臺灣台語・第 14 階　第 36 課　一般動詞-行為動詞（36／36）

法律著愛替守法的人主持公道，好人哪會使白白予歹人草踏去？

法律應為守法的人主持公道，好人怎能平白地受壞人蹧蹋？

Huat-lu̍t tio̍h-ài thè siú-huat ê lâng tsú-tshî kong-tō, hó-lâng ná ē-sái pe̍h-pe̍h hōo pháinn-lâng tsháu-ta̍h--khì?

孤伊一个人唱聲，無人贊喙。

就他一個人撂狠話，沒人聲援。

Koo i tsi̍t ê lâng tshiàng-siann, bô lâng tsàn-tshuì.

彼塊田地無人種作，放咧臭生荒，誠無彩。

那塊田地因為無人耕種，放著任其荒廢，真是可惜。

Hit tè tshân-tē bô lâng tsìng-tsoh, pàng leh tshàu-tshenn-hng, tsiânn bô-tshái.

囡仔人毋捌代誌，若無順伊的意，隨頓落去塗跤起挐。

小孩子不懂事，如果不能照他的意願，馬上就跌坐在地上鬧脾氣。

Gín-á-lâng m̄ bat-tāi-tsì, nā bô sūn i ê ì, suî tǹg lo̍h-khì thôo-kha khí-jû.

我看伊咧欲纘袂牢矣，你緊猛去共扶一下。

我看他快支撐不住了，你趕快去扶他一下。

Guá khuànn i teh-beh tsàn bē tiâu--ah, lí kín-mé khì kā hû--tsi̍t-ē.

路頭路尾佮人相拄頭，準講是無蓋熟似的厝邊，嘛愛開喙相借問一下。

在半路上遇到人，即使是不太熟稔的鄰居，還是要開口問候一下。

Lōo-thâu-lōo-bué kah lâng sio-tú-thâu, tsún-kóng sī bô kài si̍k-sāi ê tshù-pinn, mā ài khui-tshuì sio-tsioh-mn̄g--tsi̍t-ē.

嘉義市佮嘉義縣佇八掌溪相拄頭。

嘉義市跟嘉義縣在八掌溪毗鄰。

Ka-gī-tshī kah Ka-gī-kuān tī Pat-tsiáng-khe sio-tú-thâu.

聽講彼个田僑仔賣地有趁幾若億，就隨有咧走路的兄弟倚來共搧腹肚邊，敲寡所費通用。

聽說那位大地主賣地賺了好幾億，馬上就有在逃亡的道上兄弟跑來敲竹槓，訛詐些錢財花用。

Thiann-kóng hit ê tshân-kiâu-á bē tē ū thàn kuí-nā ik, tō suî ū teh tsáu-lōo ê hiann-tī uá-lâi kā siàn-pak-tóo-pinn, khà kuá sóo-huì thang iōng.

囡仔考牢大學，欲揀佗一科系來讀，序大人仙都毋通共掠跤掠手，無顧伊本人的意願。

兒女考上大學，要選讀哪一科系，做父母親千萬不要束縛兒女，不理會他本身的意願。

Gín-á khó-tiâu tāi-ha̍k, beh kíng tó tsi̍t kho-hē lâi tha̍k, sī-tuā-lâng sian to m̄-thang kā lia̍h-kha-lia̍h-tshiú, bô kòo i pún-lâng ê ì-guān.

買賣田地的字紙，雙方攏愛親身押名，才有準算。

買賣田地的合約，都要雙方親自簽名，才有效力。

Bé-bē tshân-tē ê jī-tsuá, siang-hong lóng ài tshin-sin ah-miâ, tsiah ū tsún-sǹg.

警察佇彼間茶行搜著提煉毒品的原料佮家私，頭家咒死絕誓講伊是予人冤枉的。

警方在那間茶行查獲製煉毒品的原料佮家私，老闆發毒誓說他是被冤枉的。

Kíng-tshat tī hit king tê-hâng tshiau-tio̍h thê-liān to̍k-phín ê guân-liāu kah ke-si, thâu-ke tsiù-sí-tse̍h-tsuā kóng i sī hōo lâng uan-óng--ê.

選舉的時陣，電視、報紙共候選人皂烏漆白的事件不止仔濟，才予咱好歹人攏分袂清楚。

選舉期間，電視、報紙抹黑候選人的事件特別多，才讓我們好人壞人都分不清楚。

Suán-kí ê sî-tsūn, tiān-sī, pò-tsuá kā hāu-suán-jîn tsō-oo-tshat-pe̍h ê sū-kiānn put-tsí-á tsē, tsiah hōo lán hó-pháinn lâng lóng hun bē tshing-tshó.

同學選伊做班長，伊雖然半挨推，落尾猶是答應矣。

同學選他來當班長，他雖然半推半就，最後還是答應了。

Tông-ha̍k suán i tsò pan-tiúnn, i sui-jiân puànn-e-the, lo̍h-bué iáu-sī tah-ìng--ah.

伊昨昏無來上課，有請同學鬥寄聲，提醒伊後禮拜著交期尾作業。

他昨天沒來上課，有請同學協助轉告，提醒他下周得交期末作業。

I tsa-hng bô lâi siōng-khò, ū tshiánn tông-ha̍k tàu kià-siann, thê-tshénn i āu lé-pài tio̍h kau kî-bué tsok-gia̍p.

伊予人寄聲講，前數若無清，免數想欲閣佇遮做生理。

他被人放話說，之前的債如果沒還完，別妄想還要在這裡做生理。

I hōo lâng kià-siann kóng, tsîng-siàu nā bô tshing, bián siàu-siūnn beh koh tī tsia tsò-sing-lí.

對方共我唱注，講這擺比賽𪜶一定會著冠軍。

對方向我叫囂，說這次比賽他們一定會得冠軍。

Tuì-hong kā guá tshiàng-tù, kóng tsit pái pí-sài in it-tīng ē tio̍h kuan-kun.

伊是阮公司起基的股東。

他是我們公司的創始股東。

I sī guán kong-si khí-ki ê kóo-tong.

起基來到生份所在的時，事事項項攏無了解。

當初來到陌生地時，凡事都不了解。

Khí-ki lâi-kàu senn-hūn sóo-tsāi ê sî, sū-sū-hāng-hāng lóng bô liáu-kái.

這領衫料身遮爾仔好，毋通烏白拍撋。

這件衣服材質這麼的好，不要胡亂粗暴搓洗。

Tsit niá sann liāu-sin tsiah-nī-á hó, m̄-thang oo-pe̍h phah-nuá.

這領拍鐵仔褲較有拍撋。

這件牛仔褲比較耐洗。

Tsit niá phah-thih-á-khòo khah ū phah-nuá.

伊是一个有拍撋的人，毋驚任何的拖磨。

他是一位有韌性的人，不怕任何的折磨。

I sī tsi̍t ê ū phah-nuá ê lâng, m̄ kiann jīm-hô ê thua-buâ.

代誌會遮爾順序，攏是你𠢕推排。

事情會這麼順利，都是你很懂得處置安排。

Tāi-tsì ē tsiah-nī sūn-sī, lóng sī lí gâu thui-pâi.

昨暝大地動，眾人驚甲起跤踉，干焦伊醉甲毋知人，實在真了然！

昨晚發生大地震，大家驚嚇到拔腿狂奔，只有他醉到不醒人事，真是丟人！

Tsa-mê tuā tē-tāng, tsìng-lâng kiann kah khí-kha-lōng, kan-na i tsuì kah m̄-tsai-lâng, si̍t-tsāi tsin liáu-jiân!

這个工程因為疫情的關係煞斷站去，毋知當時才會閣再振動。

這個工程因為疫情的關係中斷掉了，不曉得何時才會再動工。

Tsit ê kang-tîng in-uī i̍k-tsîng ê kuan-hē suah tn̄g-tsām--khì, m̄ tsai tang-sî tsiah ē koh-tsài tín-tāng.

這層代誌佮你無干礙，你上好恬恬，莫表示意見。

這件事跟你毫不相干，你最好不作聲，別表示意見。

Tsit tsân tāi-tsì kah lí bô kan-gāi, lí siōng-hó tiām-tiām, mài piáu-sī ì-kiàn.

囡仔的食食著愛較斟酌咧，若無，會干礙著伊轉大人。

孩子的飲食要注意，否則，會影響他的成長。

Gín-á ê tsia̍h-si̍t tio̍h-ài khah tsim-tsiok--leh, nā-bô, ē kan-gāi-tio̍h i tńg-tuā-lâng.

我欲去揣阮阿舅，伊拄好出去矣，兩个就按呢相捽路無相搪。

我要去找舅舅，他正好出門了，兩個就這樣錯身而過沒遇到對方。

Guá beh khì tshuē guán a-kū, i tú-hó tshut--khì--ah, nn̄g ê tsiū-án-ne sio-sut-lōo bô sio-tn̄g.

聽著空襲警報，逐家起跤走咧踉。

聽到防空警報，大家起身狂奔。

Thiann-tio̍h khong-si̍p kíng-pò, ta̍k-ke khí-kha tsáu leh lōng.

厝裡無愛的物件提去討捔，較袂鎮地。

家裡不要的東西拿去丟掉，才不會占地方。

Tshù--lí bô ài ê mi̍h-kiānn the̍h-khì thó-ka̍k, khah bē tìn-tè.

𪜶兩兄弟仔為著小可仔代誌煞來拆破面，實在誠毋值！

他們兄弟倆為了一些小事竟然撕破臉，實在很不值得！

In nn̄g hiann-tī-á uī-tio̍h sió-khuá-á tāi-tsì suah lâi thiah-phuà-bīn, si̍t-tsāi tsiânn m̄-ta̍t!

伊見講攏無影無跡的代誌，這馬閣佇遐咧死炸矣。

他每次說的都是沒有根據的事情，現在又在那裡鬼扯了。

I kiàn kóng lóng bô-iánn-bô-tsiah ê tāi-tsì, tsit-má koh tī hia teh sí-tsuànn--ah.

師傅講你是咧共你牽教，你毋通當做伊是咧揣空縫。

師傅說你是在牽引教導你，你不要當成他在找你麻煩。

Sai-hū kóng--lí sī teh kā lí khan-kà, lí m̄-thang tòng-tsò i sī teh tshuē-khang-phāng.

伊今仔日的穿插不止仔奅，連衫仔褲的色水嘛配搭甲誠出擢。

他今天的穿著很時髦，連衣褲的色澤都搭配得很出色。

I kin-á-ji̍t ê tshīng-tshah put-tsí-á phānn, liân sann-á-khòo ê sik-tsuí mā phuè-tah kah tsiânn tshut-tioh.

兩个人伨頭弄獅的時陣，獅頭愛和獅尾配搭甲真四序，才袂重耽去。

兩個人搭檔舞獅的時候，負責獅頭和獅尾的人要配合得很合拍，才不會出差錯。

Nn̄g ê lâng thīn-thâu lāng-sai ê sî-tsūn, sai-thâu ài hām sai-bué phuè-tah kah tsin sù-sī, tsiah bē tîng-tânn--khì.

恁老師講你是為你好，你也敢共伊頂。

你們老師批評你是為你好，你也敢頂撞他。

Lín lāu-su kóng--lí sī uī lí hó, lí iā kánn kā i tiánn.

第 14 階 第 36 課 一般動詞-行為動詞（36／36）

教材來源

第 14 階　第 36 課　一般動詞-行為動詞（36／36）