第 15 階 第 12 課 俗諺語（12／17）
-
明明是伊毋著閣敢佮人大細聲，我佇邊仔看甲「痚呴袂忍得嗽」，就開喙佮伊理論。
明明是他不對還敢跟別人大小聲，我在旁邊看得「忍無可忍」，就開口跟他理論。
Bîng-bîng sī i m̄-tio̍h koh kánn kah lâng tuā-sè-siann, guá tī pinn--á khuànn kah “he-ku bē lún tit sàu”, tō khui-tshuì kah i lí-lūn.
-
雖然阿美𪜶翁矮閣大箍，學歷嘛並阿美較低，毋過伊猶是真愛𪜶翁，因為「媠䆀無比止，愛著較慘死」。
雖然小美的丈夫長得又矮又胖，學歷也比小美低，但他仍然非常愛他先生，因為「情人眼裡出西施」。
Sui-jiân A-bí in ang é koh tuā-khoo, ha̍k-li̍k mā phīng A-bí khah kē, m̄-koh i iáu-sī tsin ài in ang, in-uī “suí-bái bô pí tsí, ài--tio̍h khah tshám sí”.
-
「圓人會扁，扁人會圓」，啥人知影到尾會按怎咧？
「世事本無常」，有誰知道結局是好是壞呢？
“Înn--lâng ē pínn, pínn--lâng ē înn”, siánn-lâng tsai-iánn kàu-bué ē án-tsuánn--leh?
-
珠仔欲嫁進前，𪜶老母共伊講：「『嫁雞綴雞飛，嫁狗綴狗走。』毋管嫁了好抑䆀，一定愛佮恁翁做伙拍拚。」
小珠要嫁之前，他媽媽跟他說：「『嫁雞隨雞，嫁狗隨狗。』不管嫁的好或壞，一定要跟你先生一起努力。」
Tsu--á beh kè tsìn-tsîng, in lāu-bú kā i kóng, “‘Kè ke tuè ke pue, kè káu tuè káu tsáu.’ M̄-kuán kè liáu hó ia̍h bái, it-tīng ài kah lín ang tsò-hué phah-piànn.”
-
人客若欲買物件，加減仔都會嫌東嫌西，毋過俗語咧講：「嫌貨才是買貨人。」咱著愛耐心聽人客講，提無仝的產品予人客揀，生理才做會成。
俗話說：「嫌貨才是買貨人。」客人如果要買東西，或多或少會嫌東嫌西，我們就要耐心聽客人說話，拿不同的產品給客人挑，生意才做得成。
Lâng-kheh nā beh bé mi̍h-kiānn, ke-kiám-á to ē hiâm-tang-hiâm-sai, m̄-koh sio̍k-gí teh kóng, “Hiâm huè tsiah-sī bé huè lâng.” Lán tio̍h-ài nāi-sim thiann lâng-kheh kóng, the̍h bô kāng ê sán-phín hōo lâng-kheh kíng, sing-lí tsiah tsò ē sîng.
-
俗語講：「愛拚才會贏。」佇景氣無好的時陣，著愛毋驚艱苦，堅持理想、跤踏實地，成功的機會就占較大面。
俗話說：「要努力才會贏。」在景氣低迷的時候，必須不怕辛苦，堅持理想、腳踏實地，成功的機會就會比較大。
Sio̍k-gí kóng, “Ài piànn tsiah ē iânn.” Tī kíng-khì bô hó ê sî-tsūn, tio̍h-ài m̄ kiann kan-khóo, kian-tshî lí-sióng, kha-ta̍h-si̍t-tē, sîng-kong ê ki-huē tō tsiàm khah-tuā-bīn.
-
人講：「愛媠毋驚流鼻水。」天氣遮爾冷，伊仝款穿遐少，攏毋驚會寒著。
所謂：「愛美不怕流鼻水。」天氣這麼冷，他照樣穿得那麼少，都不怕受涼了。
Lâng kóng, “Ài-suí m̄ kiann lâu phīnn-tsuí.” Thinn-khì tsiah-nī líng, i kāng-khuán tshīng hiah tsió, lóng m̄ kiann ē kuânn--tio̍h.
-
共你講「惹熊惹虎，毋通惹著刺查某」，你都毋聽，敢去共彼个頭家娘唱聲，這擺知死矣乎？
跟你說過「千萬別招惹兇悍的女人」，你就不聽勸，敢去跟那個老闆娘挑釁，這下知道嚴重性了吧？
Kā lí kóng “jiá hîm jiá hóo, m̄-thang jiá-tio̍h tshiah-tsa-bóo”, lí to m̄ thiann, kánn khì kā hit ê thâu-ke-niû tshiàng-siann, tsit pái tsai-sí--ah--honnh?
-
保健的雜誌推薦「暗頓減食一口，活甲九十九」，閣講若逐工攏出去運動一下，對身體閣較好。
保健的雜誌推薦「晚餐少吃一口，活到九十九」，又說如果每天出去運動一下，對身體更好。
Pó-kiān ê tsa̍p-tsì thui-tsiàn “àm-tǹg kiám tsia̍h tsi̍t kháu, ua̍h kah káu-tsa̍p-káu”, koh kóng nā ta̍k-kang lóng tshut-khì ūn-tōng--tsi̍t-ē, tuì sin-thé koh-khah hó.
-
現時社會尊重個人，就算是爸囝嘛有無仝款的想法，人講「會生得囝身，袂生得囝心」，爸囝無仝宗教、無仝政黨，嘛應該互相尊重。
現代社會尊重個人，就算是父子也有不一樣的想法，人們說「能夠生出孩子的身體，卻不能夠生出孩子的心思」，父子不同宗教、不同政黨，也應該要互相尊重。
Hiān-sî siā-huē tsun-tiōng kò-jîn, tō-sǹg sī pē-kiánn mā ū bô kāng-khuán ê siūnn-huat, lâng kóng “ē-senn-tit kiánn sin, bē-senn-tit kiánn sim”, pē-kiánn bô kāng tsong-kàu, bô kāng tsìng-tóng, mā ing-kai hōo-siong tsun-tiōng.
-
爸母教育序細是一件誠艱難的工課，「會生得囝身，袂生得囝心」，有的囡仔不受教，甚至忤逆爸母，予𪜶氣甲毋知欲怎樣才好。
父母教育子女是一件很艱難的工作，「能夠生出孩子的身體，卻不能夠生出孩子的心思」，有些孩子不受教，甚至忤逆父母，讓他們氣得不知如何是好。
Pē-bú kàu-io̍k sī-sè sī tsi̍t kiānn tsiânn kan-lân ê khang-khuè, “ē-senn-tit kiánn sin, bē-senn-tit kiánn sim”, ū ê gín-á put-siū-kàu, sīm-tsì ngóo-gi̍k pē-bú, hōo in khì kah m̄ tsai beh tsuánn-iūnn tsiah hó.
-
啥人毋捌失敗過？人講：「會跋才會大。」做毋著去共當做經驗，毋才捎會著做工課的鋩角，嘛才會愈做愈熟手。
誰沒有失敗過？人家說：「跌過跤才長得大。」做錯了把它當做經驗，才能掌握到工作的訣竅，也才會越做越順手。
Siánn-lâng m̄ bat sit-pāi--kuè? Lâng kóng, “Ē pua̍h tsiah ē tuā.” Tsò m̄-tio̍h--khì kā tòng-tsò king-giām, m̄-tsiah sa ē tio̍h tsò khang-khuè ê mê-kak, mā tsiah ē jú tsò jú si̍k-tshiú.
-
癮頭！你這號做「會曉偷食，袂曉拭喙」，不時提彼張偷拆的圖出來看，這馬逐家攏知影彼本冊是你拆破的矣。
傻瓜！你這叫「偷吃卻不知道該擦嘴」，老是拿那張偷撕的圖出來看，現在大家全都知道那本書是你撕破的了。
Giàn-thâu! Lí tse hō-tsò “ē-hiáu thau tsia̍h, bē-hiáu tshit tshuì”, put-sî the̍h hit tiunn thau thiah ê tôo tshut-lâi khuànn, tsit-má ta̍k-ke lóng tsai-iánn hit pún tsheh sī lí thiah--phuà--ê--ah.
-
做生理，面對人客，「溜溜瞅瞅，食兩蕊目睭」，愛知影變竅，予人客滿意，生理才做會交易。
做生意，面對顧客，「要會察言觀色」，隨機應變，讓顧客滿意，生意才能做得興旺。
Tsò-sing-lí, bīn-tuì lâng-kheh, “liu-liu-tshiu-tshiu, tsia̍h nn̄g luí ba̍k-tsiu”, ài tsai-iánn piàn-khiàu, hōo lâng-kheh muá-ì, sing-lí tsiah tsò ē ka-ia̍h.
-
少年人拄出業，毋管食頭路抑是家己做頭家，「萬事起頭難」，愛沓沓仔來，堅持落去，做會久才有成功的機會。
年輕人剛畢業，上班或是自己創業，「萬事起頭難」，要慢慢來，堅持下去，做得久才有成功的機會。
Siàu-liân-lâng tú tshut-gia̍p, m̄-kuán tsia̍h-thâu-lōo ia̍h-sī ka-kī tsò thâu-ke, “bān-sū khí-thâu lân”, ài ta̍uh-ta̍uh-á lâi, kian-tshî--lo̍h-khì, tsò ē kú tsiah ū sîng-kong ê ki-huē.
-
非洲真濟國家因為飢荒，百姓枵飢失頓，真濟囡仔攏「腹肚若水櫃，胸坎若樓梯」，予人真毋甘。
非洲很多國家因為飢荒，人民三餐不繼，很多兒童都「骨瘦如柴，卻又挺個大肚子」，讓人很不捨。
Hui-tsiu tsin tsē kok-ka in-uī ki-hng, peh-sènn iau-ki-sit-tǹg, tsin tsē gín-á lóng “pak-tóo ná tsuí-kuī, hing-khám ná lâu-thui”, hōo lâng tsin m̄-kam.
-
伊自細漢就帶身命，「腹肚做藥櫥」，食藥仔會使講是閬時無閬日。
他從小就帶有慢性疾病，「肚子當藥罐」，吃藥可謂無日無之。
I tsū sè-hàn tō tài-sin-miā, “pak-tóo tsò io̍h-tû”, tsia̍h io̍h-á ē-sái kóng sī làng-sî bô làng-ji̍t.
-
較早的人相信「落塗時八字命」，想講命運是出世的時就註好好的。現代人愛知影前途愛靠家己創造，若肯拍拚就會成功。
以前的人相信「出生的時辰就決定一個人的命運」，認為命運是出生的時候就註定好的。現代的人要曉得前途得靠自己創造，如果肯努力就會成功。
Khah-tsá ê lâng siong-sìn “lo̍h-thôo sî peh-jī miā”, siūnn-kóng miā-ūn sī tshut-sì ê sî tō tsù hó-hó--ê. Hiān-tāi lâng ài tsai-iánn tsiân-tôo ài khò ka-kī tshòng-tsō, nā khíng phah-piànn tō ē sîng-kong.
-
咱臺灣人是命運共同體，毋通規工冤家、對立，因為「落水平平沉，全無重頭輕」。
我們臺灣人是命運共同體，不要整天吵架、對立，否則「兩敗俱傷，誰也沒佔到便宜」。
Lán Tâi-uân-lâng sī miā-ūn kiōng-tông-thé, m̄-thang kui-kang uan-ke, tuì-li̍p, in-uī “lo̍h tsuí pênn-pênn tîm, tsuân bô tāng-thâu-khin”.
-
朋友相請，哪著大魚大肉，人講「誠意食水甜」，路邊擔仔就足好食。
朋友請客，何必要大魚大肉，人家說「有誠意喝水都甜」，路邊攤就很好吃。
Pîng-iú sio-tshiánn, ná-tio̍h tuā hî tuā bah, lâng kóng “sîng-ì tsia̍h tsuí tinn”, lōo-pinn-tànn-á tō tsiok hó-tsia̍h.
-
朋友若來相揣，心情歡喜閣熱情共伊招待，白滾水來相請嘛無要緊，人咧講「誠意食水甜」，毋免歹勢。
朋友如果來訪，心裡高興又熱忱的招待他，用白開水待客也不要緊，人家說「有誠意喝水都甜」，不用不好意思。
Pîng-iú nā lâi sio-tshuē, sim-tsîng huann-hí koh jia̍t-tsîng kā i tsiau-thāi, pe̍h-kún-tsuí lâi sio-tshiánn mā bô iàu-kín, lâng teh kóng “sîng-ì tsia̍h tsuí tinn”, m̄-bián pháinn-sè.
-
你若欲開店賣手機仔，著愛綴會著科技咧發展的速度，毋通「過時賣曆日」，去賣以早彼種無網路功能的，這馬真罕得看著有人咧用矣。
你如果想開店販售手機，就得追上科技發展的速度，不要「賣過期的日曆」，賣以前那種沒有網路功能的手機，現在很少看到有人使用了。
Lí nā beh khui-tiàm bē tshiú-ki-á, tio̍h-ài tuè ē tio̍h kho-ki teh huat-tián ê sok-tōo, m̄-thang “kuè-sî bē la̍h-ji̍t”, khì bē í-tsá hit tsióng bô bāng-lōo kong-lîng--ê, tsit-má tsin hán-tit khuànn-tio̍h ū lâng teh īng--ah.
-
這个時代需要新思維，老沿的袂使老古板，一直用「過橋較濟你行路，食鹽較濟你食米」的態度，來教示少年人。
這個時代需要新的思維，老一輩的不可以食古不化，一直用「倚老賣老」的心態，來教訓年輕人。)
Tsit ê sî-tāi su-iàu sin su-uî, lāu-iân--ê bē-sái lāu-kóo-pán, it-ti̍t iōng “kuè kiô khah tsē lí kiânn-lōo, tsia̍h iâm khah tsē lí tsia̍h bí” ê thāi-tōo, lâi kà-sī siàu-liân-lâng.
-
人講：「隔壁親家，禮數原在。」雖然欲娶的新娘蹛佇厝邊，對𤆬路雞到大禮車，一項都袂省得。
人家說：「隔壁親家，禮數仍舊一樣。」雖然要娶的新娘就住在附近，從帶路雞到大禮車，一樣都不能少。
Lâng kóng, “Keh-piah tshin-ke, lé-sòo guân-tsāi.” Sui-jiân beh tshuā ê sin-niû tuà tī tshù-pinn, tuì tshuā-lōo-ke kàu tuā lé-tshia, tsi̍t hāng to bē-síng--tit.
-
「隔壁親家，禮數原在」，按呢會予人佮人的關係較親切嘛較搭粒。
即使是住在隔壁的親家，必要的禮節還是要遵守，這樣會使得人跟人的關係更親切也更緊密。
“Keh-piah tshin-ke, lé-sòo guân-tsāi”, án-ne ē hōo lâng kah lâng ê kuan-hē khah tshin-tshiat mā khah tah-lia̍p.
-
做人著愛有孝才有底，千萬毋通「飼囝無論飯，飼爸母算頓」，飼囝飼甲肥朒朒，飼爸母飼甲賰一支骨。
為人要懂得盡孝才是根本之道，千萬不要「養兒不計成本，奉養父母卻斤斤計較」，把兒女養得胖嘟嘟的，卻讓父母餓得瘦巴巴的。
Tsò-lâng tio̍h-ài iú-hàu tsiah ū-té, tshian-bān m̄-thang “tshī kiánn bô-lūn pn̄g, tshī pē-bú sǹg tǹg”, tshī kiánn tshī kah puî-tsut-tsut, tshī pē-bú tshī kah tshun tsi̍t ki kut.
-
阿義仔這个人傷過奸巧，毋通予伊入來咱公司上班，若無，是會「飼鳥鼠，咬布袋」。
阿義這個人過於奸險，不能讓他到我們公司上班，否則，會「養虎貽患」的。
A-gī--á tsit ê lâng siunn kuè kan-khiáu, m̄-thang hōo i ji̍p-lâi lán kong-si siōng-pan, nā-bô, sī ē “tshī niáu-tshí, kā pòo-tē”.
-
愈有學問愈有才情的人，若像人講的「飽穗的稻仔，頭犁犁」，會予人愈尊敬。
越有學問與能力的人，就像是人家說的「飽滿而成熟的稻穗，頭向下」，會更受人尊敬。
Jú ū ha̍k-būn jú ū tsâi-tsîng ê lâng, ná-tshiūnn lâng kóng--ê “pá-suī ê tiū-á, thâu-lê-lê”, ē hōo lâng jú tsun-kìng.
-
你無聽人講「骨力食栗，貧惰吞瀾」呢？若肯做就毋驚無通食，上驚的是欲食毋討趁，可能就愛看人食穿矣。
你沒聽人家說「勤奮耕耘，就會有好的食物，而懶惰者就只能吞口水」嗎？只要肯做就不怕沒東西吃，最怕的是只想吃卻不去工作賺錢，可能就得倚靠他人生活了。
Lí bô thiann lâng kóng “kut-la̍t tsia̍h la̍t, pîn-tuānn thun nuā”--nih? Nā khíng tsò tō m̄ kiann bô thang tsia̍h, siōng kiann--ê sī beh tsia̍h m̄ thó-thàn, khó-lîng tō ài khuànn lâng tsia̍h-tshīng--ah.
-
伊串都用共人騙咧賺食，閣展講按呢攏免本，毋過「僥倖錢，失德了；冤枉錢，跋輸筊」，緊慢伊會知悽慘。
他靠著詐騙賺錢，還跟人炫耀這樣都不花成本，不過「不義之財，怎麼來就怎麼去」，他早晚會嘗到苦頭。
I tshuàn to īng kā lâng phiàn teh tsuán-tsia̍h, koh tián kóng án-ne lóng bián pún, m̄-koh “hiau-hīng-tsînn, sit-tik liáu; uan-óng-tsînn, pua̍h-su kiáu”, kín-bān i ē tsai tshi-tshám.
-
叫伊做一點仔代誌，就若「慢牛厚屎尿」，𠢕拖沙閣連鞭頭殼疼、連鞭腹肚疼。
叫他做一點小事，就像「行動遲緩的牛屎尿多」，拖拖拉拉又一下子頭痛、一下子肚子痛。
Kiò i tsò tsi̍t-tiám-á tāi-tsì, tō ná “bān gû kāu-sái-jiō”, gâu thua-sua koh liâm-mi thâu-khak thiànn, liâm-mi pak-tóo thiànn.
-
「疑人，毋成賊」，若無證據通做干證，就袂當烏白賴人。
「不能只因懷疑，便將人當賊」，如果沒有證據可以證明，就不能隨意誣賴他人。
“Gî lâng, m̄ tsiânn tsha̍t”, nā bô tsìng-kì thang tsò kan-tsìng, tō bē-tàng oo-pe̍h luā--lâng.
-
人講：「疑人，毋成賊。」佳哉警方有共代誌調查予伊清楚，才無冤枉著好人。
所謂：「懷疑他人，焉能把人當賊。」幸虧警方把事情調查清楚，才沒有冤枉到好人。
Lâng kóng, “Gî lâng, m̄ tsiânn tsha̍t.” Ka-tsài kíng-hong ū kā tāi-tsì tiâu-tsa hōo i tshing-tshó, tsiah bô uan-óng-tio̍h hó-lâng.
-
莫想遐濟啦！咱「盡人事，順天意」，到底會按怎就交予天公伯仔安排矣。
別想那麼多啦！我們「盡人事，聽天命」，結果如何就交由老天爺安排了。
Mài siūnn hiah tsē--lah! Lán “tsīn jîn-sū, sūn thinn-ì”, tàu-té ē án-tsuánn tō kau hōo thinn-kong-peh--á an-pâi--ah.
-
公司的錢水雄雄轉踅袂過來，因端淡薄仔複雜，古早人講：「緊行無好步。」欲解決問題，千萬毋通傷過趕狂，愛三思而後行。
公司的資金突然周轉不過來，原因略微複雜，古人說：「欲速則不達。」要解決問題，千萬不可太過慌張，須三思而後行。
Kong-si ê tsînn-tsuí hiông-hiông tńg-se̍h bē kuè--lâi, in-tuann tām-po̍h-á ho̍k-tsa̍p, kóo-tsá-lâng kóng, “Kín kiânn bô hó pōo.” Beh kái-kuat būn-tê, tshian-bān m̄-thang siunn kuè kuánn-kông, ài sàm-su jî hiō hîng.
-
咱拄著代誌，上好是緊事寬辦，才袂重耽，愛知「緊紡無好紗，緊嫁無好大家」。
當我們遇到事情，最好能夠沉著應對，才不會出錯，須知「事緩則圓，欲速則不達」。
Lán tú-tio̍h tāi-tsì, siōng hó sī kín-sū-khuann-pān, tsiah bē tîng-tânn, ài tsai “kín pháng bô hó se, kín kè bô hó ta-ke”.
教材來源
教育部臺灣台語常用詞辭典（來源網站）
授權：CC BY-ND 3.0 臺灣（姓名標示－禁止改作）
教育部（2023）。臺灣台語常用詞辭典（臺灣學術網路第二版）。https://sutian.moe.edu.tw/