第 15 階 第 4 課 俗諺語（4／17）
-
伊明其知家己都學無一冬，半桶師仔爾爾，煞唱講家己有偌𠢕，有影是「大紅花毋知䆀，圓仔花䆀毋知」。
他明知自己還學不到一年，只是個學徒，卻說自己有多厲害，實在是沒有「自知之明」。
I bîng-ki-tsai ka-kī to o̍h bô tsi̍t tang, puànn-tháng-sai-á niā-niā, suah tshiàng kóng ka-kī ū guā gâu, ū-iánn sī “tuā-âng hue m̄ tsai bái, înn-á-hue bái m̄ tsai”.
-
伊是一个人才，人講「大格雞慢啼」，閣三五年仔一定會有出脫。
他是個人才，人家說「大器晚成」，再來個三五年後一定會有一番作為。
I sī tsi̍t ê jîn-tsâi, lâng kóng “tuā-keh ke bān thî”, koh--sann-gōo-nî-á it-tīng ē ū tshut-thuat.
-
員工升官就會講主管捌英才，若無予人提拔著，就會講主管「大細目，懸低耳」，人攏是按呢。
員工升官就會說主管識英才，要是未受別人提拔，就會說主管「大小眼，高低耳」，人都是如此。
Uân-kang sing-kuann tō ē kóng tsú-kuán bat ing-tsâi, nā bô hōo lâng thê-pua̍t--tio̍h, tō ē kóng tsú-kuán “tuā-sè-ba̍k, kuân-kē hīnn”, lâng lóng sī án-ne.
-
巷仔口彼擔蚵仔麵線「大碗閣滿墘」，料濟氣味好，不管時去攏足濟人咧排隊。
巷口那攤蚵仔麵線「量多品質好」，用的料多滋味好，不論何時去都很多人在排隊。
Hāng-á-kháu hit tànn ô-á-mī-suànn “tuā uánn koh buán kînn”, liāu tsē khì-bī hó, put-kuán-sî khì lóng tsiok tsē lâng teh pâi-tuī.
-
人性攏是痟貪的，心肝往往愈來愈大，也欲甜，也欲滇，也欲「大碗閣滿墘」。
人性都是貪心的，往往人心不足蛇吞象，又要甜，又要滿，又要「量多品質好」。
Jîn-sìng lóng sī siáu-tham--ê, sim-kuann íng-íng jú lâi jú tuā, iā beh tinn, iā beh tīnn, iā beh “tuā uánn koh buán kînn”.
-
我無閒甲規工攏無食物件，這馬是枵甲「大腸告小腸」，強欲接載袂牢矣。
我忙到整天都沒吃東西，現在可是餓得「肚子咕嚕咕嚕叫」，快撐不下去了。
Guá bô-îng kah kui-kang lóng bô tsia̍h mi̍h-kiānn, tsit-má sī iau kah “tuā-tn̂g kò sió-tn̂g”, kiōng-beh tsih-tsài bē tiâu--ah.
-
有通食就算誠佳哉矣，莫踮遐嫌肝嫌胘，講甲袂得通煞；聽候你枵甲「大腸告小腸」的時陣，啥物吞袂落喉的物件嘛會攏是山珍海味。
有東西吃就已經很幸運了，不要再嫌東嫌西，講個沒完沒了，等你餓得「飢腸轆轆」的時候，就覺得任何難以下嚥的東西皆是佳餚美食。
Ū thang tsia̍h tō-sǹg tsiânn ka-tsài--ah, mài tiàm hia hiâm-kuann-hiâm-kiān, kóng kah bē-tit-thang suah; thìng-hāu lí iau kah “tuā-tn̂g kò sió-tn̂g” ê sî-tsūn, siánn-mih thun bē lo̍h-âu ê mi̍h-kiānn mā ē lóng sī san-tin-hái-bī.
-
咱做人著愛謙卑，毋通臭屁，才袂予人笑講：「大鼎未滾，細鼎沖沖滾。」
我們做人得謙虛，別自吹自擂，才不會被別人笑說：「滿瓶水不響，半瓶水叮噹」。
Lán tsò-lâng tio̍h-ài khiam-pi, m̄-thang tshàu-phuì, tsiah bē hōo lâng tshiò kóng, “Tuā tiánn buē kún, sè tiánn tshiâng-tshiâng-kún.”
-
爸母疼囝是天性，好額人疼囝，散赤人也疼囝，人講「弓蕉吐囝為囝死」，無因為好額散就會無仝款，就會重頭輕。
父母疼愛子女是天性，富人疼愛子女，窮人也疼愛子女，人家說「香蕉吐子為子死」，不會因為貧富而有不同，而有不同或側重。
Pē-bú thiànn kiánn sī thian-sìng, hó-gia̍h-lâng thiànn kiánn, sàn-tshiah-lâng iā thiànn kiánn, lâng kóng “king-tsio thòo kiánn uī kiánn sí”, bô in-uī hó-gia̍h-sàn tō ē bô kāng-khuán, tō ē tāng-thâu-khin.
-
阮這陣愛寫作的朋友會定期聚會，逐家提家己寫的作品出來唸，希望眾人提出修改的意見，「互相落氣，求進步」，向望寫作的能力會當提升。
我們這群喜愛寫作的朋友會定期聚會，大家拿自己寫的作品出來念，希望大家提供修改意見，「互相批評追求進步」，期望寫作的能力可以提升。
Guán tsit tīn ài siá-tsok ê pîng-iú ē tīng-kî tsū-huē, ta̍k-ke the̍h ka-kī siá ê tsok-phín tshut-lâi liām, hi-bāng tsìng-lâng thê-tshut siu-kái ê ì-kiàn, “hōo-siong làu-khuì, kiû tsìn-pōo”, ǹg-bāng siá-tsok ê lîng-li̍k ē-tàng thê-sing.
-
爸母疼囝，對較有出脫的就放較會落心，啊若趁較無食的就會較照顧，人講：「五肢指頭仔伸出來無平長。」毋過疼囝的心攏是仝款的，絕對無大細心的道理。
父母疼愛子女，對有出息的就比較會放心，對於無力謀生的就會比較照顧，人家說：「手指頭伸出來也長短不一。」但疼愛小孩的心都一樣，絕無偏袒的道理。
Pē-bú thiànn kiánn, tuì khah ū tshut-thuat--ê tō pàng khah ē lo̍h-sim, ah nā thàn khah bô tsia̍h--ê tō ē khah tsiàu-kòo, lâng kóng, “Gōo ki tsíng-thâu-á tshun--tshut-lâi bô pênn tn̂g.” M̄-koh thiànn kiánn ê sim lóng sī kāng-khuán--ê, tsua̍t-tuì bô tuā-sè-sim ê tō-lí.
-
高科技公司趁錢的家私是技術，若是內底的人將技術漏洩，親像人所講的「內神通外鬼」，閣較大間的公司嘛會倒店。
高科技公司賺錢的利器是技術，若是內部的人將技術外洩，像人們所說的「內神通外鬼」，再怎麼大的公司也會倒閉。
Ko-kho-ki kong-si thàn-tsînn ê ke-si sī ki-su̍t, nā-sī lāi-té ê lâng tsiong ki-su̍t lāu-sia̍p, tshin-tshiūnn lâng sóo kóng ê “lāi sîn thong guā kuí”, koh-khah tuā king ê kong-si mā ē tó-tiàm.
-
彼間大賣場的電腦連紲予人偷提幾若十台去，警方懷疑是因為「內神通外鬼」，才會損失遮嚴重。
那間大賣場的電腦連續被偷走幾十台，警方懷疑是因為「內神通外鬼」，才會損失這麼嚴重。
Hit king tuā-bē-tiûnn ê tiān-náu liân-suà hōo lâng thau-the̍h kuí-nā tsa̍p tâi--khì, kíng-hong huâi-gî sī in-uī “lāi sîn thong guā kuí”, tsiah ē sún-sit tsiah giâm-tiōng.
-
俗語講：「六月芥菜假有心。」做人若是假有情、假有義，隨時會予人看破跤手。
俗話說：「六月的芥菜不是真有心。」為人若是虛情假意，馬上會被人家看穿居心。
Sio̍k-gí kóng, “La̍k-gue̍h kuà-tshài ké ū-sim.” Tsò-lâng nā-sī ké ū-tsîng, ké ū-gī, suî-sî ē hōo lâng khuànn-phuà-kha-tshiú.
-
你佮伊來往愛較注意咧，伊對你好，是「六月芥菜假有心」，千萬毋通去予伊騙去。
你跟他來往要小心點，他對你好，是「六月的芥菜不是真有心」，千萬不要被他騙了。
Lí kah i lâi-óng ài khah tsù-ì--leh, i tuì lí hó, sī “la̍k-gue̍h kuà-tshài ké ū-sim”, tshian-bān m̄-thang khì hōo i phiàn--khì.
-
人講：「公親變事主。」這兩个相拍雞仔的代誌你上好莫插，若無，你是會食袂焦。
人家說：「仲裁者變成當事人。」這兩個好鬥成性的人的事情你最好別插手，否則你會吃不完兜著走。
Lâng kóng, “Kong-tshin piàn sū-tsú.” Tsit nn̄g ê sio-phah-ke-á ê tāi-tsì lí siōng-hó mài tshap, nā-bô, lí sī ē tsia̍h bē ta.
-
𪜶翁仔某冤家我去排解，想袂到「公親變事主」，𪜶顛倒講是我害的，和我有啥物底代！
他們夫妻吵架我去調解，想不到「仲裁者變成當事人」，他們反而說是我害的，跟我有什麼關係！
In ang-á-bóo uan-ke guá khì pâi-kái, siūnn-bē-kàu “kong-tshin piàn sū-tsú”, in tian-tò kóng sī guá hāi--ê, hām guá ū siánn-mih tī-tāi!
-
王董的過身了後才咧分家伙，後生、查某囝逐家相爭袂煞，規日冤家量債，真正是「分袂平，拍甲二九暝」。
王董事長過世以後才分財產，兒子、女兒大家爭執不停，整天吵鬧不休，實在是「分配不平均，就會引起長期紛爭」。
Ông-táng--ê kuè-sin liáu-āu tsiah teh pun-ke-hué, hāu-senn, tsa-bóo-kiánn ta̍k-ke sio-tsenn bē suah, kui-ji̍t uan-ke-niû-tsè, tsin-tsiànn sī “pun bē pênn, phah kah Jī-káu-mê”.
-
伊人戇直，運途煞誠順序，有影是「天公疼戇人」。
他憨厚沒心機，運勢卻很順利，真的是「老天爺疼惜老實人」。
I lâng gōng-ti̍t, ūn-tôo suah tsiânn sūn-sī, ū-iánn sī “thinn-kong thiànn gōng-lâng”.
-
人講：「天頂天公，地下母舅公。」你對恁阿舅愛較尊重咧，後擺娶某著向伊坐大位，才聽好開桌呢。
人們說：「天上的天公，人世間的舅舅都是最尊貴的。」對你舅舅要尊重一點，以後你娶老婆的時候還需要仰賴他來坐上位，才可以開席呢。
Lâng kóng, “Thinn-tíng Thinn-kong, tē-ē bú-kū-kong.” Lí tuì lín a-kū ài khah tsun-tiōng--leh, āu-pái tshuā-bóo tio̍h ǹg i tsē tuā-uī, tsiah thìng-hó khui-toh--neh.
-
少年人衝碰閣好強，冤家相拍閣較車，莫怪人講：「少年若無一擺戇，路邊哪有有應公。」家己無惜性命，嘛愛替爸母小想咧。
年輕人衝動又好強，吵架打架又飆車，難怪有人說：「若非年少時傻過一次，路邊哪來的有應公廟。」自己不愛惜生命，也要替父母想一下。
Siàu-liân-lâng tshóng-pōng koh hònn-kiông, uan-ke sio-phah koh kà-tshia, bo̍k-kuài lâng kóng, “Siàu-liân nā bô tsi̍t pái gōng, lōo-pinn ná ū Iú-ìng-kong.” Ka-kī bô sioh sènn-miā, mā ài thè pē-bú sió siūnn--leh.
-
俗語講：「少年袂曉想，食老毋成樣。」這馬無工夫嘛免煩惱，若肯食苦，去職業訓練班受訓學技術，就免驚見食老歹過日。
俗語說：「年輕時思慮不周，等到老了生活堪憂。」現在沒專長也不用煩惱，只要肯吃苦，去職業訓練班受訓學技術，就不怕老來日子不好過。
Sio̍k-gí kóng, “Siàu-liân bē-hiáu siūnn, tsia̍h-lāu m̄-tsiânn-iūnn.” Tsit-má bô kang-hu mā bián huân-ló, nā khíng tsia̍h-khóo, khì tsit-gia̍p hùn-liān-pan siū-hùn o̍h ki-su̍t, tō bián kiann-kìnn tsia̍h-lāu pháinn kuè-ji̍t.
-
厝邊的老阿伯定定怨嘆家己「少年袂曉想，食老毋成樣」，生活無好過，嘛無通予囝兒序細一个好模樣。
鄰居的老伯伯常常感嘆自己「年輕時沒規劃，年老了吃苦頭」，生活不好過，也沒給兒孫一個好榜樣。
Tshù-pinn ê lāu-a-peh tiānn-tiānn uàn-thàn ka-kī “siàu-liân bē-hiáu siūnn, tsia̍h-lāu m̄-tsiânn-iūnn”, sing-ua̍h bô hó-kuè, mā bô thang hōo kiánn-jî sī-sè tsi̍t ê hó bôo-iūnn.
-
俗語講：「心歹無人知，喙歹上厲害。」佮人講話，好也一句，歹也一句，歹話莫出喙，較無代誌。
俗話說：「心地不好沒人知道，口出惡言最嚴重。」跟人交談，好話也一句，壞話也一句，壞話不要出口，比較不會惹來事端。
Sio̍k-gí kóng, “Sim pháinn bô lâng tsai, tshuì pháinn siōng lī-hāi.” Kah lâng kóng-uē, hó iā tsi̍t kù, pháinn iā tsi̍t kù, pháinn-uē mài tshut-tshuì, khah bô tāi-tsì.
-
毋管你是刁持的抑是咧滾耍笑，人講「心歹無人知，喙歹上厲害」，你講話遐刺鑿，人聽著會無歡喜。
不管你是故意的還是在開玩笑，人家說「心地不好沒人知道，口出惡言最嚴重」，你說話那麼刺耳，別人聽了會不高興。
M̄-kuán lí sī tiau-tî--ê ia̍h-sī teh kún-sńg-tshiò, lâng kóng “sim pháinn bô lâng tsai, tshuì pháinn siōng lī-hāi”, lí kóng-uē hiah tshì-tsha̍k, lâng thiann tio̍h ē bô huann-hí.
-
俗語講：「手曲，屈入無屈出。」厝裡的人若佮外口的人冤家，咱攏是為厝裡的人較濟。
俗話說：「胳臂向內彎，不會向外彎。」家裡的人要是跟外頭的人吵架，我們大都是袒護家裡的人。
Sio̍k-gí kóng, “Tshiú-khiau, khut-ji̍p bô khut-tshut.” Tshù--lí ê lâng nā kah guā-kháu ê lâng uan-ke, lán lóng sī uī tshù--lí ê lâng khah tsē.
-
這件代誌若甲雙爿攏有毋著，是講「手曲，屈入無屈出」，閣較按怎嘛無彼號先替外人講話的道理。
這件事情既然雙方都有錯，但是「胳臂向內彎，不會向外彎」，再怎麼樣也沒有先替外人說話的道理。
Tsit kiānn tāi-tsì nā-kah siang-pîng lóng ū m̄-tio̍h, sī-kóng “tshiú-khiau, khut-ji̍p bô khut-tshut”, koh-khah án-tsuánn mā bô hit-lō sing thè guā-lâng kóng-uē ê tō-lí.
-
阿明講𪜶囝暗時攏愛伊抱咧睏，有夠忝的，聽𪜶爸母講伊細漢嘛真歹育飼，這馬真正是「手抱孩兒，才知爸母時」。
小明說他兒子晚上都要他抱著睡覺，真夠累的，聽他父母說他小時候也不好帶，現在真的是「有了孩子，才知道當父母不易」。
A-bîng kóng in kiánn àm-sî lóng ài i phō leh khùn, ū-kàu thiám--ê, thiann in pē-bú kóng i sè-hàn mā tsin pháinn io-tshī, tsit-má tsin-tsiànn sī “tshiú phō hâi-jî, tsiah tsai pē-bú sî”.
-
拄著無公平的代誌，著愛即時反映，毋通「日頭赤焱焱，隨人顧性命」，予無辜的人受害。
遇到不公平的事情，就要立刻反映，別只自顧著想要「明哲保身」，讓無辜的人受害。
Tú-tio̍h bô kong-pênn ê tāi-tsì, tio̍h-ài tsik-sî huán-ìng, m̄-thang “ji̍t-thâu tshiah-iānn-iānn, suî-lâng kòo sènn-miā”, hōo bû-koo ê lâng siū-hāi.
-
伊欠人的錢無還，閣罵債主來討錢害伊無面子；家己不孝閣有一大堆理由，嫌爸母雜唸，怨爸母無好好仔栽培，真正是「欠錢怨債主，不孝怨爸母」。
他欠別人錢沒還，還罵債主來討債害他沒面子；自己不孝還有一大篇理由，嫌爸母嘮叨，怨父母沒好好栽培，真是「欠錢怨債主，不孝怨父母」。
I khiàm--lâng ê tsînn bô hîng, koh mē tsè-tsú lâi thó-tsînn hāi i bô bīn-tsú; ka-kī put-hàu koh ū tsi̍t-tuā-tui lí-iû, hiâm pē-bú tsa̍p-liām, uàn pē-bú bô hó-hó-á tsai-puê, tsin-tsiànn sī “khiàm tsînn uàn tsè-tsú, put-hàu uàn pē-bú”.
-
有一句話講「欠錢怨債主，不孝怨爸母」，有的人炒股票，股票落價，逐日都咧罵政府，有人就共伊加一句「股票跋輸怨政府」。
有一句話說「欠錢怨債主，不孝怨父母」，有的人炒股票，股票慘跌，天天罵政府，有人就加了一句「股票慘跌怨政府」。
Ū tsi̍t kù uē kóng “khiàm tsînn uàn tsè-tsú, put-hàu uàn pē-bú”, ū ê lâng tshá-kóo-phiò, kóo-phiò lo̍h-kè, ta̍k-ji̍t to teh mē tsìng-hú, ū lâng tō kā i ke tsi̍t kù “kóo-phiò pua̍h-su uàn tsìng-hú”.
-
你毋通遐厚話，一支喙講袂煞，你無聽人講：「歹瓜厚子，歹人厚言語。」
你別這麼愛說話，一張嘴巴說個不停，你沒聽人家說：「壞瓜籽多，壞人話多。」
Lí m̄-thang hiah kāu-uē, tsi̍t ki tshuì kóng bē suah, lí bô thiann lâng kóng, “Pháinn kue kāu tsí, pháinn-lâng kāu giân-gí.”
-
伊閣咧講人的歹話矣，𪜶老母就罵伊「歹瓜厚子，歹人厚言語」，伊就按呢恬去。
他又在說別人的壞話了，他媽媽罵他「壞瓜籽多，壞人話多」，他就閉嘴了。
I koh teh kóng lâng ê pháinn-uē--ah, in lāu-bú tō mē i “pháinn kue kāu tsí, pháinn-lâng kāu giân-gí”, i tsiū-án-ne tiām--khì.
-
鱸鰻老爸竟然出一个狀元囝，彼个醫生的後生煞顛倒遮浪蕩，有影是「歹竹出好筍，好竹出痀崙」。
流氓父親竟然養出了一個會讀書的小孩，那個醫生的小孩反倒如此地放蕩不羈，果真是「老鴰窩裡出鳳凰」。
Lôo-muâ lāu-pē kìng-jiân tshut tsi̍t ê tsiōng-guân kiánn, hit ê i-sing ê hāu-senn suah tian-tò tsiah lōng-tōng, ū-iánn sī “pháinn tik tshut hó sún, hó tik tshut ku-lún”.
-
阿明𪜶老爸自少年到今攏按呢欲食毋討趁，阿明煞顛倒真骨力作穡，趁錢養飼規家口仔，就像人所講的「歹竹出好筍」。
小明他老爸從年輕到現在都這樣好逸惡勞，小明反倒是很努力工作，賺錢養活全家人，就像人家所說的「犁生騂角」。
A-bîng in lāu-pē tsū siàu-liân kàu-tann lóng án-ne beh tsia̍h m̄ thó-thàn, A-bîng suah tian-tò tsin kut-la̍t tsoh-sit, thàn-tsînn ióng-tshī kui-ke-kháu-á, tō tshiūnn lâng sóo kóng--ê “pháinn tik tshut hó sún”.
-
人講：「歹船拄著好港路。」這擺代誌做了順序，不過是一時的好運，咱著愛繼續培養實力，才有法度久久長長，應付各種的挑戰。
人家說：「破舊的船遇到好的航路」，這不過是一時的時運亨通，我們得繼續培養實力，才有辦法長長久久，應付各種挑戰。
Lâng kóng, “Pháinn tsûn tú-tio̍h hó káng-lōo.” Tsit pái tāi-tsì tsò liáu sūn-sī, put-kò sī tsi̍t-sî ê hó-ūn, lán tio̍h-ài kè-sio̍k puê-ióng si̍t-li̍k, tsiah ū-huat-tōo kú-kú-tn̂g-tn̂g, ìng-hù kok-tsióng ê thiáu-tsiàn.
教材來源
教育部臺灣台語常用詞辭典（來源網站）
授權：CC BY-ND 3.0 臺灣（姓名標示－禁止改作）
教育部（2023）。臺灣台語常用詞辭典（臺灣學術網路第二版）。https://sutian.moe.edu.tw/