè bān-sí-sô, tsi̍t-sut-á khang-khuè ài tsò kui-poo kú.

伊是𫞼諍王，會當共死龜諍甲變活鱉。

他是好辯的人，可以將死龜強辯成活鱉。

I sī tshāi-tsènn-ông, ē-tàng kā sí ku tsènn kah piàn ua̍h pih.

食人頭路著存久長心，毋通在職怨職，磕袂著就換頭路，袂輸貓徙岫咧。

受雇於人要安於工作，切勿幹一行怨一行，動不動就換工作，好像貓挪窩似的。

Tsia̍h lâng thâu-lōo tio̍h tsûn kú-tn̂g-sim, m̄-thang tsāi-tsit-uàn-tsit, kha̍p-bē-tio̍h tō uānn thâu-lōo, bē-su niau-suá-siū--leh.

頭家若受氣起來，員工就攏恬喌喌出在伊罵。

老闆如果生氣，員工就靜靜地讓他罵。

Thâu-ke nā siū-khì--khí-lâi, uân-kang tō lóng tiām-tsiuh-tsiuh tshut-tsāi i mē.

學生一下聽著上課鐘仔聲霆，隨个仔恬喌喌轉去伊的位坐予好。

學生一聽到上課鐘響，各自鴉雀無聲回到他的座位坐好。

Ha̍k-sing tsi̍t-ē thiann-tio̍h siōng-khò tsing-á-siann tân, suî-ê-á tiām-tsiuh-tsiuh tńg-khì i ê uī tsē hōo hó.

恁囝真乖，規工恬喌喌坐佇膨椅看尪仔冊，攏袂吵人。

你兒子很乖，整天安安靜靜坐在沙發上看漫畫，都不會吵到別人。

Lín kiánn tsin kuai, kui-kang tiām-tsiuh-tsiuh tsē tī phòng-í khuànn ang-á-tsheh, lóng bē tshá--lâng.

這个囡仔誠無時定，一睏仔久就隨走甲無看著人影去。

這個小孩好動到閒不下來，一下子就跑得不見蹤影。

Tsit ê gín-á tsiânn bô-sî-tiānn, tsi̍t-khùn-á-kú tō suî tsáu kah bô khuànn-tio̍h lâng-iánn--khì.

當咧大的囡仔人，較加嘛無時定，予伊耍一時仔無要緊。

孩子正在長大，難免好動，讓他玩一下沒關係。

Tng-teh tuā ê gín-á-lâng, khah-ke mā bô-sî-tiānn, hōo i sńg--tsi̍t-sî-á bô iàu-kín.

這个囡仔真孽呢，坐徛袂牢無時得定。

這個小孩很皮耶，坐也不是站也不是一刻都不得安靜。

Tsit ê gín-á tsin gia̍t--neh, tsē khiā bē tiâu bô-sî tik-tiānn.

麵擔仔衛生無好害人客食了落屎猶小局，上害的是濫會傷身體的化學添加物，害主顧客帶身命才是夭壽。

麵攤衛生不好害顧客拉肚子還算是小事一樁，最糟糕的是加進會傷身體的化學添加物，害老顧客染上慢性病才是缺德。

Mī-tànn-á uē-sing bô hó hāi lâng-kheh tsia̍h-liáu làu-sái iáu sió-kio̍k, siōng hāi--ê sī lām ē siong sin-thé ê huà-ha̍k thiam-ka-bu̍t, hāi tsú-kòo-kheh tài-sin-miā tsiah-sī iáu-siū.

做人毋通傷小局，若無，會無人緣。

為人不可以太小氣，否則，會不討人喜歡。

Tsò-lâng m̄-thang siunn sió-kio̍k, nā-bô, ē bô-lâng-iân.

𪜶兜上細漢的囡仔看著生份人攏較畏羞人，毋敢主動佮人相借問。

他們家最小的孩子看到陌生人都比較害羞，不敢主動跟別人打招呼。

In tau siōng sè-hàn ê gín-á khuànn-tio̍h senn-hūn-lâng lóng khah uì-siáu-jîn, m̄ kánn tsú-tōng kah lâng sio-tsioh-mn̄g.

伊有夠硬鼻的，別人的意見伊攏聽袂入去。

他相當固執，別人的意見他都聽不進去。

I ū-kàu ngē-phīnn--ê, pa̍t-lâng ê ì-kiàn i lóng thiann bē ji̍p--khì.

阿誠𤆬工人來厝裡成格，𪜶某怪伊攏無咧共伊尊存，就按呢使硬鼻逐項反對。

阿誠帶工人來家裡隔間裝潢，他太太怪他都不顧及他的意見，就這樣很頑固的樣樣反對。

A-sîng tshuā kang-lâng lâi tshù--lí tshiânn-kik, in bóo kuài i lóng bô teh kā i tsun-tshûn, tsiū-án-ne sái ngē-phīnn ta̍k hāng huán-tuì.

伊做代誌誠𠢕拖帆，定定佇交貨期限彼工才咧趕工。

他做事情很會拖拖拉拉，常在交貨期限當日才加快工作速度。

I tsò tāi-tsì tsiânn gâu thua-phâng, tiānn-tiānn tī kau-huè kî-hān hit kang tsiah teh kuánn-kang.

愛有本等佮實力才有法度予眾人服你，若干焦硬喙死諍，是上無路用的步數。

要有本領和實力才有辦法讓眾人服你，如果只是嘴硬爭論，是最無效的招式。

Ài ū pún-tíng kah si̍t-li̍k tsiah ū-huat-tōo hōo tsìng-lâng ho̍k--lí, nā kan-na ngē-tshuì sí-tsènn, sī siōng bô-lōo-īng ê pōo-sòo.

見擺開會若聽著別人有無仝的意見，伊就誠硬喙，攏無欲讓步，真正無伊法。

他遇到不同意見的事情卻那麼嘴硬，都不讓步，真是拿他沒辦法。

Kiàn-pái khui-huē nā thiann-tio̍h pa̍t-lâng ū bô kāng ê ì-kiàn, i tō tsiânn ngē-tshuì, lóng bô beh niū-pōo, tsin-tsiànn bô i huat.

有的代誌袂拖得，若傷過韌鼻，會做無工課。

有些事是拖延不得的，如果太不乾脆，工作會無法完成。

Ū ê tāi-tsì bē-thua--tit, nā siunn kuè jūn-phīnn, ē tsò bô khang-khuè.

阿爸是一个足慷交的人，阮兜不時都有真濟人客來相揣。

爸爸個很慷慨好客的人，我家時常都有很多客人來訪。

A-pah sī tsi̍t ê tsiok khóng-kau ê lâng, guán tau put-sî to ū tsin tsē lâng-kheh lâi sio-tshuē.

彼个囡仔誠活骨，規日無一時恬。

那個孩子非常好動，整天一刻也靜不下來。

Hit ê gín-á tsiânn ua̍h-kut, kui-ji̍t bô tsi̍t-sî tiām.

伊一下入門無分無會就共我罵，實在袂堪得氣。

他一進門不分青紅皂白就罵我，實在是氣不過。

I tsi̍t-ē ji̍p-mn̂g bô-hun-bô-huē tō kā guá mē, si̍t-tsāi bē-kham-tit khì.

伊無分無會雄雄就離開，敢是發生啥物代誌矣？

他沒知會一聲突然就離開，會不會是發生什麼事情了？

I bô-hun-bô-huē hiông-hiông tō lī-khui, kám-sī huat-sing siánn-mih tāi-tsì--ah?

伊講的彼件代誌傷過譀古，你莫聽伊佇遐咧敲虎𡳞。

他說的那件事太過荒謬，你別聽他在那裡胡說。

I kóng ê hit kiānn tāi-tsì siunn kuè hàm-kóo, lí mài thiann i tī hia teh khà-hóo-lān.

見若欲選舉，畫山畫水的候選人濟甲窒倒街，咱目睭愛擘予金，毋通予𪜶騙去。

每當要選舉，大吹法螺的候選人不勝枚舉，我們務必要睜大眼睛，不要被他們騙了。

Kiàn-nā beh suán-kí, uē-san-uē-suí ê hāu-suán-jîn tsē kah that-tó-ke, lán ba̍k-tsiu ài peh hōo kim, m̄-thang hōo in phiàn--khì.

伊這款執硬的性癖若攏毋改，緊縒慢會食著鹼。

他這種固執不知變通的個性若不改變，早晚會吃到苦頭。

I tsit khuán tsip-ngē ê sìng-phiah nā lóng m̄ kái, kín-tsua̍h-bān ē tsia̍h-tio̍h-kinn.

彼尾鰗鰡誠滑溜，若無掛手橐仔，免數想欲掠伊會著。

那條泥鰍全身滑溜溜，沒戴手套，休想抓得住牠。

Hit bué hôo-liu tsiânn ku̍t-liu, nā bô kuà tshiú-lok-á, bián siàu-siūnn beh lia̍h i ē tio̍h.

王經理做人誠滑溜，攏袂得失人，彼是佇生理場練欲三十冬才有法度按呢。

王經理為人圓滑，都不會得罪人，那是在商業界練了將近三十年才有辦法如此。

Ông king-lí tsò-lâng tsiânn ku̍t-liu, lóng bē tik-sit--lâng, he sī tī sing-lí-tiûnn liān beh sann-tsa̍p tang tsiah ū-huat-tōo án-ne.

見若上台講話，伊就驚甲勼勼圇圇。

每次上台說話，他就嚇得畏畏縮縮。

Kiàn-nā tsiūnn-tâi kóng-uē, i tō kiann kah kiu-kiu-lun-lun.

做生理若勼勼圇圇，機會就會予人先提去。

做生意如果猶豫不決，就會被別人搶得先機。

Tsò-sing-lí nā kiu-kiu-lun-lun, ki-huē tō ē hōo lâng sing the̍h--khì.

第 10 階 第 18 課 個性風格（11／12）

教材來源

第 10 階　第 18 課　個性風格（11／12）