第 15 階 第 14 課 俗諺語（14／17）
-
彼个人客䆀閣厚屎，見擺來攏欲賒數，就像人咧講的「䆀猴𠢕欠數」。
那個客人長得醜又愛挑剔，每次來都要賒帳，就像人家說的「醜人愛賒帳」。
Hit ê lâng-kheh bái koh kāu-sái, kiàn-pái lâi lóng beh sia-siàu, tō tshiūnn lâng teh kóng--ê “bái-kâu gâu khiàm-siàu”.
-
伊拄入去公司就搪著「舊囚食新囚」，逐項代誌老鳥都欲共伊食死死，無欲予伊有機會通出頭。
他剛進去公司就遭遇「老鳥欺負新鳥」，每件事情老鳥都要吃定他，不讓他有出頭的機會。
I tú ji̍p-khì kong-si tō tn̄g-tio̍h “kū siû tsia̍h sin siû”, ta̍k hāng tāi-tsì lāu-tsiáu to beh kā i tsia̍h-sí-sí, bô beh hōo i ū ki-huē thang tshut-thâu.
-
頭家定定一支喙踅踅唸，毋過「雜唸大家出蠻皮新婦」，久來下跤手人攏麻痺去矣，無咧共伊信篤。
老闆一張嘴常常念個不停，但「有嘮叨的上司，就會有不聽話的部屬」，久了底下的員工都麻木了，也不把他當一回事。
Thâu-ke tiānn-tiānn tsi̍t ki tshuì se̍h-se̍h-liām, m̄-koh “tsa̍p-liām ta-ke tshut bân-phuê sin-pū”, kú--lâi ē-kha-tshiú-lâng lóng bâ-pì--khì--ah, bô teh kā i sìn-táu.
-
伊少年的時袂曉想，無了解爸母的苦心，閣定定共𪜶夯硬篙，等到伊做人爸母矣，才體會著「雙手抱孩兒，才知爸母時」的道理。
他年少輕狂，不了解父母的苦心，還常常跟他們唱反調，直到他當父母了，才體會到「養兒方知父母恩」的道理。
I siàu-liân ê sî bē-hiáu siūnn, bô liáu-kái pē-bú ê khóo-sim, koh tiānn-tiānn kā in giâ-ngē-ko, tán-kàu i tsò lâng pē-bú--ah, tsiah thé-huē-tio̍h “siang-tshiú phō hâi-jî, tsiah tsai pē-bú sî” ê tō-lí.
-
俗語講：「雙个旋，惡甲無人問。」阮小弟雖然雙个旋，毋過伊性地好，閣真有人緣，共這款無科學根據的古早話當做笑談就好。
俗話說：「兩個髮旋的人，兇惡到沒人聞問。」我弟弟雖然有兩個髮旋，但他脾氣好，還很有人緣，把這種無科學依據的俗語視為有趣的笑話就好。
Sio̍k-gí kóng, “Siang ê tsn̄g, ok kah bô lâng mn̄g.” Guán sió-tī sui-jiân siang ê tsn̄g, m̄-koh i sìng-tē hó, koh tsin ū-lâng-iân, kā tsit khuán bô kho-ha̍k kin-kì ê kóo-tsá uē tòng-tsò tshiàu-tâm tō hó.
-
歹代就毋通做，愛知影「雞卵密密也有縫」，代誌早慢會煏空。
壞事不要做，要曉得「百密必有一疏」，事情早晚會敗露。
Pháinn-tāi tō m̄-thang tsò, ài tsai-iánn “ke-nn̄g ba̍t-ba̍t iā ū phāng”, tāi-tsì tsá-bān ē piak-khang.
-
伊掠準進前共人烏西這層代誌處理甲誠好勢矣，毋過「雞卵密密也有縫」，尾仔猶是煏空矣。
他以為之前行賄這件事情處理得萬無一失了，但是「百密必有一疏」，後來還是被揭發了。
I lia̍h-tsún tsìn-tsîng kā lâng oo-se tsit tsân tāi-tsì tshú-lí kah tsiânn hó-sè--ah, m̄-koh “ke-nn̄g ba̍t-ba̍t iā ū phāng”, bué--á iáu-sī piak-khang--ah.
-
人看咱無，咱顛倒愛較拍拚。俗語講：「雞屎落塗，也有三寸煙。」咱若會長志，人就毋敢看衰咱。
人家看不起我們，我們反而要更努力。俗話說：「雞屎落地，也有三寸煙。」我們要是能奮發向上，人家就不敢把我們看扁了。
Lâng khuànn lán bô, lán tian-tò ài khah phah-piànn. Sio̍k-gí kóng, “Ke-sái lo̍h-thôo, iā ū sann tshùn ian.” Lán nā ē tsiáng-tsì, lâng tō m̄ kánn khuànn-sue--lán.
-
人出世就有好額散的差別，毋過人講「雞屎落塗，也有三寸煙」，散赤囡仔有志氣，閣較會予人呵咾。
人出生就有貧富不均的差別，不過人家說「雞屎落地，也有三寸煙」，窮人家小孩有志氣，更會受人稱讚。
Lâng tshut-sì tō ū hó-gia̍h-sàn ê tsha-pia̍t, m̄-koh lâng kóng “ke-sái lo̍h-thôo, iā ū sann tshùn ian”, sàn-tshiah gín-á ū tsì-khì, koh-khah ē hōo lâng o-ló.
-
伊自少年就對下港起去臺北做生理，佇遐娶某生囝，到今五十外冬矣，毋過「離鄉，無離腔」，講話的時猶原有下港腔。
他年輕時就從南部上去臺北做生意，在那裡娶妻生子，至今五十多年了，不過「離鄉，不離腔」，說話時仍然有南部腔。
I tsū siàu-liân tō tuì ē-káng khí-khì Tâi-pak tsò-sing-lí, tī hia tshuā-bóo senn-kiánn, kàu-tann gōo-tsa̍p-guā tang--ah, m̄-koh “lī hiunn, bô lī khiunn”, kóng-uē ê sî iu-guân ū ē-káng khiunn.
-
人講：「關門著閂，講話著看。」咱講話著愛細膩斟酌，才袂無張無持去共人得失著。
人家說：「關門要上門栓，說話要看場合。」我們說話要小心謹慎，才不會一不小心得罪到人。
Lâng kóng, “Kuainn-mn̂g tio̍h tshuànn, kóng-uē tio̍h khuànn.” Lán kóng-uē tio̍h-ài sè-jī tsim-tsiok, tsiah bē bô-tiunn-bô-tî khì kā lâng tik-sit--tio̍h.
-
感謝你點醒我「勸人做好代，較贏食早齋」，我會加做寡善事，共有困難的人鬥相共。
謝謝你提醒我「與其吃早齋，不如多做好事」，我會多做好事，幫助有困難的人。
Kám-siā lí tiám-tshénn guá “khǹg lâng tsò hó tāi, khah iânn tsia̍h tsá-tsai”, guá ē ke tsò kuá siān-sū, kā ū khùn-lân ê lâng tàu-sann-kāng.
-
人講：「勸恁有孝千萬句，袂曉有孝豬狗牛。」你按呢共恁序大人忤逆，實在誠不應該。
人家說：「勸告各位要孝順父母，否則連畜牲都不如。」像你這樣忤逆父母親，實在很不應該。
Lâng kóng, “Khǹg lín iú-hàu tshian-bān kù, bē-hiáu iú-hàu ti káu gû.” Lí án-ne kā lín sī-tuā-lâng ngóo-gi̍k, si̍t-tsāi tsiânn put ing-kai.
-
政府抑是爸母管愈嚴，人民抑是序細就閣較會起慼，𠢕變鬼變怪，莫怪人咧講：「嚴官府出厚賊；嚴爸母出阿里不達。」
政府或父母管得愈嚴格，人民或小孩就更會感到厭惡，容易搞鬼耍花招，難怪人家說：「過於嚴苛的官府，小偷反而更加猖狂；父母管教過嚴，小孩越是不成材。」
Tsìng-hú ia̍h-sī pē-bú kuán jú giâm, jîn-bîn ia̍h-sī sī-sè tō koh-khah ē khí-tsheh, gâu pìnn-kuí-pìnn-kuài, bo̍k-kuài lâng teh kóng, “Giâm kuann-hú tshut kāu tsha̍t; giâm pē-bú tshut a-lí-put-ta̍t.”
-
明其知伊這个人是無半撇，猶是交代一寡簡單的穡頭予伊試看覓咧，結局照常做甲離離落落，有影是「爛塗袂糊得壁」。
明知他這個人一點本事也沒有，仍舊把一些簡單的工作交付他試試看，結果照樣做得亂七八糟，果然「爛泥扶不上牆」。
Bîng-ki-tsai i tsit ê lâng sī bô-puànn-phiat, iáu-sī kau-tài tsi̍t-kuá kán-tan ê sit-thâu hōo i tshì khuànn-māi--leh, kiat-kio̍k tsiàu-siông tsò kah li-li-lak-lak, ū-iánn sī “nuā-thôo bē-kôo-tit piah”.
-
俗語講：「歡歡喜喜一工，煩煩惱惱也一工。」做人著愛較樂暢咧，煩惱是加工的。
俗話說：「快樂也是過一天，憂愁也是過一天。」做人應該要比較快樂些，煩惱是多餘的。
Sio̍k-gí kóng, “Huann-huann-hí-hí tsi̍t kang, huân-huân-ló-ló iā tsi̍t kang.” Tsò lâng tio̍h-ài khah lo̍k-thiòng--leh, huân-ló sī ke-kang--ê.
-
我知影你揣無頭路心內艱苦，毋過「歡歡喜喜一工，煩煩惱惱也一工」，你著看較開咧，咱閣來去揣。
我知道你找不到工作心裡難過，不過「快樂也是過一天，憂愁也是過一天」，你要看開一點，我們繼續找。
Guá tsai-iánn lí tshuē-bô thâu-lōo sim-lāi kan-khóo, m̄-koh “huann-huann-hí-hí tsi̍t kang, huân-huân-ló-ló iā tsi̍t kang”, lí tio̍h khuànn khah khui--leh, lán koh lâi-khì tshuē.
-
有人請教一个好額人好額的祕訣，伊笑笑仔講：「聽某喙，大富貴。家庭和諧，事業自然較會成功。」
有人請教一位富翁富有的祕訣，他笑笑說：「聽妻子的話，大富大貴。家庭和諧，事業自然比較容易成功。」
Ū lâng tshíng-kàu tsi̍t ê hó-gia̍h-lâng hó-gia̍h ê pì-kuat, i tshiò-tshiò-á kóng, “Thiann bóo tshuì, tuā hù-kuì. Ka-tîng hô-hâi, sū-gia̍p tsū-jiân khah ē sîng-kong.”
-
遮爾簡單的問題，你一个大學生煞毋知欲按怎解決，敢是「讀冊，讀佇尻脊骿」？
這麼簡單的問題，你一個大學生竟然不知如何解決，難道是「書都讀到背部去了」？
Tsiah-nī kán-tan ê būn-tê, lí tsi̍t ê tāi-ha̍k-sing suah m̄ tsai beh án-tsuánn kái-kuat, kám-sī “tha̍k-tsheh, tha̍k tī kha-tsiah-phiann”?
-
𪜶共往過佇學校學著的智識用來做歹代誌，正港是「讀冊，讀佇尻脊骿」。
他們將以前在學校學到的知識用來做壞事，真的是「書都讀到背部去了」。
In kā íng-kuè tī ha̍k-hāu o̍h--tio̍h ê tì-sik īng-lâi tsò pháinn tāi-tsì, tsiànn-káng sī “tha̍k-tsheh, tha̍k tī kha-tsiah-phiann”.
-
人講：「驚某大丈夫，拍某豬狗牛。」翁仔某著愛互相疼惜佮尊存，毋通起跤動手。
人家說：「怕妻子的是男子漢，打妻子的豬狗不如。」夫妻要互相疼惜與尊重，不要動手動腳。
Lâng kóng, “Kiann bóo tāi-tiōng-hu, phah bóo ti káu gû.” Ang-á-bóo tio̍h-ài hōo-siong thiànn-sioh kah tsun-tshûn, m̄-thang khí-kha-tāng-tshiú.
-
阿義仔歌聲真好，老師鼓勵伊去參加歌唱比賽，伊攏講伊足驚上台唱歌。老師講：「『驚驚袂著等。』你愛勇敢徛起去舞台，才會當予人知影你的歌聲有偌好。」
小義歌聲很好，老師鼓勵他去參加歌唱比賽，他都說他很怕上台唱歌。老師說 ：「『光是恐懼擔憂不會獲得優勝。』你要勇敢站上舞台，才能讓人知道你的歌聲有多好。」
A-gī--á kua-siann tsin hó, lāu-su kóo-lē i khì tsham-ka kua-tshiùnn pí-sài, i lóng kóng i tsiok kiann tsiūnn-tâi tshiùnn-kua. Lāu-su kóng, “ ‘Kiann-kiann bē tio̍h-tíng.’ Lí ài ióng-kám khiā khí-khì bú-tâi, tsiah ē-tàng hōo lâng tsai-iánn lí ê kua-siann ū guā hó.”
-
伊這个人有較直，袂曉變竅，毋過「戇的也有一項會」，交代伊做直頭路，伊攏會照起工做，袂拖沙、袂勼水，真可取。
他這個人比較直，不會變通，不過「天生我才必有用」，交代他做不需要變通的事，他都會照規矩做，不會拖拖拉拉、不會敷衍，很有可取之處。
I tsit ê lâng ū khah ti̍t, bē-hiáu piàn-khiàu, m̄-koh “gōng--ê iā ū tsi̍t hāng ē”, kau-tài i tsò ti̍t thâu-lōo, i lóng ē tsiàu-khí-kang tsò, bē thua-sua, bē kiu-tsuí, tsin khó-tshú.
-
明其都趁無偌濟錢，生活也無真好過，嘛綴人咧寄付起廟。敢無聽人咧講，做人愛「先顧腹肚，才顧佛祖」。
明明收入不怎麼好，生活也不是過得很好，也學別人捐款建廟。難道沒聽人說過，我們人要「先顧肚子溫飽，才顧祭拜佛祖」。
Bîng-ki to thàn bô guā-tsē tsînn, sing-ua̍h iā bô tsin hó-kuè, mā tuè lâng teh kià-hù khí biō. Kám bô thiann lâng teh kóng, tsò lâng ài “sing kòo pak-tóo, tsiah kòo Pu̍t-tsóo”.
-
這个少年家靠勢家己是董事長囝，毋但性地䆀閣「目睭生佇頭殼頂」，啥物人都看袂起。
這個年輕人仗勢自己是董事長的孩子，不但脾氣差又「自視甚高」，看不起任何人。
Tsit ê siàu-liân-ke khò-sè ka-kī sī táng-sū-tiúnn kiánn, m̄-nā sìng-tē bái koh “ba̍k-tsiu senn tī thâu-khak-tíng”, siánn-mih-lâng to khuànn-bē-khí.
-
阿雄仔頭殼好閣𠢕變竅，無論拄著啥物困難的代誌，伊攏老神在在應講：「免煩惱啦，到彼號時，攑彼號旗，代誌總是有解決的辦法。」
阿雄聰明又機靈，無論遇到什麼困難的事情，他都一副胸有成竹的說：「別煩惱，到那個時候看情況再做決定，事情總是有解決的辦法。」
A-hiông--á thâu-khak hó koh gâu piàn-khiàu, bô-lūn tú-tio̍h siánn-mih khùn-lân ê tāi-tsì, i lóng lāu-sîn-tsāi-tsāi ìn kóng, “Bián huân-ló--lah, kàu hit-lō sî, gia̍h hit-lō kî, tāi-tsì tsóng-sī ū kái-kuat ê pān-huat.”
-
阿志定定都「到彼號時，攑彼號旗」，看佗一爿較好空就倚佗一爿，所以逐家攏無愛佮伊做朋友。
阿志經常「騎牆觀望，見風轉舵」，看哪一邊好處多就靠向哪一邊，所以大家都不喜歡和他做朋友。
A-tsì tiānn-tiānn to “kàu hit-lō sî, gia̍h hit-lō kî”, khuànn tó tsi̍t pîng khah hó-khang tō uá tó tsi̍t pîng, sóo-í ta̍k-ke lóng bô ài kah i tsò pîng-iú.
-
囡仔跋倒著傷，伊毋緊共消毒、抹藥仔，煞叫囡仔徛佇遐咧共教示，有影是「牛鼻毋拎，拎牛尾」。
孩子跌倒受傷，他不趕緊幫他消毒、擦藥，竟然叫孩子站在那裡聽他說教，真是「本末倒置」。
Gín-á pua̍h-tó tio̍h-siong, i m̄ kín kā siau-to̍k, buah io̍h-á, suah kiò gín-á khiā tī hia teh kā kà-sī, ū-iánn sī “gû phīnn m̄ lîng, lîng gû bué”.
-
這間公司的派系誠濟，員工袂和諧，若像「放尿攪沙袂做堆」，致使業績攏無通好。
這間公司的派系很多，員工不和睦，就像「尿和沙子攪拌在一起，無法結成塊」，導致業績都好不了。
Tsit king kong-si ê phài-hē tsiânn tsē, uân-kang bē hô-hâi, ná-tshiūnn “pàng-jiō kiáu sua bē tsò-tui”, tì-sú gia̍p-tsik lóng bô-thang hó.
-
人講：「物會使濫糝食，話袂使濫糝講。」彼寡無影無跡的謠言毋好烏白傳，較袂惹出禍端。
人家說：「東西可以胡亂吃，話不可以胡亂說。」那些毫無根據的謠言不要隨便傳播，才不會招致災禍。
Lâng kóng, “Mi̍h ē-sái lām-sám tsia̍h, uē bē-sái lām-sám kóng.” Hit kuá bô-iánn-bô-tsiah ê iâu-giân m̄-hó oo-pe̍h thuân, khah bē jiá-tshut hō-tuan.
-
阮阿舅身體真勇健，毋捌破病過，二九暝彼工煞聽著伊過身的消息，真正是「無風無搖，倒大樹」。
我舅舅身體很健康，從不生病，除夕那天卻聽到他過世的消息，真是「風不吹，草不動，大樹竟傾倒」。
Guán a-kū sin-thé tsin ióng-kiānn, m̄ bat phuà-pēnn--kuè, Jī-káu-mê hit kang suah thiann-tio̍h i kuè-sin ê siau-sit, tsin-tsiànn sī “bô-hong-bô-iô, tó tuā-tshiū”.
-
雖罔表兄功課無甲偌好，毋過「荏荏馬也有一步踢」，伊參加全國畫圖比賽定定攏會著等。
雖然表哥功課不怎麼好，不過「天生我才必有用」，他參加全國繪畫比賽常常會得名。
Sui-bóng piáu-hiann kong-khò bô kah guā hó, m̄-koh “lám-lám bé iā ū tsi̍t pōo that”, i tsham-ka tsuân-kok uē-tôo pí-sài tiānn-tiānn lóng ē tio̍h-tíng.
-
有影是「好心好行，無衫通穿」。我好心替人做保，伊煞走路害我愛賣厝替伊還錢。
真的是「好心行善卻受災殃」。我好心替朋友做保，他卻躲債潛逃害我要賣房子替他還錢。
Ū-iánn sī “hó-sim-hó-hīng, bô sann thang tshīng”. Guá hó-sim thè lâng tsò-pó, i suah tsáu-lōo hāi guá ài bē tshù thè i hîng tsînn.
-
這件代誌派張的去做袂使得，叫林的去做嘛毋好，有影是「放屎也疼，放尿也疼」。
這件事派老張去做也不行，叫老林去做也不適合，真的「令人左右為難」。
Tsit kiānn tāi-tsì phài Tiunn--ê khì tsò bē-sái--tit, kiò Lîm--ê khì tsò mā m̄ hó, ū-iánn sī “pàng-sái iā thiànn, pàng-jiō iā thiànn”.
-
拚經濟愛用電，毋過燃塗炭汙染空氣，核能發電無安全，綠能成本傷懸，實在是「放屎也疼，放尿也疼」。
拚經濟要用電，不過燃燒煤炭會導致空氣汙染，核能發電不安全，綠能成本太高，實在是「很難左右逢源」。
Piànn king-tsè ài iōng tiān, m̄-koh hiânn thôo-thuànn u-jiám khong-khì, hi̍k-lîng huat-tiān bô an-tsuân, li̍k-lîng sîng-pún siunn kuân, si̍t-tsāi sī “pàng-sái iā thiànn, pàng-jiō iā thiànn”.
-
這項任務毋接手頂司會罵，若接手下司會嫌，真正「放屎也疼，放尿也疼」，有夠歹扭搦。
如果不接手這項任務上司會責罵，若接手則部屬會嫌棄，真的是「動輒得咎」，很難搞定。
Tsit hāng jīm-bū m̄ tsiap-tshiú tíng-si ē mē, nā tsiap-tshiú ē-si ē hiâm, tsin-tsiànn “pàng-sái iā thiànn, pàng-jiō iā thiànn”, ū-kàu pháinn-liú-la̍k.
教材來源
教育部臺灣台語常用詞辭典（來源網站）
授權：CC BY-ND 3.0 臺灣（姓名標示－禁止改作）
教育部（2023）。臺灣台語常用詞辭典（臺灣學術網路第二版）。https://sutian.moe.edu.tw/