第 15 階 第 1 課 俗諺語（1／17）
-
人講：「一人一家代，公媽隨人祀。」你哪著去管別人的代誌咧？
人家說：「一人一家事，祖先牌位各人祭祀。」你何必去管別人的事呢？
Lâng kóng, “Tsi̍t lâng tsi̍t ke tāi, kong-má suî-lâng tshāi.” Lí ná-tio̍h khì kuán pa̍t-lâng ê tāi-tsì--leh?
-
這个囡仔遮爾好禮，俗語講：「一人看出一家，新婦看出大家。」相信𪜶兜的家教必然嘛誠好。
這個小孩這麼有禮貌，俗話說：「由個人看出家庭的教養，由媳婦看出婆婆的涵養。」相信他們家的家教必定也很好。
Tsit ê gín-á tsiah-nī hó-lé, sio̍k-gí kóng, “Tsi̍t lâng khuànn-tshut tsi̍t ke, sin-pū khuànn-tshut ta-ke.” Siong-sìn in tau ê ka-kàu pit-jiân mā tsiânn hó.
-
賣雨幔的煩惱攏好天，無人欲共買；做麵的煩惱一直落雨，麵會曝袂焦，真正是「一人煩惱一樣，無人煩惱親像」。
賣雨衣的煩惱一直都是好天氣，雨衣賣不出去；製麵條的擔心一直下雨，麵條曬不乾，真是「每個人都有各自煩心的事」。
Bē hōo-mua--ê huân-ló lóng hó-thinn, bô lâng beh kā bé; tsò mī--ê huân-ló it-ti̍t lo̍h-hōo, mī ē pha̍k bē ta, tsin-tsiànn sī “tsi̍t lâng huân-ló tsi̍t iūnn, bô lâng huân-ló tshin-tshiūnn”.
-
高速公路好駛車，毋過路標複雜，一下看無真，落南駛對上北去，就「一丈差九尺」，加了時間、閣加了油的。
高速公路好開車，但是號誌複雜，一下沒看仔細，南下開到北上去，「南轅北轍」，費時又費油。
Ko-sok kong-lōo hó sái-tshia, m̄-koh lōo-piau ho̍k-tsa̍p, tsi̍t-ē khuànn bô tsin, lo̍h-lâm sái tuì tsiūnn-pak--khì, tō “tsi̍t tn̄g tsha káu tshioh”, ke liáu sî-kan, koh ke liáu iû--ê.
-
菜塗菜金啦，過年前佮過年後，風颱前佮風颱後，青菜的價數是「一丈差九尺」。
菜價賤如土、貴如金啊，過年前跟過年後，颱風前跟颱風後，蔬菜的價格「相差懸殊」。
Tshài thôo tshài kim--lah, kuè-nî tsîng kah kuè-nî āu, hong-thai tsîng kah hong-thai āu, tshenn-tshài ê kè-siàu sī “tsi̍t tn̄g tsha káu tshioh”.
-
俗語講：「一千賒毋值八百現。」甘願俗俗仔賣，提著現金，嘛無愛予人客欠數。
俗話說：「一千元的賒帳不如八百元的現金。」寧可便宜地賣，拿到現金，也不願意讓客人賒帳。
Sio̍k-gí kóng, “Tsi̍t-tshing sia m̄-ta̍t peh-pah hiān.” Kam-guān sio̍k-sio̍k-á bē, the̍h-tio̍h hiān-kim, mā bô ài hōo lâng-kheh khiàm-siàu.
-
賣物件予大單位數攏著先寄咧，月底才做一改清，是講「一千賒毋值八百現」，貨去錢無看見，總是較袂放心。
賣東西給大單位帳都要先記著，月底才一次撥付，可是「一千元的賒帳不如八百元的現金」，貨搬走了錢卻還看不到，總是比較不放心。
Bē mi̍h-kiānn hōo tuā tan-uī siàu lóng tio̍h sing kià--leh, gue̍h-té tsiah tsò tsi̍t kái tshing, sī-kóng “tsi̍t-tshing sia m̄-ta̍t peh-pah hiān”, huè khì tsînn bô khuànn--kìnn, tsóng--sī khah bē hòng-sim.
-
我去夜市仔開兩百箍買著這條椅仔，哪知坐無兩工就害去，袂輸擤鼻糊的，人講「一分錢，一分貨」，有影俗物就無好貨。
我去夜市花了兩百塊買到這張椅子，哪知道坐不到兩天就壞了，就好像用鼻涕黏的一樣，人家說「一分錢，一分貨」，果然便宜就沒好貨。
Guá khì iā-tshī-á khai nn̄g-pah khoo bé-tio̍h tsit liâu í-á, ná tsai tsē bô nn̄g kang tō hāi--khì, bē-su tshìng-phīnn kôo--ê, lâng kóng “tsi̍t hun tsînn, tsi̍t hun huè”, ū-iánn sio̍k-mi̍h tō bô hó huè.
-
伊做人真凍霜，「一个錢拍二十四个結」，攏干焦欲共人偏，毋捌講欲請人。
他為人小氣，「荷包看得緊緊的」，都只想佔人便宜，從來沒說過要請客。
I tsò-lâng tsin tàng-sng, “tsi̍t ê tsînn phah jī-tsa̍p-sì ê kat”, lóng kan-na beh kā lâng phinn, m̄ bat kóng beh tshiánn--lâng.
-
金木伯的孤囝去日本留學，閣提著博士學位，這款的子弟真正是「一斗較贏九石」，通庄的人攏呵咾甲會觸舌！
金木伯的獨子去日本留學，又拿到博士學位，這樣的子弟真正是「少量的精品，勝過大量的劣質品」，整個村里的人都讚不絕口！
Kim-bo̍k peh ê koo-kiánn khì Ji̍t-pún liû-ha̍k, koh the̍h-tio̍h phok-sū ha̍k-uī, tsit khuán ê tsú-tē tsin-tsiànn sī “tsi̍t táu khah iânn káu tsio̍h”, thong tsng ê lâng lóng o-ló kah ē tak-tsi̍h!
-
你這个囡仔「一日走拋拋，一暝點燈膋」，規工顧咧𨑨迌，暗時才來那寫宿題那盹龜，實在誠害。
你這個孩子本末倒置，「白天四處遊蕩，晚上挑燈夜戰」，整天只顧著玩樂，夜裡才邊寫功課邊打盹，真是糟糕。
Lí tsit ê gín-á “tsi̍t ji̍t tsáu-pha-pha, tsi̍t mê tiám ting-lâ”, kui-kang kòo leh tshit-thô, àm-sî tsiah lâi ná siá siok-tê ná tuh-ku, si̍t-tsāi tsiânn hāi.
-
拄去剃頭店剃頭轉來，厝邊兜的人看著就共我呵咾講：「一日剃頭，三日緣投。」
剛從理髮店理髮回來，鄰居看到就稱讚我說：「一天理髮，三天英俊。」
Tú khì thì-thâu-tiàm thì-thâu tńg--lâi, tshù-pinn-tau ê lâng khuànn--tio̍h tō kā guá o-ló kóng, “Tsi̍t ji̍t thì-thâu, sann ji̍t iân-tâu.”
-
伊講欲認真準備考試，這馬呔會閣「一日討海，三日曝網」，激放放咧。
他不是說要認真準備考試，怎麼現在又「三天打魚，兩天晒網」，裝得一副毫不在意的樣子呢。
I kóng beh jīn-tsin tsún-pī khó-tshì, tsit-má thài ē koh “tsi̍t ji̍t thó-hái, sann ji̍t pha̍k bāng”, kik hòng-hòng--leh.
-
人講：「一日徙栽，三日徛黃。」若不時咧換頭路，想欲高升就僫囉。
人們說：「移植一次，蔫黃三日。」若經常換工作，恐就無法順利高升囉。
Lâng kóng, “Tsi̍t ji̍t suá-tsai, sann ji̍t khiā-n̂g.” Nā put-sî teh uānn thâu-lōo, siūnn-beh ko-sing tō oh--looh.
-
一寡爸母對𪜶囝兒的教育傷過關心，要求欲換班級，抑是調去別間學校，毋過「一日徙栽，三日徛黃」，囡仔人曷會堪得按呢搬徙，嘛無法度注心來讀冊。
一些父母對於他們的小孩的教育太過關心，要求要換班級，或是調去別間學校，但是「移植一次，蔫黃三日」，小孩子怎麼能受得了這樣遷移，也沒辦法用心讀書。
Tsi̍t-kuá pē-bú tuì in kiánn-jî ê kàu-io̍k siunn kuè kuan-sim, iau-kiû beh uānn pan-kip, ia̍h-sī tiàu-khì pa̍t king ha̍k-hāu, m̄-koh “tsi̍t ji̍t suá-tsai, sann ji̍t khiā-n̂g”, gín-á-lâng a̍h ē-kham-tit án-ne puann-suá, mā bô-huat-tōo tsù-sim lâi tha̍k-tsheh.
-
有當時仔仝公族仔咧食會的時，大部份的人互相攏無相捌，莫怪俗語講：「一代親，二代表，三代毋捌了了。」
有時候親族定期餐會聚餐的時候，大部分的人彼此都不認識，難怪俗話說：「親戚間的往來，一代比一代疏遠。」
Ū-tang-sî-á kāng kong-tso̍k-á teh tsia̍h-huē ê sî, tuā-pōo-hūn ê lâng hōo-siong lóng bô sio-bat, bo̍k-kuài sio̍k-gí kóng, “It tāi tshin, jī tāi piáu, sann tāi m̄ bat liáu-liáu.”
-
咱講話氣口愛溫和，話語愛撙節，毋通像俗語講的，「一句話三角六尖」，才袂去傷著人。
我們說話語氣要溫和，話語要節制，別像俗話說的，「說話帶刺」，才不會傷人。
Lán kóng-uē khuì-kháu ài un-hô, uē-gí ài tsún-tsat, m̄-thang tshiūnn sio̍k-gí kóng--ê, “tsi̍t kù uē sann-kak-la̍k-tsiam”, tsiah bē khì siong-tio̍h lâng.
-
有的人「一句話三角六尖」，出喙就去傷著人，毋過有的人就加真有外才，講著話在伊挲圓捏扁、抹壁雙面光。
有的人「言語銳利」，出言就傷人，不過有的人就很有交際能力，說起話來能字斟句酌、兩面討好。
Ū ê lâng “tsi̍t kù uē sann-kak-la̍k-tsiam”, tshut-tshuì tō khì siong-tio̍h lâng, m̄-koh ū ê lâng tō ke tsin ū guā-tsâi, kóng-tio̍h uē tsāi i so-înn-tēnn-pínn, buah-piah siang-bīn kng.
-
少年人愛有定性，毋通「一年換二十四个頭家」，定定咧換頭路，按呢欲哪會有出脫？
年輕人要有定性，不要「一年換二十四個雇主」，老是在換工作，這樣怎麼會有出息？
Siàu-liân-lâng ài ū tīng-sìng, m̄-thang “tsi̍t nî uānn jī-tsa̍p-sì ê thâu-ke”, tiānn-tiānn teh uānn thâu-lōo, án-ne beh ná ē ū tshut-thuat?
-
𪜶序大人不時苦勸伊食食、睏眠愛正常，伊煞「一耳空入，一耳空出」，今身體出問題矣，欲怪啥人！
他父母親常常勸告他飲食與睡眠要正常，他卻「右耳進，左耳出」，現在身體出狀況了，要怪誰呢！
In sī-tuā-lâng put-sî khóo-khǹg i tsia̍h-si̍t, khùn-bîn ài tsìng-siông, i suah “tsi̍t hīnn-khang ji̍p, tsi̍t hīnn-khang tshut”, tann sin-thé tshut būn-tê--ah, beh kuài siánn-lâng!
-
代誌欲做進前，愛先想予清楚，計畫予好勢，「一步棋，一步著」，跤踏實地照步來，按呢就較會順序、較會成功。
做事情前，應當先思慮清楚，計畫周全，「按部就班，步步為營」，腳踏實地來做，就會比較順利，比較能成功。
Tāi-tsì beh tsò tsìn-tsîng, ài sing siūnn hōo tshing-tshó, kè-uē hōo hó-sè, “tsi̍t pōo kî, tsi̍t pōo tio̍h”, kha-ta̍h-si̍t-tē tsiàu-pōo-lâi, án-ne tō khah ē sūn-sī, khah ē sîng-kong.
-
秀玲咧做代誌真謹慎，事事項項攏準備甲誠周至，就像人咧講的：「一步棋，一步著。」代誌交代伊去發落，予人足放心。
秀玲做事十分謹慎，凡事都準備得很周全，就像人們說的：「做事按部就班。」將事情交代給他去張羅，讓人十分放心。
Siù-lîng teh tsò tāi-tsì tsin kín-sīn, sū-sū-hāng-hāng lóng tsún-pī kah tsiânn tsiu-tsì, tō tshiūnn lâng teh kóng--ê, “Tsi̍t pōo kî, tsi̍t pōo tio̍h.” Tāi-tsì kau-tài i khì hua̍t-lo̍h, hōo lâng tsiok hòng-sim.
-
毋免怨嘆家己歹命，俗語講：「一枝草，一點露。」咱若肯拍拚，就免驚袂當出頭天。
不要抱怨自己命不好，俗話說：「一枝草，一點露。」我們若肯努力奮鬥，就不用怕不能闖出一片天。
M̄-bián uàn-thàn ka-kī pháinn-miā, sio̍k-gí kóng, “Tsi̍t ki tsháu, tsi̍t tiám lōo.” Lán nā khíng phah-piànn, tō bián kiann bē-tàng tshut-thâu-thinn.
-
你莫嫌伊無半撇，後擺無出脫，人咧講：「一枝草，一點露。」以後的代誌啥人會知？
你別嫌他什麼也不會，以後沒出息，人家說：「天生我才必有用。」以後的事情誰知道？
Lí mài hiâm i bô-puànn-phiat, āu-pái bô tshut-thuat, lâng teh kóng, “Tsi̍t ki tsháu, tsi̍t tiám lōo.” Í-āu ê tāi-tsì siánn-lâng ē tsai?
-
咱巷仔口彼个陳董的閣去自助餐買便當來食矣，枉費伊大某、細姨媠噹噹，厝內煞定定冤家量債，無人欲煮予食。莫怪人講：「一某無人知，兩某相卸代。」
住巷口的陳董事長又去自助餐買便當來吃了，虧他有老婆、姨太太而且都很漂亮，家裡卻常常爭吵，沒人做飯給他吃。難怪人家說：「一夫一妻，夫唱婦隨；家有妻妾，雞犬不寧。」
Lán hāng-á-kháu hit ê Tân-táng--ê koh khì tsū-tsōo-tshan bé piān-tong lâi tsia̍h--ah, óng-huì i tuā-bóo, sè-î suí-tang-tang, tshù-lāi suah tiānn-tiānn uan-ke-niû-tsè, bô lâng beh tsú hōo tsia̍h. Bo̍k-kuài lâng kóng, “Tsi̍t bóo bô lâng tsai, nn̄g bóo sio-sià-tāi.”
-
伊佇阮公司頂司誠滿意，下跤手人閣呵咾甲會觸舌，這款「一面抹壁雙面光」的工夫，一般人是無才調按呢。
他在我們公司上屬很滿意，下屬也讚譽有加，這種「圓融的處世功夫」，一般人是沒辦法如此的。
I tī guán kong-si tíng-si tsiânn muá-ì, ē-kha-tshiú-lâng koh o-ló kah ē tak-tsi̍h, tsit khuán “tsi̍t bīn buah-piah siang bīn kng” ê kang-hu, it-puann lâng sī bô tsâi-tiāu án-ne.
-
公司派我去外地拜訪客戶，一逝路遐遠，規氣「一兼二顧，摸蜊仔兼洗褲」，客戶拜訪煞，順紲來去揣真久無見面的朋友。
公司派我到外地拜訪客戶，一趟路那麼遠，乾脆來個「一舉兩得」，客戶拜訪完，順道去找很久沒見面的朋友。
Kong-si phài guá khì guā-tē pài-hóng kheh-hōo, tsi̍t tsuā lōo hiah hn̄g, kui-khì “it kiam jī kòo, bong lâ-á kiam sé khòo”, kheh-hōo pài-hóng suah, sūn-suà lâi-khì tshuē tsin kú bô kìnn-bīn ê pîng-iú.
-
這改賣厝，毋但愛納真重的稅金，閣愛付中人錢，有影是「一隻牛剝雙領皮」，較算都算袂和。
這次賣房子，要負擔的稅金很吃重，還得支付仲介費，真的是「一頭牛剝兩張皮」，怎麼算都划不來。
Tsit kái bē tshù, m̄-nā ài la̍p tsin tāng ê suè-kim, koh ài hù tiong-lâng tsînn, ū-iánn sī “tsi̍t tsiah gû pak siang niá phuê”, khah sǹg to sǹg-bē-hô.
-
囡仔才叫一聲「阿爸」爾爾，老爸就「一隻蝨母嗙甲水牛大」，講𪜶囝啥物話都會曉講，這敢有影是真的？
小嬰兒才喊一聲「爸爸」而已，做父親的人就把「一隻小蝨子說成大水牛」，誇張到說他兒子什麼話都會說，這難道是真的嗎？
Gín-á tsiah kiò tsi̍t siann “a-pah” niā-niā, lāu-pē tō “tsi̍t tsiah sat-bó pòng kah tsuí-gû tuā”, kóng in kiánn siánn-mih uē to ē-hiáu kóng, tse kám ū-iánn sī tsin--ê?
-
古早糧食缺欠的時，煮糜是幾粒米、一寡番薯簽乾摻一大坩水，「一粒田螺煮九碗公湯」，欲罟一粒飯粒仔就親像海底摸針，真僫啦！
從前糧食匱乏的時代，煮稀飯是幾粒米、一些番薯簽乾加一大鍋的水，「一粒田螺煮九海碗湯」，要撈到一粒米粒就像海底撈針，好難啊！
Kóo-tsá niû-si̍t khueh-khiàm ê sî, tsú muê sī kuí lia̍p bí, tsi̍t-kuá han-tsî-tshiam-kuann tsham tsi̍t tuā khann tsuí, “tsi̍t lia̍p tshân-lê tsú káu uánn-kong thng”, beh koo tsi̍t lia̍p pn̄g-lia̍p-á tō tshin-tshiūnn hái-té bong tsiam, tsin oh--lah!
-
三兩句就講會清楚的話，煞寫甲規大篇，攏專無路用話，真正是「一粒田螺煮九碗公湯」。
兩三句就可以講清楚的話，寫得長篇大論，全都是廢話，真是「一顆田螺煮九碗湯」。
Sann nn̄g kù tō kóng ē tshing-tshó ê uē, suah siá kah kui tuā phinn, lóng tsuan bô-lōo-īng uē, tsin-tsiànn sī “tsi̍t lia̍p tshân-lê tsú káu uánn-kong thng”.
-
俗語講：「一粒米，百粒汗。」咱這馬有通快活食，攏是作穡人拚出來的，仙都毋通共討債去。
俗諺說「一粒米，百粒汗」，現在我們能吃得痛快，都是農民努力的成果，千萬不要輕易浪費掉。
Sio̍k-gí kóng, “Tsi̍t lia̍p bí, pah lia̍p kuānn.” Lán tsit-má ū thang khuìnn-ua̍h tsia̍h, lóng sī tsoh-sit-lâng piànn--tshut-lâi--ê, sian to m̄-thang kā thó-tsè--khì.
-
伊𠢕講話，嘛興講話，總是有時仔講的話都無影無跡，罔喋的爾爾，真正是一箍「一喙掛雙舌」的人。
他能說善道，也喜歡說話，不過有時候說的話全是無憑無據的，隨便說說的而已，真的是個「一張嘴長兩個舌頭」的人。
I gâu kóng-uē, mā hìng kóng-uē, tsóng--sī ū-sî-á kóng ê uē to bô-iánn-bô-tsiah, bóng thi̍h--ê niā-niā, tsin-tsiànn sī tsi̍t khoo “tsi̍t tshuì kuà siang tsi̍h” ê lâng.
-
古早人講：「一鄉一俗。」咱愛尊重人別跡的風俗，莫堅持講著愛按怎才是著的。
古人說：「各地有不同習俗。」我們要尊重不同地區的風俗，不要堅持非得要如何才是正確的。
Kóo-tsá-lâng kóng, “Tsi̍t hiong tsi̍t sio̍k.” Lán ài tsun-tiōng lâng pa̍t-jiah ê hong-sio̍k, mài kian-tshî kóng tio̍h-ài án-tsuánn tsiah-sī tio̍h--ê.
-
見若有著賊偷的案件，管區的頭一个想著的就是伊，因為伊有案底，這就是古早人講的：「一遍賊，百世賊。」
只要有竊盜事件，警察第一個想到的就是他，因為他有案底，這就是古人說的：「偷一次，永遠都是小偷。」
Kiàn-nā ū tio̍h-tsha̍t-thau ê àn-kiānn, kuán-khu--ê thâu tsi̍t ê siūnn--tio̍h--ê tō sī i, in-uī i ū àn-té, tse tō sī kóo-tsá-lâng kóng--ê, “Tsi̍t piàn tsha̍t, pah sì tsha̍t.”
-
古早人上慼人做賊，人講「一遍賊，百世賊」，偷提人的物件是會害你的家族仔面皮卸落地呢。
以前的人最痛恨人家當小偷，因為「雖然只偷一回，但是世世代代都是小偷的族類」，偷別人的東西是會讓無辜的後代子孫蒙羞。
Kóo-tsá-lâng siōng tsheh lâng tsò tsha̍t, lâng kóng “tsi̍t piàn tsha̍t, pah sì tsha̍t”, thau-the̍h lâng ê mi̍h-kiānn sī ē hāi lí ê ka-tso̍k-á bīn-phuê sià lo̍h tē--neh.
教材來源
教育部臺灣台語常用詞辭典（來源網站）
授權：CC BY-ND 3.0 臺灣（姓名標示－禁止改作）
教育部（2023）。臺灣台語常用詞辭典（臺灣學術網路第二版）。https://sutian.moe.edu.tw/