第 15 階 第 7 課 俗諺語（7／17）
-
咱做人愛有主見、有正義感，若干焦會曉「西瓜倚大爿」，早慢會予人看無目地。
我們為人要有主見、有正義感，要是只會「趨炎附勢」，早晚會被人瞧不起。
Lán tsò-lâng ài ū tsú-kiàn, ū tsìng-gī-kám, nā kan-na ē-hiáu “si-kue uá tuā-pîng”, tsá-bān ē hōo lâng khuànn bô ba̍k-tē.
-
俗語講：「囡仔人有耳無喙。」大人若咧講話，囡仔人較毋捌芳臭，上好莫烏白插喙，較無代誌。
俗話說：「小孩子有耳朵沒嘴巴。」大人如果在交談，小孩子比較不知好歹，最好別亂插嘴，比較沒事。
Sio̍k-gí kóng, “Gín-á-lâng ū-hīnn-bô-tshuì.” Tuā-lâng nā teh kóng-uē, gín-á-lâng khah m̄ bat phang-tshàu, siōng-hó mài oo-pe̍h tshap-tshuì, khah bô tāi-tsì.
-
古早人驚見囡仔講毋著話會顧人怨，才會講「囡仔人有耳無喙」，這馬的人顛倒會鼓勵囡仔愛勇敢表達家己的想法。
以前的人擔心小孩說錯話會惹人厭，才會說「小孩子有耳朵沒嘴巴」，現代人反而鼓勵小孩要勇於表達自己的想法。
Kóo-tsá-lâng kiann-kìnn gín-á kóng m̄-tio̍h uē ē kòo-lâng-uàn, tsiah ē kóng “gín-á-lâng ū-hīnn-bô-tshuì”, tsit-má ê lâng tian-tò ē kóo-lē gín-á ài ióng-kám piáu-ta̍t ka-kī ê siūnn-huat.
-
這个歹心烏漉肚的生理人，為著欲省本，原料都過期矣，閣共伊摻落去做，嘛毋驚人食了會各樣袂，正經是「別人的囝死袂了」。
這個心腸惡毒的商人，為了要節省成本，原料都過期了，還加進去製作，也不怕人家吃了會不會有異狀，真的是「別人的小孩死不完」。
Tsit ê pháinn-sim oo-lok-tōo ê sing-lí-lâng, uī-tio̍h beh síng-pún, guân-liāu to kuè-kî--ah, koh kā i tsham lo̍h-khì tsò, mā m̄ kiann lâng tsia̍h-liáu ē koh-iūnn--bē, tsìng-king sī “pa̍t-lâng ê kiánn sí bē liáu”.
-
便若拄著嫁娶的時，咱定定會聽著媒人婆講「坐予正，得人疼」的好話來祝福新人。
每當嫁娶的時候，我們總會聽到媒人婆說「坐姿端正，才能使人疼愛」的吉祥話來祝福新人。
Piān-nā tú-tio̍h kè-tshuā ê sî, lán tiānn-tiānn ē thiann-tio̍h muê-lâng-pô kóng “tsē hōo tsiànn, tit lâng thiànn” ê hó-uē lâi tsiok-hok sin-lâng.
-
老師上課定教阮講「坐予正，得人疼」，是希望學生囡仔佇教室上課愛坐予四正，若無，會予人歹印象。
老師上課常常教我們「坐端正，使人疼」，是希望學生在教室上課能坐姿端正，否則，會給人家不好的印象。
Lāu-su siōng-khò tiānn kà guán kóng “tsē hōo tsiànn, tit lâng thiànn”, sī hi-bāng ha̍k-sing gín-á tī kàu-sik siōng-khò ài tsē hōo sì-tsiànn, nā-bô, ē hōo lâng pháinn ìn-siōng.
-
做生理加減會拄著漚客，俗語講：「忍氣求財，激氣相刣。」咱對待人客總是毋通激面腔抑是歹聲嗽。
做生意多少會遇到惡客，俗話說：「和氣生財，生氣招災。」我們對待客人無論如何不能擺臉色或是口氣不好。
Tsò-sing-lí ke-kiám ē tú-tio̍h àu-kheh, sio̍k-gí kóng, “Lún-khì kiû tsâi, kik-khì sio-thâi.” Lán tuì-thāi lâng-kheh tsóng--sī m̄-thang kik-bīn-tshiunn ia̍h-sī pháinn-siann-sàu.
-
阿明攏袂堪得人講得，見若講著伊的毋著，伊就「見笑轉受氣」，實在誠害！
阿明很不能接受批評，每次說到他的不對，他就「惱羞成怒」，真是糟糕！
A-bîng lóng bē-kham-tit lâng kóng--tit, kiàn-nā kóng-tio̍h i ê m̄-tio̍h, i tō “kiàn-siàu tńg siū-khì”, si̍t-tsāi tsiânn hāi!
-
伊講袂贏人就「見笑轉受氣」，開始烏白罵人。
他辯不過別人便「惱羞成怒」，開始胡亂罵人。
I kóng bē iânn--lâng tō “kiàn-siàu tńg siū-khì”, khai-sí oo-pe̍h mē--lâng.
-
彼个生理人足厚譴損，不時走去彼間廟求看生理有通較順序咧無，煞毋知「尪姨順話尾，假童害眾人」，內底專是假包的童乩，予𪜶諞真濟錢去。
那位生意人很迷信，常常跑去那間廟宇祈求生意能不能順遂一些，卻不曉得「靈媒會順著對方的心意說話，假冒之乩童故意裝神弄鬼來欺騙人」，裡面全是假的乩童，被他們騙走很多錢。
Hit ê sing-lí-lâng tsiok kāu-khiàn-sńg, put-sî tsáu-khì hit king biō kiû khuànn sing-lí ū thang khah sūn-sī--leh--bô, suah m̄ tsai “ang-î sūn uē-bué, ké tâng hāi tsìng-lâng”, lāi-té tsuan sī ké-pâu ê tâng-ki, hōo in pián tsin tsē tsînn--khì.
-
學務主任為著欲「刣雞教猴」，就共偷走學的學生叫起去司令台教示予眾人看。
學務主任為了要「殺雞儆猴」，就把翹課的學生叫去司令台當眾訓示。
Ha̍k-bū tsú-jīm uī-tio̍h beh “thâi-ke-kà-kâu”, tō kā thau-tsáu-o̍h ê ha̍k-sing kiò khí-khì su-līng-tâi kà-sī hōo tsìng-lâng khuànn.
-
阮兜巷仔口彼擔臭豆腐，食過的人攏「呵咾甲會觸舌」。
我家巷口的那攤臭豆腐，吃過的人都「讚美有加」。
Guán tau hāng-á-kháu hit tànn tshàu-tāu-hū, tsia̍h--kuè ê lâng lóng “o-ló kah ē tak-tsi̍h”.
-
現此時國內外的經濟誠䆀，股市一直落，若欲向股票閣起價，袂輸是「和尚頭掠蝨母」，誠僫咧。
現在國內外的經濟不好，股市跌個不停，若要期盼股票再漲起來，就如同「在和尚的頭上抓蝨子一樣」，很困難呢。
Hiān-tshú-sî kok-lāi-guā ê king-tsè tsiânn bái, kóo-tshī it-ti̍t lo̍h, nā beh ǹg kóo-phiò koh khí-kè, bē-su sī “huê-siūnn thâu lia̍h sat-bó”, tsiânn oh--leh.
-
現現都伊先出手的，今煞「拍人喝救人」，偷偷仔走去共老師投。
分明是他先動手的，現在卻「惡人先告狀」，偷偷跑去向老師告狀。
Hiān-hiān to i sing tshut-tshiú--ê, tann suah “phah lâng huah-kiù-lâng”, thau-thau-á tsáu-khì kā lāu-su tâu.
-
人講：「拍虎掠賊也著親兄弟。」咱甲有緣做親兄弟矣，同齊拍拚、互相鼓勵，定著會度過這个難關。
人家說：「手足之情最為可靠。」我們既然有緣當親兄弟了，一起打拼、互相鼓勵，一定能度過這個難關。
Lâng kóng, “Phah hóo lia̍h tsha̍t iā tio̍h tshin hiann-tī.” Lán kah ū-iân tsò tshin hiann-tī--ah, tâng-tsê phah-piànn, hōo-siong kóo-lē, tiānn-tio̍h ē tōo-kuè tsit ê lân-kuan.
-
無人愛失敗，毋過失敗的經驗會予咱得著教訓、揣出成功的方法，人定定咧講「拍斷手骨顛倒勇」，就是這个意思。
沒有人喜歡失敗，不過失敗的經驗能讓我們得到教訓、找出成功的方法,人們常說「愈挫愈勇」，就是這個意思。
Bô lâng ài sit-pāi, m̄-koh sit-pāi ê king-giām ē hōo lán tit-tio̍h kàu-hùn, tshuē-tshut sîng-kong ê hong-huat, lâng tiānn-tiānn teh kóng “phah-tn̄g tshiú-kut tian-tò ióng”, tō sī tsit ê ì-sù.
-
食頭路人中年失業，真歹揣著新頭路，有的人「拍斷手骨顛倒勇」，改行做小生理，家己做頭家，免驚見予人刣頭。
上班族中年失業，很難找到新工作，有些人「愈挫愈勇」，改行做小生意，自己當老闆，不怕被別人裁員。
Tsia̍h-thâu-lōo-lâng tiong-liân sit-gia̍p, tsin pháinn tshuē-tio̍h sin thâu-lōo, ū ê lâng “phah-tn̄g tshiú-kut tian-tò ióng”, kái-hâng tsò sió-sing-lí, ka-kī tsò thâu-ke, bián kiann-kìnn hōo lâng thâi-thâu.
-
伊逐暗攏走甲無看著人，閣凊彩應講下暗欲共咱鬥相共，我看伊是咧「放屁安狗心」爾爾，咱毋通向望伊。
他每晚都不見人影，還隨便回說今晚要幫忙我們，我看他只是「敷衍我們」而已，我們不該指望他。
I ta̍k-àm lóng tsáu kah bô khuànn-tio̍h lâng, koh tshìn-tshái ìn kóng e-àm beh kā lán tàu-sann-kāng, guá khuànn i sī teh “pàng-phuì an káu sim” niā-niā, lán m̄-thang ǹg-bāng--i.
-
你不時佮人應酬，閣定定講「杯底毋通飼金魚」，按呢久來，身體哪會堪得？
你時常與人應酬，又常常說「要爽快乾杯」，這樣久而久之，身體哪受得了？
Lí put-sî kah lâng ìng-siû, koh tiānn-tiānn kóng “pue-té m̄-thang tshī kim-hî”, án-ne kú--lâi, sin-thé ná ē-kham--tit?
-
爸母疼囝是天性，自然無時停睏，序細有孝爸母是教出來的責任，較加嘛有時有陣，俗語毋才講：「爸母疼囝長流水，囝疼爸母樹尾風。」
父母疼愛子女是出於天性，自然是無時停歇，子女孝順父母是教育出來的責任，難怪時有時無，所以俗話說：「父母疼子長流水，子孝父母樹梢風。」
Pē-bú thiànn kiánn sī thian-sìng, tsū-jiân bô-sî thîng-khùn, sī-sè iú-hàu pē-bú sī kà--tshut-lâi ê tsik-jīm, khah-ke mā ū-sî-ū-tsūn, sio̍k-gí m̄-tsiah kóng, “Pē-bú thiànn kiánn tn̂g lâu-tsuí, kiánn thiànn pē-bú tshiū-bué hong.”
-
雖然出世的家庭有好額散的差別，毋過人講：「狗無嫌主人散。」爸母栽培囡仔的心血攏是仝款的，毋但袂使嫌，閣較愛寶惜。
雖然出生的家庭有貧富不同的家境，不過有道是「狗不會嫌棄主人貧窮」，父母栽培孩子的心血都是一樣的，不但不可以嫌棄，還更要珍惜。
Sui-jiân tshut-sì ê ka-tîng ū hó-gia̍h-sàn ê tsha-pia̍t, m̄-koh lâng kóng, “Káu bô hiâm tsú-lâng sàn.” Pē-bú tsai-puê gín-á ê sim-hiat lóng sī kāng-khuán--ê, m̄-nā bē-sái hiâm, koh-khah ài pó-sioh.
-
伊這陣手扭著，無才調去工地做粗重的，就允一寡較輕可的穡頭轉來厝裡做，「罔趁較袂散」，嘛較贏規工佇厝裡閒仙仙。
他現在手扭到，沒法到工地做粗重的工作，便承接一些比較輕鬆的工作回來家裡做，「多少賺一點」，也勝過於成天在家無所事事。
I tsit-tsūn tshiú láu--tio̍h, bô tsâi-tiāu khì kang-tē tsò tshoo-tāng--ê, tō ín tsi̍t-kuá khah khin-khó ê sit-thâu tńg-lâi tshù--lí tsò, “bóng thàn khah bē sàn”, mā khah iânn kui-kang tī tshù--lí îng-sian-sian.
-
人生的路途起起落落，俗語講：「花無百日紅，人無千日好。」咱人好空的時毋通傷風神，歹空的時嘛莫餒志，按呢才是健康的生活態度。
人生之路總是起起伏伏，俗話說：「花無百日紅，人無千日好。」我們處順境時不要太得意，處逆境時也不要氣餒，這樣才是健康的生活態度。
Jîn-sing ê lōo-tôo khí-khí-lo̍h-lo̍h, sio̍k-gí kóng, “Hue bô pah ji̍t âng, lâng bô tshian ji̍t hó.” Lán-lâng hó-khang ê sî m̄-thang siunn hong-sîn, pháinn-khang ê sî mā mài lué-tsì, án-ne tsiah-sī kiān-khong ê sing-ua̍h thāi-tōo.
-
做外交的，若是業績好，升官加薪一直來，毋過「花無百日紅，人無千日好」，若拄著時機䆀，業績無好，就愛趁機會學習、成長，才袂予人叫轉去食家己。
跑業務的，如果業績好，升官加薪一直來，不過「花無百日紅，人無千日好」，要是遇到景氣差，業績不好的時候，就要趁機會學習、成長，才不會被炒魷魚。
Tsò guā-kau--ê, nā-sī gia̍p-tsik hó, sing-kuann ka-sin it-ti̍t lâi, m̄-koh “hue bô pah ji̍t âng, lâng bô tshian ji̍t hó”, nā tú-tio̍h sî-ki bái, gia̍p-tsik bô hó, tō ài thàn ki-huē ha̍k-si̍p, sîng-tióng, tsiah bē hōo lâng kiò tńg-khì tsia̍h-ka-kī.
-
你毋通靠勢有倩老師來厝裡共你教，你就會用得凊凊彩彩，人講：「近山剉無柴，近溪擔無水。」若無認真拍拚，時到你的成績猶是袂進步。
你不可以仗著聘了老師來家裡教你，你就可以隨隨便便，人們說：「靠近山卻砍不到柴，靠近溪邊卻挑不到水。」如果不認真努力，到時你的成績依舊不會進步。
Lí m̄-thang khò-sè ū tshiànn lāu-su lâi tshù--lí kā lí kà, lí tō ē-īng-tit tshìn-tshìn-tshái-tshái, lâng kóng, “Kīn suann tshò bô tshâ, kīn khe tann bô tsuí.” Nā bô jīn-tsin phah-piànn, sî kàu lí ê sîng-tsik iáu-sī bē tsìn-pōo.
-
阿明仔蹛佇學校附近，定定都睏到欲上課矣才欲起來，結果人蹛較遠的攏到學校矣，伊煞不時攏較晏到，莫怪人咧講「近山剉無柴，近溪擔無水。」
小明住在學校附近，常常都睡到快上課了才起床，結果住比較遠的人都到學校了，他卻時常遲到，難怪人家說「靠近山卻砍不到柴，靠近溪邊卻挑不到水。」
A-bîng--á tuà tī ha̍k-hāu hù-kīn, tiānn-tiānn to khùn kàu beh siōng-khò--ah tsiah beh khí--lâi, kiat-kó lâng tuà khah hn̄g--ê lóng kàu ha̍k-hāu--ah, i suah put-sî lóng khah uànn kàu, bo̍k-kuài lâng teh kóng “kīn suann tshò bô tshâ, kīn khe tann bô tsuí.”
-
俗語講：「近水知魚性，近山識鳥音。」伊都自細漢綴𪜶爸母佇紡織廠做工課，這陣毋才會對織布這方面的工課遮爾熟手。
俗話說：「近水知魚性，近山識鳥音。」他從小就跟他的父母在紡織廠工作，現在他才會對織布這方面的工作如此熟練。
Sio̍k-gí kóng, “Kīn suí ti gû sìng, kīn san sik niáu im.” I to tsū sè-hàn tuè in pē-bú tī pháng-tsit-tshiúnn tsò khang-khuè, tsit-tsūn m̄-tsiah ē tuì tsit-pòo tsit hong-bīn ê khang-khuè tsiah-nī si̍k-tshiú.
-
阮遮山跤一間廟，不時有人對足遠的所在來咧拜，顛倒阮遮的人攏毋捌去共拜，這就是人講的「近廟欺神」。
我們這裡山腳下有一間廟，經常有人從很遠的地方來拜拜，反而我們這裡的人沒去拜過，這就是人家說的「離廟近不在乎神」。
Guán tsia suann-kha tsi̍t king biō, put-sî ū lâng tuì tsiok hn̄g ê sóo-tsāi lâi teh pài, tian-tó guán tsia ê lâng lóng m̄ bat khì kā pài, tse tō sī lâng kóng--ê “kīn biō khi sîn”.
-
大厝宅的囝孫仔有無仝款的面腔，有人是「涼傘雖破，骨格原在」，使人尊重；有人是賣田賣厝，予人講閒仔話。
大戶人家的後代子孫有不一樣的面貌，有人是「家道中落，遺風不墜」，受人尊重；有人是敗光祖產，受人議論。
Tuā tshù-the̍h ê kiánn-sun-á ū bô kāng-khuán ê bīn-tshiunn, ū lâng sī “niû-suànn sui phuà, kut-keh guân-tsāi”, sú lâng tsun-tiōng; ū lâng sī bē tshân bē tshù, hōo lâng kóng îng-á-uē.
-
外媽𪜶厝是有六龍的大厝起，三十年前因為大路欲楦闊，護龍予人削兩龍去，外埕開做大車路。總是「涼傘雖破，骨格原在」，入去厝內猶原看會著較早的氣派。
外婆家是有三對廂房的大宅第，三十年前因為道路要拓寬，廂房被拆掉兩排，外庭院闢成大馬路。不過「外觀被毀，氣派猶存」，進去屋裡仍可看到從前的氣派。
Guā-má in tshù sī ū la̍k lîng ê tuā-tshù-khí, sann-tsa̍p nî tsîng in-uī tuā-lōo beh hùn-khuah, hōo-lîng hōo lâng siah nn̄g lîng--khì, guā-tiânn khui-tsò tuā tshia-lōo. Tsóng--sī “niû-suànn sui phuà, kut-keh guân-tsāi”, ji̍p-khì tshù-lāi iu-guân khuànn ē tio̍h khah-tsá ê khì-phài.
-
分家伙的時陣抽著無水田，伊也認命接受，啥人知影後來都市計畫路開到遐，伊的田變更做建地，有影是像人講的：「青盲貓咬著死鳥鼠。」
分財產時抽到旱田，他也認命接受，誰知道後來都市計畫路開到那裡，他的田地變更成建地，真是像人家說的：「瞎貓碰到死老鼠。」
Pun ke-hué ê sî-tsūn thiu-tio̍h bô-tsuí-tshân, i iā jīn-miā tsiap-siū, siánn-lâng tsai-iánn āu--lâi too-tshī kè-uē lōo khui kàu hia, i ê tshân piàn-king tsò kiàn-tē, ū-iánn sī tshiūnn lâng kóng--ê, “Tshenn-mê niau kā-tio̍h sí niáu-tshí.”
-
百貨公司定會佇年尾拍折大俗賣，俗語講：「俗物食破家。」咱毋通貪著物件俗就拚性命買，若無，時到家伙會去了了。
百貨公司常會在年底打折大拍賣，俗語說：「貪小便宜反敗家。」我們不要貪求東西便宜就拚命買，否則，到時財產會完蛋。
Pah-huè kong-si tiānn ē tī nî-bué phah-tsiat tuā-sio̍k-bē, sio̍k-gí kóng, “Sio̍k-mi̍h tsia̍h phuà ke.” Lán m̄-thang tham-tio̍h mi̍h-kiānn sio̍k tō piànn-sènn-miā bé, nā-bô, sî kàu ke-hué ē khì-liáu-liáu.
-
人咧講：「俗物無好貨。」你猶是閣加比較幾間仔按呢較實在啦。
人家說：「便宜沒好貨。」你還是貨比三家這樣比較實在啦。
Lâng teh kóng, “Sio̍k-mi̍h bô hó huè.” Lí iáu-sī koh ke pí-kàu--kuí-king-á án-ne khah si̍t-tsāi--lah.
-
伊真有才情，煞予人怨妒，重要的工課攏無伊的份，俗語講：「勇勇馬縛佇將軍柱。」才會一直袂當出頭。
他很有才幹，卻受人嫉妒，重要的工作都沒他的份，俗語說：「健壯的馬綁在將軍柱上。」才會一直無法出人頭地。
I tsin ū tsâi-tsîng, suah hōo lâng uàn-tòo, tiōng-iàu ê khang-khuè lóng bô i ê hūn, sio̍k-gí kóng, “Ióng-ióng bé pa̍k tī tsiong-kun-thiāu.” Tsiah ē it-ti̍t bē-tàng tshut-thâu.
-
你莫看伊規工恬恬，對人攏誠客氣，「會咬人的狗袂吠」，我捌予伊揲甲走無路通去。
你別看他安安靜靜，待人很客氣，｢會咬人的狗不叫」，我曾被他整得無路可跑。
Lí mài khuànn i kui-kang tiām-tiām, tuì lâng lóng tsiânn kheh-khì, “ē kā--lâng ê káu bē puī”, guá bat hōo i tia̍p kah tsáu bô-lōo thang khì.
-
免驚伊放刁欲對你不利，伊是咧烏白吠爾爾，你無聽人咧講：「會咬人的狗袂吠。」
別擔心他威脅對你不利，他只是在胡言亂語而已，你沒聽人說過：「會咬人的狗不叫。」
Bián kiann i pàng-tiau beh tuì lí put-lī, i sī teh oo-pe̍h puī niā-niā, lí bô thiann lâng teh kóng, “Ē kā--lâng ê káu bē puī.”
教材來源
教育部臺灣台語常用詞辭典（來源網站）
授權：CC BY-ND 3.0 臺灣（姓名標示－禁止改作）
教育部（2023）。臺灣台語常用詞辭典（臺灣學術網路第二版）。https://sutian.moe.edu.tw/