臺灣台語・第 14 階　第 35 課　一般動詞-行為動詞（35／36）

伊是烏手起底的，毋過目識利閣𠢕變竅，誠緊就趁著大錢，現此時是工商界的頭人。

他是從機械工起家的，但是他有眼光又會變通，很快就賺大錢，現在成為工商界的領頭人物。

I sī oo-tshiú khí-té--ê, m̄-koh ba̍k-sik lāi koh gâu piàn-khiàu, tsiânn kín tō thàn-tio̍h tuā-tsînn, hiān-tshú-sî sī kang-siong-kài ê thâu-lâng.

囡仔偷走厝的原因真複雜，有真濟是因為家庭失能造成的。

小孩子離家出走的原因很複雜，有很多是因為家庭失能造成的。

Gín-á thau-tsáu-tshù ê guân-in tsin ho̍k-tsa̍p, ū tsin tsē sī in-uī ka-tîng sit-lîng tsō-sîng--ê.

阿華痟跋筊，一四界欠數，攏嘛𪜶翁咧共伊帕尾。

阿華沉迷賭博，到處欠債，都是他先生替他善後的。

A-huâ siáu pua̍h-kiáu, tsi̍t-sì-kè khiàm-siàu, lóng mā in ang teh kā i phè-bué.

免細膩，欲愛啥據在恁叫，今仔日食的、啉的攏我來帕尾。

不用客氣，要什麼儘管你們點餐，今天吃的、喝的都由我來付帳。

Bián sè-jī, beh ài siannh kì-tsāi lín kiò, kin-á-ji̍t tsia̍h--ê, lim--ê lóng guá lâi phè-bué.

伊是一个負責任的人，交代予伊的代誌攏攢辦甲足周至的。

他是一個負責任的人，交代給他的事項都準備得很周全。

I sī tsi̍t ê hū-tsik-jīm ê lâng, kau-tài hōo i ê tāi-tsì lóng tshuân-pān kah tsiok tsiu-tsì--ê.

咱對序大袂使摘名摘姓，愛共人照輩份來稱呼才有禮貌。

我們對長輩不能指名道姓，要依照輩份稱呼才有禮貌。

Lán tuì sī-tuā bē-sái tiah-miâ-tiah-sènn, ài kā lâng tsiàu puè-hūn lâi tshing-hoo tsiah ū-lé-māu.

詐騙案件的受害者真濟攏是因為貪心才會著吊。

詐騙案件的受害者很多都是因為貪心才會上當。

Tsà-phiàn àn-kiānn ê siū-hāi-tsiá tsin tsē lóng sī in-uī tham-sim tsiah ē tio̍h-tiàu.

阿文見若來咱遮標工課，你定定共掩護，閣予伊方便，緊縒慢你會著吊。

阿文每次來我們這裡標工程，你常去幫忙掩護，又便利於他，早晚你會觸犯法條。

A-bûn kiàn-nā lâi lán tsia pio khang-khuè, lí tiānn-tiānn kā iám-hōo, koh hōo i hong-piān, kín-tsua̍h-bān lí ē tio̍h-tiàu.

數佻別人的差錯較緊，改變家己的欠點較僫。

數落他人的錯誤較快，改變自己的缺失較難。

Siàu-tiáu pa̍t-lâng ê tsha-tshò khah kín, kái-piàn ka-kī ê khiàm-tiám khah oh.

伊見若開講就欲佮人辯話骨，莫怪無人欲佮伊交陪。

他但凡閒聊就要挑人語病，難怪沒人要跟他交往。

I kiàn-nā khai-káng tō beh kah lâng piān-uē-kut, bo̍k-kuài bô lâng beh kah i kau-puê.

鱸鰻萬仔早起去予職業殺手結果擲捒矣。

流氓阿萬早上被職業殺手給解決掉了。

Lôo-muâ Bān--á tsá-khí khì hōo tsit-gia̍p sat-tshiú kiat-kó-tàn-sak--ah.

伊䀐著警察對巷仔頭行來，面隨慄色，即時就起跤走甲無看見影去。

他瞥見警察從巷子口走來，嚇得立刻臉色大變，馬上就拔腿跑得不見蹤影。

I siam-tio̍h kíng-tshat tuì hāng-á-thâu kiânn--lâi, bīn suî lik-sik, tsik-sî tō khí-kha tsáu kah bô khuànn-kìnn iánn--khì.

伊佇路裡拄䢢佮伊的冤仇人相搪，無講無呾一下起跤就共蹔落去。

他在路上正巧碰上他的仇人，不聲不響舉起腳就把他踹下去。

I tī lōo--lí tú-tshiāng kah i ê uan-siû-lâng sio-tn̄g, bô-kóng-bô-tànn tsi̍t-ē khí-kha tō kā tsàm--lo̍h-khì.

你若敢閣共我恐喝，我就叫警察來。

你要是敢再恐嚇我，我就叫警察來。

Lí nā kánn koh kā guá khióng-hat, guá tō kiò kíng-tshat lâi.

都叫你毋通遐痟貪，今錢予人騙了了，攏是你家己做得來的。

早就勸你別那麼貪心，現在錢被騙光了，都是你自找的。

To kiò lí m̄-thang hiah siáu-tham, tann tsînn hōo lâng phiàn-liáu-liáu, lóng sī lí ka-kī tsò-tit-lâi--ê.

咱佇車裡共頭殼探出去真危險。

我們坐在車子裡面把頭伸出去很危險。

Lán tī tshia--lí kā thâu-khak tham--tshut-khì tsin guî-hiám.

伊手探出去欲挽牆圍仔邊的荔枝。

他伸手去搆想摘圍牆邊的荔枝。

I tshiú tham tshut-khì beh bán tshiûnn-uî-á-pinn ê nāi-tsi.

恁厝起甲按呢會去探著人的路。

你們房子蓋成這個樣子會越界侵占到行人的道路。

Lín tshù khí kah án-ne ē khì tham-tio̍h lâng ê lōo.

明其都你毋著，今你煞拍人喝救人，是咧哭予啥人聽。

明明就你不對，你現在卻惡人先告狀，是想哭給誰聽。

Bîng-ki to lí m̄-tio̍h, tann lí suah phah lâng huah-kiù-lâng, sī teh khàu hōo siánn-lâng thiann.

食甲這个歲矣，無氣力通佮人掰會遮的政治問題，寧可加讀寡冊較直。

活到這把年紀了，沒有體力能跟別人爭辯這些政治問題，寧願多讀點書還比較好。

Tsia̍h kah tsit ê huè--ah, bô khuì-la̍t thang kah lâng pué-huē tsia-ê tsìng-tī būn-tê, lîng-khó ke tha̍k kuá tsheh khah ti̍t.

就是生理失敗起致，伊這陣毋才四界咧走路閃債。

就是做生意失敗引起，他現在才到處跑路避債。

Tō sī sing-lí sit-pāi khí-tì, i tsit-tsūn m̄-tsiah sì-kè teh tsáu-lōo siám-tsè.

我無啥清楚代誌的起致。

我不太清楚事情的起因。

Guá bô siánn tshing-tshó tāi-tsì ê khí-tì.

欲起造一間電子工廠，資金掠外，猶需要真濟科技人員。

要興建一間電子工廠，除了資金以外，還需要很多科技人員。

Beh khí-tsō tsi̍t king tiān-tsú kang-tshiúnn, tsu-kim lia̍h-guā, iáu su-iàu tsin tsē kho-ki jîn-uân.

伊欲食毋討趁，攏共𪜶序大人叨錢來開。

他好逸惡勞不想工作賺錢，總是跟他的父母親要錢來花用。

I beh tsia̍h m̄ thó-thàn, lóng kā in sī-tuā-lâng lo tsînn lâi khai.

彼兩个人佇巷仔內相掩揜，毋知欲創啥物歹代。

那兩個人在巷子內互相遮掩，不知道要做什麼壞事情。

Hit nn̄g ê lâng tī hāng-á-lāi sio-ng-iap, m̄ tsai beh tshòng siánn-mih pháinn-tāi.

彼箍歹手爪，不時偷掩揜人的物件。

他手腳不乾淨，時常把人家的東西暗藏起來想據為己有。

Hit khoo pháinn-tshiú-jiáu, put-sî thau ng-iap lâng ê mi̍h-kiānn.

逐家毋通激恬恬，欲抑毋，恁嘛喝聲一下。

大家不要沉默不語，要或不要，你們要做聲表態一下。

Ta̍k-ke m̄-thang kik-tiām-tiām, beh ia̍h m̄, lín mā huah-siann--tsi̍t-ē.

工課等一下主任會來拍派，你毋通先偷走。

工作等一下主任會來分派，你別先溜了。

Khang-khuè tán--tsi̍t-ē tsú-jīm ē lâi phah-phài, lí m̄-thang sing thau-tsáu.

彼个經濟犯去予人限制出境，結局猶是去予伊偷走過手。

那個經濟犯被限制出境，結果還是被他成功潛逃。

Hit ê king-tsè-huān khì hōo lâng hān-tsè tshut-kíng, kiat-kio̍k iáu-sī khì hōo i thau-tsáu kuè-tshiú.

伊這擺的比賽拄著頂擺的金牌選手，真正是愛拚硬仔矣。

他這次比賽遇到上次的金牌選手，真的要硬碰硬了。

I tsit pái ê pí-sài tú-tio̍h tíng-pái ê kim-pâi suán-tshiú, tsin-tsiànn sī ài piànn-ngē-á--ah.

聽講今仔日的穡頭真歹做，我看愛拚硬仔矣。

聽說今天的工作不好做，我看要硬拚了。

Thiann-kóng kin-á-ji̍t ê sit-thâu tsin pháinn tsò, guá khuànn ài piànn-ngē-á--ah.

較早佇阮庄裡都歹討趁，姑不將才著走徙去海口拋魚罔趁食。

以前在我們村裡因為不容易討生活，不得已才遷徙到海口捕魚過活。

Khah-tsá tī guán tsng--lí to pháinn thó-thàn, koo-put-tsiong tsiah tio̍h tsáu-suá khì hái-kháu pha-hî bóng thàn-tsia̍h.

欲去予人請，你穿甲彼領破一空的褲，敢會見眾得？

要讓人請客，你穿那件破一個洞的褲子，像樣嗎？

Beh khì hōo lâng tshiánn, lí tshīng kah hit niá phuà tsi̍t khang ê khòo, kám ē-kìnn-tsìng--tit?

伊這个人誠狡怪，逐項代誌都欲佮人對扴。

他這個人很彆扭，每樣事情都要跟人家唱反調。

I tsit ê lâng tsiânn káu-kuài, ta̍k hāng tāi-tsì to beh kah lâng tuì-ke̍h.

這兩件代誌無牽磕，你毋通濫濫做一伙。

這兩件事情並無牽連，你不要混為一談。

Tsit nn̄g kiānn tāi-tsì bô khan-kha̍p, lí m̄-thang lām-lām tsò-tsi̍t-hué.

伊不時都揣空揣縫欲參人輸贏，你閃較遠咧較袂予伊牽闔著。

他時常想盡辦法與人爭勝，你離他遠些才不會受他牽連。

I put-sî to tshuē-khang-tshuē-phāng beh tsham lâng su-iânn, lí siám khah hn̄g--leh khah bē hōo i khan-kha̍h--tio̍h.

第 14 階 第 35 課 一般動詞-行為動詞（35／36）

教材來源

第 14 階　第 35 課　一般動詞-行為動詞（35／36）