第 15 階 第 15 課 俗諺語（15／17）
-
這改比賽去予對方修理甲塗塗塗，佇檢討會裡，教練予人檢討半點鐘，會使講是「滿面專豆花」。
這次比賽被對方修理得慘兮兮，在檢討會中，教練被人檢討了半個小時，可以說是「狼狽不堪」。
Tsit kái pí-sài khì hōo tuì-hong siu-lí kah thôo-thôo-thôo, tī kiám-thó-huē--lí, kàu-liān hōo lâng kiám-thó puànn tiám-tsing, ē-sái kóng sī “muá-bīn tsuan tāu-hue”.
-
伊大主大意烏白投資，結果了甲叫毋敢，予𪜶某罵甲「滿面專豆花」。
他自作主張胡亂投資，結果賠得叫苦連天，被他太太罵得「狗血淋頭」。
I tuā-tsú-tuā-ì oo-pe̍h tâu-tsu, kiat-kó liáu kah kiò-m̄-kánn, hōo in bóo mē kah “muá-bīn tsuan tāu-hue”.
-
伊真有才情，做人嘛誠懇，該當有真好的前途，可惜原本咧上班的公司煞倒去，就按呢轉去食家己，有影是人咧講的「人𠢕，天咧做對頭」，予人感覺真遺憾。
他能力很好，待人也誠懇，理應有大好的前途，可惜原來上班的公司竟倒了，從而失業，真的是人家說的「造化弄人」，令人深感遺憾。
I tsin ū tsâi-tsîng, tsò-lâng mā sîng-khún, kai-tong ū tsin hó ê tsiân-tôo, khó-sioh guân-pún teh siōng-pan ê kong-si suah tó--khì, tsiū-án-ne tńg-khì tsia̍h-ka-kī, ū-iánn sī lâng teh kóng--ê “lâng gâu, thinn teh tsò tuì-thâu”, hōo lâng kám-kak tsin uî-hām.
-
見擺若講著有人欲請食飯，伊攏是點上貴的來食，莫怪人講：「別人的錢開袂疼。」
每次只要有人說要請吃飯，他都是點最貴的來吃，難怪人家說：「別人的錢，怎麼花都不心疼。」
Kiàn-pái nā kóng-tio̍h ū lâng beh tshiánn tsia̍h-pn̄g, i lóng sī tiám siōng kuì--ê lâi tsia̍h, bo̍k-kuài lâng kóng, “Pa̍t-lâng ê tsînn khai bē thiànn.”
-
阮阿母已經九十歲矣，煞變做愛食糖仔閣愛共我司奶，真正是「老人囡仔性」。
我媽媽已經九十歲了，竟變得喜歡吃糖果又愛跟我撒嬌，真的是「老人孩子氣」。
Guán a-bú í-king káu-tsa̍p huè--ah, suah piàn-tsò ài tsia̍h thn̂g-á koh ài kā guá sai-nai, tsin-tsiànn sī “lāu-lâng gín-á-sìng”.
-
坤伯仔真正是「老人囡仔性」，磕袂著就張，誠無伊法。
阿坤伯真是「老人孩子氣」，動不動就耍脾氣，真拿他沒辦法。
Khun peh--á tsin-tsiànn sī “lāu-lâng gín-á-sìng”, kha̍p-bē-tio̍h tō tiunn, tsiânn bô i huat.
-
我逐工載阿娟去上班，伊攏當做是應該的，干焦一工無閒通共伊載，伊就無欲插我，真正是「九頓米糕無上算，一頓冷糜抾起來囥」。
我每天載小娟去上班，他都認為是理所當然的，僅僅一天沒空閒能載他，他就不理我，真是「對人好沒回報，小疏忽記得牢」。
Guá ta̍k-kang tsài A-kuan khì siōng-pan, i lóng tòng-tsò sī ing-kai--ê, kan-na tsi̍t kang bô-îng thang kā i tsài, i tō bô beh tshap--guá, tsin-tsiànn sī “káu tǹg bí-ko bô tsiūnn-sǹg, tsi̍t tǹg líng muâi khioh khí-lâi khǹg”.
-
伊不管眾人的反對，硬欲「橫柴夯入灶」，佇這个社區開電動間仔。
他不管眾人的反對，硬要「橫行霸道」，在這個社區開電動遊樂場。
I put-kuán tsìng-lâng ê huán-tuì, ngē beh “huâinn tshâ giâ-ji̍p tsàu”, tī tsit ê siā-khu khui tiān-tōng-king-á.
-
我遮爾仔骨力咧辦代誌，煞予人嫌甲無一地好，真正是「拚甲流汗，予人嫌甲流瀾。」
我這麼認真辦事情，竟然被人嫌棄得一文不值，真是「汗水不敵口水」。
Guá tsiah-nī-á kut-la̍t teh pān tāi-tsì, suah hōo lâng hiâm kah bô tsi̍t tè hó, tsin-tsiànn sī “piànn kah lâu-kuānn, hōo lâng hiâm kah lâu-nuā.”
-
這項歹扭搦的代誌，無人欲插，咱共抾起來做，毋過煞是「拚甲流汗，予人嫌甲流瀾」，實在真毋值。
這件難處理的事情，沒人要理會，我把它承擔起來做，不過卻是「吃力不討好」，實在是不值得。
Tsit hāng pháinn-liú-la̍k ê tāi-tsì, bô lâng beh tshap, lán kā khioh khí-lâi tsò, m̄-koh suah sī “piànn kah lâu-kuānn, hōo lâng hiâm kah lâu-nuā”, si̍t-tsāi tsin m̄-ta̍t.
-
這擺你閣共我挵一下，我無欲佮你計較，毋過你愛知「肉欲予人食，骨毋予人齧」，後擺你若閣對我按呢，我就欲佮你清總數矣。
這次你又撞了我一下，我不跟你計較，不過你要知道「忍耐是有限度的」，以後你若又對我這樣，我就要和你算總帳了。
Tsit pái lí koh kā guá lòng tsi̍t-ē, guá bô beh kah lí kè-kàu, m̄-koh lí ài tsai “bah beh hōo lâng tsia̍h, kut m̄ hōo lâng khè”, āu-pái lí nā koh tuì guá án-ne, guá tō beh kah lí tshing tsóng-siàu--ah.
-
俗語講：「肉欲予人食，骨毋予人齧。」較早結婚的時，新郎這爿扛豬爿到新娘彼頭的時，新娘彼爿定著愛共豬頭、豬尾硩佇𣛮台，予人扛轉去還新郎，按呢才有照結婚的禮俗咧行。
俗話說：「肉可以被人家吃，骨頭是不讓人家啃的。」從前結婚的時候，男方抬半條豬到女方家，女方一定要把豬頭、豬尾巴放回扛臺上，讓人抬回男方家，這樣才是遵照結婚的習俗在辦理。
Sio̍k-gí kóng, “Bah beh hōo lâng tsia̍h, kut m̄ hōo lâng khè.” Khah-tsá kiat-hun ê sî, sin-lông tsit-pîng kng ti-pîng kàu sin-niû hit thâu ê sî, sin-niû hit-pîng tiānn-tio̍h ài kā ti-thâu, ti-bué teh tī siānn-tâi, hōo lâng kng tńg-khì hîng sin-lông, án-ne tsiah ū tsiàu kiat-hun ê lé-sio̍k teh kiânn.
-
阮阿公定共阮講較早散食，蹛塗墼厝。向時誠無簡單蓄一台電視，煞予好額厝邊剾洗講：「豬屎籃仔結綵。」
我的祖父常跟我們說以前貧窮，住土塊砌的房子。當年好不容易購置一台電視，卻被有錢的鄰居挖苦：「破房子也要妝點。」
Guán a-kong tiānn kā guán kóng khah-tsá sàn-tsia̍h, tuà thôo-kat-tshù. Hiàng-sî tsiânn bô kán-tan hak tsi̍t tâi tiān-sī, suah hōo hó-gia̍h tshù-pinn khau-sé kóng, “Ti-sái nâ-á kat-tshái.”
-
電視咧搬笑詼齣，結婚請人客的時，新人頂身穿禮服，下身穿運動褲。予人客恥笑講：「豬屎籃仔結綵。」
電視在播爆笑劇，結婚宴客時，新人上半身穿禮服，下半身穿運動褲。被客人譏笑說：「不倫不類。」
Tiān-sī teh puann tshiò-khue-tshut, kiat-hun tshiánn-lâng-kheh ê sî, sin-lâng tíng-sin tshīng lé-ho̍k, ē-sin tshīng ūn-tōng-khòo. Hōo lâng-kheh thí-tshiò kóng, “Ti-sái nâ-á kat-tshái.”
-
選舉的時，無仝黨派的候選人逐工「你看我殕殕，我看你霧霧」，互相攻擊，袂輸是冤仇人咧。
選舉期間，不同黨派的候選人每天「互相看不起對方」，互相攻擊，好像是仇人一樣。
Suán-kí ê sî, bô kāng tóng-phài ê hāu-suán-jîn ta̍k-kang “lí khuànn guá phú-phú, guá khuànn lí bū-bū”, hōo-siong kong-kik, bē-su sī uan-siû-lâng--leh.
-
二姊欲嫁的前一暗，阿母共二姊交代講：「花食露水，人食喙水，做人的新婦拄著人著愛好喙佮人相借問，才會得人疼」。
二姊要結婚的前一晚，媽媽交代二姊說：「花需要露水，人需要口才，當人家的媳婦碰到人要懂得跟人噓寒問暖，才能得到長輩疼愛」。
Jī-tsé beh kè ê tsîng tsi̍t àm, a-bú kā jī-tsé kau-tài kóng, “Hue tsia̍h lōo-tsuí, lâng tsia̍h tshuì-suí, tsò lâng ê sin-pū tú-tio̍h lâng tio̍h-ài hó-tshuì kah lâng sio-tsioh-mn̄g, tsiah ē tit-lâng-thiànn”.
-
人講：「花食露水，人食喙水。」伊毋但口才好閣有才情，莫怪事業遮爾成功。
俗話說：「花需要露水，人需要口才。」他不但口才好又有才能，難怪事業這麼成功。
Lâng kóng, “Hue tsia̍h lōo-tsuí, lâng tsia̍h tshuì-suí.” I m̄-nā kháu-tsâi hó koh ū tsâi-tsîng, bo̍k-kuài sū-gia̍p tsiah-nī sîng-kong.
-
俗語講：「馬四跤也會著觸。」一時袂順序，毋通失志，繼續拍拚，成功一定是咱的。
俗話說：「人有失手，馬有亂蹄。」暫時不順遂，不要喪志，繼續奮鬥，成功一定是我們的。
Sio̍k-gí kóng, “Bé sì kha iā ē tio̍h-tak.” Tsi̍t-sî bē sūn-sī, m̄-thang sit-tsì, kè-sio̍k phah-piànn, sîng-kong it-tīng sī lán ê.
-
你不時佮頂司一句來一句去，毋驚予伊「點油做記號」，後擺免想欲升官。
你時常跟上司頂嘴，不怕被他「列入黑名單」，以後別想升官。
Lí put-sî kah tíng-si tsi̍t kù lâi tsi̍t kù khì, m̄ kiann hōo i “tiám iû tsò kì-hō”, āu-pái bián siūnn-beh sing-kuann.
-
勸你心肝毋通遐大，才袂「掠龜走鱉，掠蟳走蠘」，無法度達成願望。
勸你不要有那麼大的野心，才不會「顧此失彼」，無法達成願望。
Khǹg lí sim-kuann m̄-thang hiah tuā, tsiah bē “lia̍h-ku tsáu-pih, lia̍h-tsîm-tsáu-tshi̍h”, bô-huat-tōo ta̍t-sîng guān-bōng.
-
我最近運氣足䆀，股票見買見落價，若賣掉就隨起價，真正是「掠龜走鱉，掠蟳走蠘」。
我最近運氣很差，只要買了股票股價格都就下跌，一旦賣掉就馬上漲價，真的是「顧此失彼」。
Guá tsuè-kīn ūn-khì tsiok bái, kóo-phiò kiàn bé kiàn lo̍h-kè, nā bē-tiāu tō suî khí-kè, tsin-tsiànn sī “lia̍h-ku-tsáu-pih, lia̍h-tsîm-tsáu-tshi̍h”.
-
欲成功愛靠家己認真拍拚，毋通規日干焦想欲「斬人的稻仔尾」。
要成功得靠自己認真努力，不要成天想著「竊佔他人辛勞的成果」。
Beh sîng-kong ài khò ka-kī jīn-tsin phah-piànn, m̄-thang kui-ji̍t kan-na siūnn-beh “tsánn lâng ê tiū-á-bué”.
-
阮董事長的助理對公司的員工定定「激一个參仔氣」，袂輸伊是頭家的款。
我們董事長的助理對公司的員工時常「擺出一副架子」，彷彿他是老闆一樣。
Guán táng-sū-tiúnn ê tsōo-lí tuì kong-si ê uân-kang tiānn-tiānn “kik tsi̍t ê sim-á-khuì”, bē-su i sī thâu-ke ê khuán.
-
邱董的舊年予人牽去筊間，今年隨輸甲貼底，走路閃債，人講「跋筊，家伙了」，真正是誠有道理。
邱董去年被人帶去賭場，今年馬上輸個精光家，跑路躲債，有人說「賭博會傾家蕩產」，真的是很有道理。
Khu-táng--ê kū-nî hōo lâng khan-khì kiáu-king, kin-nî suî su kah tah-té, tsáu-lōo siám-tsè, lâng kóng “pua̍h-kiáu, ke-hué liáu”, tsin-tsiànn sī tsiânn ū tō-lí.
-
伊見擺報告寫袂出來，攏講是同學無欲共鬥相共，真正是「袂生，牽拖厝邊」。
他每次報告寫不出來，都說是同學不肯幫他，真的是「自己無能，怪罪別人」。
I kiàn-pái pò-kò siá bē tshut--lâi, lóng kóng sī tông-ha̍k bô beh kā tàu-sann-kāng, tsin-tsiànn sī “bē sinn, khan-thua tshù-pinn”.
-
伊冊包揹咧講欲去圖書館讀冊，其實「捾籃仔假燒金」，是欲去佮查某朋友約會。
他背著書包說要去圖書館讀書，其實「掩人耳目」，是要去跟女朋友約會。
I tsheh-pau phāinn--leh kóng beh khì tôo-su-kuán tha̍k-tsheh, kî-si̍t “kuānn nâ-á ké sio-kim”, sī beh khì kah tsa-bóo pîng-iú iok-huē.
-
伊講伊是為著市民的福利出來競選，毋過我知影伊是「捾籃仔假燒金」，攏是為著伊家己的利益咧拍算。
他說他是為了市民的福利才出來競選，不過我知道他是「掛羊頭賣狗肉」，全是在為自己的利益盤算。
I kóng i sī uī-tio̍h tshī-bîn ê hok-lī tshut-lâi kīng-suán, m̄-koh guá tsai-iánn i sī “kuānn nâ-á ké sio-kim”, lóng sī uī-tio̍h i ka-kī ê lī-ik teh phah-sǹg.
-
雖然這馬逐家生活有較好過矣，毋過「食甜，著愛憶著鹹」，咱嘛是愛繼續認真拍拚，食老才有好日子通過。
雖然現在大家的日子比較好過了，但是我們還是要「居安思危」，要繼續認真努力，老年的時候才有好日子過。
Sui-jiân tsit-má ta̍k-ke sing-ua̍h ū khah hó-kuè--ah, m̄-koh “tsia̍h tinn, tio̍h-ài it-tio̍h kiâm”, lán mā sī ài kè-sio̍k jīn-tsin phah-piànn, tsia̍h-lāu tsiah ū hó ji̍t-tsí thang kuè.
-
人講：「搬岫雞母生無卵。」你規年迵天攏咧換頭路，欲哪有可能會有出脫？
人家說：「經常更換雞巢的母雞下不了蛋。」你一年到頭都在換工作，怎麼可能會有成就？
Lâng kóng, “Puann siū ke-bó senn bô nn̄g.” Lí kui-nî-thàng-thinn lóng teh uānn thâu-lōo, beh ná ū khó-lîng ē ū tshut-thuat?
-
你看伊逐工穿甲𪁎𪁎出門，其實「褲袋仔袋磅子」，攏是欲去揣人借錢。
你看他每天穿得時髦瀟灑出門，其實「阮囊羞澀」，都是要去找人借錢的。
Lí khuànn i ta̍k-kang tshīng kah tshio-tshio tshut-mn̂g, kî-si̍t “khòo-tē-á tē pōng-tsí”, lóng sī beh khì tshuē lâng tsioh tsînn.
-
咱欲佇社會上徛起，愛學會曉「一時風，駛一時船」，才綴會著時機趁會著錢。
我們要在社會上立足，要得學會「隨機應變」才能跟得上時機賺得到錢。
Lán beh tī siā-huē-siōng khiā-khí, ài o̍h ē-hiáu “tsi̍t-sî hong, sái tsi̍t-sî tsûn”, tsiah tuè ē tio̍h sî-ki thàn ē tio̍h tsînn.
-
前幾工佇路裡，看著一个人若像是阮阿伯，行倚去欲共叫，才發現看毋著去，險險仔「半路認老爸」。
前幾天在路上看到一個好像是我伯父的人，走近要去叫他，才發現看錯了，差點「半路亂認父親」。
Tsîng kuí kang tī lōo--lí, khuànn-tio̍h tsi̍t ê lâng ná-tshiūnn sī guán a-peh, kiânn uá-khì beh kā kiò, tsiah huat-hiān khuànn m̄-tio̍h--khì, hiám-hiám-á “puànn-lōo jīn lāu-pē”.
-
爸母共你栽培到研究所出業矣，這馬你就愛「欲食胡蠅，家己欱」，毋通磕袂著就欲共爸母伸長手。
父母把你栽培到研究所畢業了，現在你就得「自己想辦法生活」，不該動不動就要向父母伸手拿錢。
Pē-bú kā lí tsai-puê kàu gián-kiù-sóo tshut-gia̍p--ah, tsit-má lí tō ài “beh tsia̍h hôo-sîn, ka-kī hap”, m̄-thang kha̍p-bē-tio̍h tō beh kā pē-bú tshun-tn̂g-tshiú.
-
伊自細漢佇艱苦的家庭大漢，是一个認份拍拚的人，不時提醒家己：「欲食胡蠅，家己欱。」
他從小就在清寒的家庭長大，是一個安份努力的人，經常提醒自己：「要自食其力。」
I tsū sè-hàn tī kan-khóo ê ka-tîng tuā-hàn, sī tsi̍t ê jīn-hūn phah-piànn ê lâng, put-sî thê-tshénn ka-kī, “Beh tsia̍h hôo-sîn, ka-kī hap.”
-
阿勇「大牛無惜力」，共咱社區的公園整理甲遮爾媠，請逐家拍噗仔共伊感謝。
阿勇「無私奉獻」，把我們社區的公園整理得如此美麗，請大家鼓掌感謝他。
A-ióng “tuā gû bô sioh la̍t”, kā lán siā-khu ê kong-hn̂g tsíng-lí kah tsiah-nī suí, tshiánn ta̍k-ke phah-pho̍k-á kā i kám-siā.
-
你毋通干焦想欲「鵁鴒順便空」，愛家己骨力拍拚，若有成果，毋才會得著眾人的呵咾。
你不要只想著要「坐享其成」，自己要勤奮努力，如果有成果，才會贏得大家的讚賞。
Lí m̄-thang kan-na siūnn-beh “ka-līng sūn piān khang”, ài ka-kī kut-la̍t phah-piànn, nā ū sîng-kó, m̄-tsiah ē tit-tio̍h tsìng-lâng ê o-ló.
教材來源
教育部臺灣台語常用詞辭典（來源網站）
授權：CC BY-ND 3.0 臺灣（姓名標示－禁止改作）
教育部（2023）。臺灣台語常用詞辭典（臺灣學術網路第二版）。https://sutian.moe.edu.tw/