第 15 階 第 10 課 俗諺語（10／17）
-
你毋通掠準共人詐騙好賺食，「痟貪軁雞籠」，早慢會予警察㨑去。
你別以為詐騙別人錢賺得快，「貪婪換牢飯」，早晚會被警察逮捕。
Lí m̄-thang lia̍h-tsún kā lâng tsà-phiàn hó tsuán-tsia̍h, “siáu-tham nǹg ke-lam”, tsá-bān ē hōo kíng-tshat tsang--khì.
-
里長伯仔誠熱心，見擺若欲替里民調解糾紛，伊攏會佇厝裡攢酒菜，叫雙方坐落來沓沓仔講。里長姆仔怨嘆講這真正是「做公親，貼本」，月俸都無夠納遮的開銷咧。
里長伯很熱心，每次為了要替里民調解糾紛，他都會在家裡準備酒菜，叫雙方坐下來好好溝通。里長太太哀怨的說「這真的是賠了夫人又折兵」，里長的月薪根本不夠支付這些費用呢。
Lí-tiúnn peh--á tsiânn jia̍t-sim, kiàn-pái nā beh thè lí-bîn tiâu-kái kiù-hun, i lóng ē tī tshù--lí tshuân tsiú-tshài, kiò siang-hong tsē lo̍h-lâi ta̍uh-ta̍uh-á kóng. Lí-tiúnn ḿ--á uàn-thàn kóng tse tsin-tsiànn sī “tsò kong-tshin, thiap pún”, gue̍h-hōng to bô-kàu la̍p tsia-ê khai-siau--leh.
-
伊食頭路年外，公司就倒去，老爸閣破病蹛院，面對遮爾濟變故，只好安慰家己「做牛著拖，做人著磨」，接受考驗，人生會有另外一種懸度。
他工作一年多，公司就倒閉，父親又生病住院，面對這麼多變故，只好安慰自己「當牛就要拖犁，當人就要承受磨難」，接受考驗，人生會有另一種高度。
I tsia̍h-thâu-lōo nî-guā, kong-si tō tó--khì, lāu-pē koh phuà-pēnn tuà-īnn, bīn-tuì tsiah-nī tsē piàn-kòo, tsí-hó an-uì ka-kī “tsò gû tio̍h thua, tsò lâng tio̍h buâ”, tsiap-siū khó-giām, jîn-sing ē ū līng-guā tsi̍t tsióng kuân-tōo.
-
有的人做官真清廉，過身了後，𪜶家屬的生活猶原困苦。莫怪人咧講：「做官若清廉，食飯著攪鹽。」
有些人當官很清廉，過世之後，家屬的生活依然很困苦。難怪人家說：「當官若清廉，吃飯得拌鹽。」
Ū ê lâng tsò-kuann tsin tshing-liâm, kuè-sin liáu-āu, in ka-sio̍k ê sing-ua̍h iu-guân khùn-khóo. Bo̍k-kuài lâng teh kóng, “Tsò-kuann nā tshing-liâm, tsia̍h-pn̄g tio̍h kiáu iâm.”
-
定定共伊交關生理，這改煞予伊騙足濟錢去，真正是像人講的，「做官騙厝內，做生理騙熟似」。
常常跟他買東西照顧他的生意，這次竟被他騙走了不少錢，真的是像人家說的，「當官的矇騙家人，做生意的欺騙熟人」。
Tiānn-tiānn kā i kau-kuan sing-lí, tsit kái suah hōo i phiàn tsiok tsē tsînn khì, tsin-tsiànn sī tshiūnn lâng kóng--ê, “tsò-kuann phiàn tshù-lāi, tsò-sing-lí phiàn si̍k-sāi”.
-
雖然俗語講：「做官騙厝內，做生理騙熟似。」毋過咱相信世間上嘛有足濟好官、真濟老實可靠的生理人。
雖然俗話說：「當官的矇騙家人，做生意的欺騙熟人」，我們相信世界上也有很多好官、很多老實可靠的生意人。
Sui-jiân sio̍k-gí kóng, “Tsò-kuann phiàn tshù-lāi, tsò-sing-lí phiàn si̍k-sāi.” M̄-koh lán siong-sìn sè-kan-siōng mā ū tsiok tsē hó kuann, tsin tsē láu-si̍t khó-khò ê sing-lí-lâng.
-
人講：「做著歹田望下冬，娶著歹某一世人。」選對象目睭著擘予金，才袂一世人艱苦罪過。
人們說：「莊稼不照只一季，娶妻不照是一世。」選擇對象要睜大眼睛，才不會一輩子過得非常痛苦難過。
Lâng kóng, “Tsò-tio̍h pháinn tshân bāng ē tang, tshuā-tio̍h pháinn bóo tsi̍t-sì-lâng.” Suán tuì-siōng ba̍k-tsiu tio̍h peh hōo kim, tsiah bē tsi̍t-sì-lâng kan-khóo-tsē-kuà.
-
政治人物佇電視頂冤甲目降鬚聳，雙方佇鏡頭的尻川後早就閣你兄我弟矣，網路頂的支持者煞猶原吵甲袂收山，真正是「做戲的欲煞，看戲的毋煞」。
政治人物在電視上吵得怒目相視，雙方在鏡頭後早就又稱兄道弟了，網路上的支持者卻仍吵得不可開交，真的是「演戲的要結束，看戲的卻不罷休。
Tsìng-tī jîn-bu̍t tī tiān-sī-tíng uan kah ba̍k-kàng-tshiu-tshàng, siang-hong tī kiànn-thâu ê kha-tshng-āu tsá tō koh lí-hiann-guá-tī--ah, bāng-lōo-tíng ê tsi-tshî-tsiá suah iu-guân tshá kah bē-siu-suann, tsin-tsiànn sī “tsò-hì--ê beh suah, khuànn-hì--ê m̄ suah”.
-
做代誌毋通生狂，欲按怎做較好，想予清楚才開始進行，因為「張持無蝕本」。
做事情不要慌張，怎麼做比較好，想清楚再開始進行，因為凡事「謹慎小心不會吃虧」。
Tsò tāi-tsì m̄-thang tshenn-kông, beh án-tsuánn tsò khah hó, siūnn hōo tshing-tshó tsiah khai-sí tsìn-hîng, in-uī “tiunn-tî bô si̍h-pún”.
-
叫你莫佮厝主相嚷，你干干仔欲，這馬厝主的店面無愛租你，這聲「得失土地公，飼無雞」矣乎。
叫你不要和房東爭吵，你偏要，現在房東店面不租給你，這下子「得罪地主，生意做不下去」了吧。
Kiò lí mài kah tshù-tsú sio-jiáng, lí kan-kan-á beh, tsit-má tshù-tsú ê tiàm-bīn bô ài tsoo--lí, tsit-siann “tik-sit Thóo-tī-kong, tshī bô ke”--ah--honnh.
-
咱這个單位的主管上愛人扶挺，你拄來遮上好佮伊小盤撋一下，人咧講：「得失土地公，飼無雞。」若無，伊袂予你遐好食睏。
我們這個單位的主管很喜歡他人奉承，你剛到這裡最好稍微去交際招呼一下，俗語說：「得罪上司，恐將吃不完兜著走。」要不然，他不會讓你有好日子過。
Lán tsit ê tan-uī ê tsú-kuán siōng ài lâng phôo-thánn, lí tú lâi tsia siōng-hó kah i sió puânn-nuá--tsi̍t-ē, lâng teh kóng, “Tik-sit Thóo-tī-kong, tshī bô ke.” Nā-bô, i bē hōo lí hiah hó-tsia̍h-khùn.
-
阿火叔「惜花連盆，疼囝連孫」，毋但惜查某囝，嘛足疼外孫。
阿火叔「愛屋及烏」，不但疼愛女兒，也很疼愛外孫。
A-hué tsik “sioh hue liân phûn, thiànn kiánn liân sun”, m̄-nā sioh tsa-bóo-kiánn, mā tsiok thiànn guā-sun.
-
阮阿媽從阿爸佮阿叔做囡仔的時陣就足疼𪜶，這馬嘛真惜阮兄妹仔佮阮叔伯兄弟，莫怪人講：「惜花連盆，疼囝連孫。」
我的奶奶從爸爸和叔叔在孩提時就很疼愛他們，現在也很疼惜我們兄妹和我的堂兄弟，難怪俗話說：「愛屋及烏。」
Guán a-má tsîng a-pah kah a-tsik tsò gín-á ê sî-tsūn tō tsiok thiànn--in, tsit-má mā tsin sioh guán hiann-muē-á kah guán tsik-peh-hiann-tī, bo̍k-kuài lâng kóng, “Sioh hue liân phûn, thiànn kiánn liân sun.”
-
教囝除了處罰，嘛愛予𪜶知影是佗位毋著，愛按怎改進，若干焦拍干焦罵，頭先會驚，久來就像人講的「捷罵袂聽，捷拍袂疼」，愈來愈不受教。
管教孩子除了處罰，也要讓他知道哪裡不對，要如何改進，若一味打罵，起先會怕，後來就像人家說的「常罵不聽話，常打不怕痛」，愈來愈不受教。
Kà kiánn tû-liáu tshú-hua̍t, mā ài hōo in tsai-iánn sī tó-uī m̄-tio̍h, ài án-tsuánn kái-tsìn, nā kan-na phah kan-na mē, thâu-sing ē kiann, kú--lâi tō tshiūnn lâng kóng--ê “tsia̍p mē bē thiann, tsia̍p phah bē thiànn”, jú lâi jú put-siū-kàu.
-
阿爸常在共小妹講「掃地掃壁角，洗面洗耳空」，做工課毋通含糊，毋通用準的就予過。
爸爸常常提醒小妹說「掃地要注意牆角清潔，洗臉也要洗耳朵周圍」，做事情不能馬虎，不要將就應付了事。
A-pah tshiâng-tsāi kā sió-muē kóng “sàu-tè sàu piah-kak, sé-bīn sé hīnn-khang”, tsò khang-khuè m̄-thang hâm-hôo, m̄-thang iōng tsún--ê tō hōo kuè.
-
糞埽車來矣，阿母叫明仔去摒糞埽，伊煞講伊咧寫功課，阿母氣甲那逐糞埽車那唸：「教豬教狗，不如家己走。」
垃圾車來了，媽媽叫阿明去倒垃圾，他卻說他在寫功課，媽媽氣得一邊追垃圾車一邊唸：「支使豬支使狗，不如自己跑。」
Pùn-sò-tshia lâi--ah, a-bú kiò Bîng--á khì piànn pùn-sò, i suah kóng i teh siá kong-khò, a-bú khì kah ná jiok pùn-sò-tshia ná liām, “Kà ti kà káu, put-jû ka-kī tsáu.”
-
俗語講：「欲好額等後世，欲做官學做戲。」人猶是實實在在較好。
俗語說：「想富有等下輩子，想當官就去學做戲。」人還是要腳踏實地，實實在在比較好。
Sio̍k-gí kóng, “Beh hó-gia̍h tán āu-sì, beh tsò-kuann o̍h tsò-hì.” Lâng iáu-sī si̍t-si̍t-tsāi-tsāi khah hó.
-
阿明共退休金攏提去炒股票，想欲一睏仔就好額，到尾煞倒了錢，莫怪俗語講：「欲好額等後世，欲做官學做戲」。
阿明把退休金都拿去炒股票，想要一下子就變富有，最後卻反而賠錢，難怪俗語說：「人要腳踏實地，勿好高騖遠」。
A-bîng kā thè-hiu-kim lóng the̍h-khì tshá-kóo-phiò, siūnn-beh tsi̍t-khùn-á tō hó-gia̍h, kàu-bué suah tò liáu-tsînn, bo̍k-kuài sio̍k-gí kóng, “Beh hó-gia̍h tán āu-sì, beh tsò-kuann o̍h tsò-hì”.
-
俗語講：「清明無轉厝，無祖；過年無轉厝，無某。」就算你這陣佇外位稅的厝離爸母的厝不止仔遠，過年過節嘛愛轉去。
俗諺說：「清明節不回家祭祖掃墓，會背負背祖忘本之名；而過年不回家的出外人，可能是無家庭觀念或是沒妻小的人。」就算你現在在外頭租的屋子離父母家很遠，逢年過節都得回去。
Sio̍k-gí kóng, “Tshing-bîng bô tńg tshù, bô tsóo; kuè-nî bô tńg tshù, bô bóo.” Tō-sǹg lí tsit-tsūn tī guā-uī suè ê tshù lī pē-bú ê tshù put-tsí-á hn̄g, kuè-nî-kuè-tseh mā ài tńg--khì.
-
人講：「牽尪姨，順話尾。」𪜶會照咱想欲知的代誌來應話，參考就好，毋通傷過相信。
人家說：「靈媒答問，會順人心意說話。」他們會順著我們想知道的事情來答話，參考就好，不要過於相信。
Lâng kóng, “Khan ang-î, sūn uē-bué.” In ē tsiàu lán siūnn-beh tsai ê tāi-tsì lâi ìn-uē, tsham-khó tō hó, m̄-thang siunn kuè siong-sìn.
-
咱若去算命，有的相命仙的就會「牽尪姨，順話尾」，予咱叫是伊算了足準的。
如果我們去算命，有的算命先生就如「靈媒答問，會順人心意說話」，讓我們以為他算得很準。
Lán nā khì sǹg-miā, ū ê siòng-miā-sian--ê tō ē “khan ang-î, sūn uē-bué”, hōo lán kiò-sī i sǹg liáu tsiok tsún--ê.
-
業務員佮客戶相交陪，愛有「牽尪姨，順話尾」的本事，予客戶感覺你足了解伊、關心伊，伊就會信任你。
業務員和客戶往來，要有「靈媒答問，會順人心意說話」的本事，讓客戶覺得你很了解他、關心他，他就會信任你。
Gia̍p-bū-uân kah kheh-hōo sio-kau-puê, ài ū “khan ang-î, sūn uē-bué” ê pún-sū, hōo kheh-hōo kám-kak lí tsiok liáu-kái--i, kuan-sim--i, i tō ē sìn-jīm--lí.
-
喙齒若有蛀空愛緊予醫生坉起來，若無，到尾仔愛抽神經就真正是「細空毋補，大空叫苦」。
牙齒要是蛀了就要趕緊找醫生填補，要不然，到最後必須做根管治療就真的是「小洞不補，大洞叫苦」。
Tshuì-khí nā ū tsiù-khang ài kín hōo i-sing thūn--khí-lâi, nā-bô, kàu bué--á ài thiu sîn-king tō tsin-tsiànn sī “sè khang m̄ póo, tuā khang kiò-khóo”.
-
咱做代誌拄頭仔若有發見毋著，就愛佇猶未造成重大傷害進前趕緊修正，才袂「細空毋補，大空叫苦」。
我們做事情如在一開始有發現小問題，就要在未發生重大傷害之前及時修正，才不會「造成難以彌補的遺憾」。
Lán tsò tāi-tsì tú-thâu-á nā ū huat-kiàn m̄-tio̍h, tō ài tī iáu-buē tsō-sîng tiōng-tāi siong-hāi tsìn-tsîng kuánn-kín siu-tsìng, tsiah bē “sè khang m̄ póo, tuā khang kiò-khóo”.
-
囡仔自細漢著愛好好仔共教示，若無「細漢偷挽匏，大漢偷牽牛」，聽候伊大漢犯嚴重的錯誤才欲來教，就已經袂赴矣。
小孩子從小就要好好地教育他，要不然「小時候偷摘匏瓜，長大偷牽牛隻」，等到他長大犯了嚴重錯誤再來教育他，就為時已晚了。
Gín-á tsū sè-hàn tio̍h-ài hó-hó-á kā kà-sī, nā-bô “sè-hàn thau bán pû, tuā-hàn thau khan gû”, thìng-hāu i tuā-hàn huān giâm-tiōng ê tshò-gōo tsiah beh lâi kà, tō í-king bē-hù--ah.
-
爸母為囝是自然天性，莫怪人講：「細漢煩惱伊袂大，大漢煩惱伊未娶。」毋過序細早慢愛為𪜶家己的人生負責，做人序大愛學會曉放手。
父母為小孩著想是自然天性，難怪人家說：「小時候煩惱他長不大，長大了煩惱他不結婚」，不過孩子早晚要為他們自己的人生負責，為人父母也要學會放手。
Pē-bú uī kiánn sī tsū-jiân thian-sìng, bo̍k-kuài lâng kóng, “Sè-hàn huân-ló i bē tuā, tuā-hàn huân-ló i buē tshuā.” M̄-koh sī-sè tsá-bān ài uī in ka-kī ê jîn-sing hū-tsik, tsò lâng sī-tuā ài o̍h ē-hiáu pàng-tshiú.
-
伊自細漢讀冊就受著親情幫贊，想袂到佇美國畢業了後，連親情過身嘛毋轉來，人講「船過水無痕」，伊實在真無惜情。
他從小讀書就受到親戚的贊助，想不到在美國畢業之後，就連親戚過世也不肯回來，人家說「船過水無痕」，他真是很不珍惜親情。
I tsū sè-hàn tha̍k-tsheh tō siū-tio̍h tshin-tsiânn pang-tsān, siūnn-bē-kàu tī Bí-kok pit-gia̍p liáu-āu, liân tshin-tsiânn kuè-sin mā m̄ tńg--lâi, lâng kóng “tsûn kuè tsuí bô hûn”, i si̍t-tsāi tsin bô sioh-tsîng.
-
這條溪逐年都駐死幾若个人，政府規定遮袂使耍水，毋過攏無人咧插，隔無幾冬，代誌就「船過水無痕」，耍水的人猶原插插插。
這條溪每年都溺死好幾個人，政府規定這裡不能戲水，不過都沒人理會，過沒幾年，事情就「船過水無痕」，戲水的人仍然滿坑滿谷。
Tsit tiâu khe ta̍k-nî to tū-sí kuí-nā ê lâng, tsìng-hú kui-tīng tsia bē-sái sńg tsuí, m̄-koh lóng bô lâng teh tshap, keh bô kuí tang, tāi-tsì tō “tsûn kuè tsuí bô hûn”, sńg tsuí ê lâng iu-guân tshah-tshah-tshah.
-
無要緊啦，這間公司考無牢，咱來去別間考看覓咧，人講：「這溪無魚，別溪釣。」
沒關係啦，這家公司沒考上，我們到別家考考看，人家說：「山不轉，路轉。」
Bô iàu-kín--lah, tsit king kong-si khó bô tiâu, lán lâi-khì pa̍t king khó khuànn-māi--leh, lâng kóng, “tsit khe bô hî, pa̍t khe tiò.”
-
伊這个人恬恬仔毋過真奸巧，聽講心肝閣不止仔惡毒，俗語講：「陰鴆陰鴆，咬人三寸深。」你若誠實欲招伊合股做生理，千萬著愛細膩呢！
他這個人安安靜靜但陰險狡猾，聽說心腸還非常壞，俗話說：「平時不動聲色，一旦發狠咬人，就會咬得很深，毫不留情。」你若真的想邀他合夥做生意，千萬要小心啊！
I tsit ê lâng tiām-tiām--á m̄-koh tsin kan-khiáu, thiann-kóng sim-kuann koh put-tsí-á ok-to̍k, sio̍k-gí kóng, “Im-thim-im-thim, kā lâng sann tshùn tshim.” Lí nā tsiânn-si̍t beh tsio i ha̍p-kóo tsò-sing-lí, tshian-bān tio̍h-ài sè-jī--neh!
-
你拄開始上班，階層較低，人講你就愛聽，毋通袂記得「頂司管下司，鋤頭管畚箕」。
你剛開始上班，階層比較低，人家說的你就要聽，不要忘記「社會有階層，一層管一層」。
Lí tú-khai-sí siōng-pan, kai-tsân khah kē, lâng kóng lí tō ài thiann, m̄-thang bē-kì-tit “tíng-si kuán ē-si, tî-thâu kuán pùn-ki”.
-
阮屏東的烏甕串通講是「頂港有名聲，下港上出名」，食過的人攏呵咾甲會觸舌。
我們屏東的黑鮪魚可說是「由北至南，遠近馳名」，吃過的人都讚不絕口。
Guán Pîn-tong ê oo-àng-tshǹg thang kóng sī “tíng-káng ū miâ-siann, ē-káng siōng tshut-miâ”, tsia̍h--kuè ê lâng lóng o-ló kah ē tak-tsi̍h.
-
有兩个人佇路邊為著欲搶停車位咧冤家，邊仔的人逐个都「徛懸山，看馬相踢」，無一觸久仔煞開始咧窒車矣！
有兩個人在路邊為了搶停車位正在爭吵，旁邊每個人都「事不關己看好戲」，沒多久就開始塞車了！
Ū nn̄g ê lâng tī lōo-pinn uī-tio̍h beh tshiúnn thîng-tshia-uī teh uan-ke, pinn--á ê lâng ta̍k ê to “khiā kuân suann, khuànn bé sio-that”, bô tsi̍t-tak-kú-á suah khai-sí teh that-tshia--ah!
-
朋友若咧起衝突的時，咱毋通干焦「徛懸山，看馬相踢」，上好出面做公親來鬥排解，通予代誌好收煞。
朋友如果起衝突的時候，我們不要只是「冷眼旁觀、置身事外」，最好出面當和事佬來幫忙調解，好讓事情收場。
Pîng-iú nā teh khí tshiong-tu̍t ê sî, lán m̄-thang kan-na “khiā kuân suann, khuànn bé sio-that”, siōng-hó tshut-bīn tsò kong-tshin lâi tàu pâi-kái, thang hōo tāi-tsì hó siu-suah.
-
阿龍上興食腥臊的，磕袂著就魚魚肉肉，閣再毋是薟就是重鹹，攏無咧撙節的，結局「喙食，予尻川坐數。」這馬人咧喝艱苦矣。
阿龍最愛吃大餐，動不動就又是魚又是肉，兼且不是辣就是鹹等等的重口味，從不節制，結果「貪圖味覺享受而亂吃，拉肚子時受苦的卻是屁股。」現在身體受不了。
A-liông siōng hìng tsia̍h tshenn-tshau--ê, kha̍p-bē-tio̍h tō hî-hî-bah-bah, koh-tsài m̄ sī hiam tō sī tāng-kiâm, lóng bô teh tsún-tsat--ê, kiat-kio̍k “tshuì tsia̍h, hōo kha-tshng tshē-siàu.” Tsit-má lâng teh huah kan-khóo--ah.
-
後禮拜都欲考試矣，這禮拜的歇睏日你猶是莫出去𨑨迌會較穩當，才袂時到「喙食，予尻川坐數」。
下禮拜就要考試了，這周的假日你還是別出去玩會比較妥當，才不會到時「貪圖一時的好處，自己得承受後果」。
Āu lé-pài to beh khó-tshì--ah, tsit lé-pài ê hioh-khùn-ji̍t lí iáu-sī mài tshut-khì tshit-thô ē khah ún-tàng, tsiah bē sî kàu “tshuì tsia̍h, hōo kha-tshng tshē-siàu”.
教材來源
教育部臺灣台語常用詞辭典（來源網站）
授權：CC BY-ND 3.0 臺灣（姓名標示－禁止改作）
教育部（2023）。臺灣台語常用詞辭典（臺灣學術網路第二版）。https://sutian.moe.edu.tw/