第 15 階　第 17 課　俗諺語（17／17）

1. 都共你講「牛毋通𠢕行，人毋通出名」，你干干仔欲四界展風神，毋才人會目空赤，這馬代誌舞甲袂收山，知苦矣乎。

   就跟你說「人怕出名，豬怕肥」，你偏偏要到處炫耀，才會遭人嫉妒，現在事情弄到無法收場，知道要受罪了吧。

   ▶聽

   To kā lí kóng “gû m̄-thang gâu kiânn, lâng m̄-thang tshut-miâ”, lí kan-kan-á beh sì-kè tián-hong-sîn, m̄-tsiah lâng ē ba̍k-khang-tshiah, tsit-má tāi-tsì bú kah bē-siu-suann, tsai-khóo--ah--honnh.

2. 亂世走反人人都有家己的身命愛顧，人講「火燒跤，隨人掰」，這也是誠無奈的代誌。

   戰爭時每個人為了自己的身家性命逃跑避難，人們說「大難臨頭，人人自顧不暇」，這也是很無奈的事情。

   ▶聽

   Luān-sè tsáu-huán lâng-lâng to ū ka-kī ê sin-miā ài kòo, lâng kóng “hué sio kha, suî-lâng pué”, tse iā sī tsiânn bô-nāi ê tāi-tsì.

3. 賰一禮拜就愛做好的工課，到今做都無一半，這聲有影「火燒跤後蹬」矣，無緊叫寡跤手來鬥相共袂用得。

   剩一週就得完成的工作，到現在還做不到一半，這下子真是「火燒屁股」了，非趕緊找些人手來幫忙不可。

   ▶聽

   Tshun tsi̍t lé-pài tō ài tsò-hó ê khang-khuè, kàu-tann tsò to bô tsi̍t-puànn, tsit-siann ū-iánn “hué sio kha-āu-tēnn”--ah, bô kín kiò kuá kha-tshiú lâi tàu-sann-kāng bē-īng--tit.

4. 代誌舞甲袂得收山了後，你才咧教人按怎重頭做起，袂輸「火車過了，才歕觱仔」仝款，敢有較縒？

   事情都弄到無法收拾了，你才要教人家怎麼重新開始，如同「火車過了，才吹哨示警」一樣，有用嗎？

   ▶聽

   Tāi-tsì bú kah bē-tit siu-suann liáu-āu, lí tsiah teh kà lâng án-tsuánn tîng-thâu tsò-khí, bē-su “hué-tshia kuè-liáu, tsiah pûn pi-á” kāng-khuán, kám ū khah-tsua̍h?

5. 出社會咧走跳，別人無一定予咱會靠得，毋才講著愛「看田面，毋通看人面」，家己骨力趁的顛倒較有底。

   在社會闖蕩，他人不一定能讓我們依靠，才會說我們要「自食其力，不可依賴他人」，自己努力賺來的反而更牢靠。

   ▶聽

   Tshut-siā-huē teh tsáu-thiàu, pa̍t-lâng bô-it-tīng hōo lán ē-khò--tit, m̄-tsiah kóng tio̍h-ài ”khuànn tshân-bīn, m̄-thang khuànn lâng-bīn”, ka-kī kut-la̍t thàn--ê tian-tò khah ū-té.

6. 俗語咧講的「筊精，生理虎」，是咧提醒咱佮筊鬼跋筊欲贏真僫，啊若欲買賣，愛揣有信用的行號，才袂食虧了錢。

   俗話說的「賭徒奸詐，生意人狠」，是在提醒我們跟賭鬼賭博想贏很難，如果要做買賣，得找有信用的商家，才不會吃虧賠錢。

   ▶聽

   Sio̍k-gí teh kóng ê “kiáu tsinn, sing-lí-hóo”, sī teh thê-tshénn lán kah kiáu-kuí pua̍h-kiáu beh iânn tsin oh, ah nā beh bé-bē, ài tshuē ū sìn-iōng ê hâng-hō, tsiah bē tsia̍h-khui liáu-tsînn.

7. 會曉買布的人，攏咧斟酌料身佮布幅，毋捌的顛倒是看人買就緊綴人落去買，正經是「內行看布底，外行綴人買」。

   懂得買布的行家，都會仔細端詳布料的材質和布面的寬窄，外行人反倒是看到別人買就趕緊跟著人家買，真的是「內行看門道，外行看熱鬧」。

   ▶聽

   Ē-hiáu bé pòo ê lâng, lóng teh tsim-tsiok liāu-sin kah pòo-pak, m̄ bat--ê tian-tò sī khuànn lâng bé tō kín tuè lâng lo̍h-khì bé, tsìng-king sī “lāi-hâng khuànn pòo-té, guā-hâng tuè lâng bé”.

8. 來踅科技展覽的，有的人是欲學新的智識佮技術，有的人是綴人來鬥鬧熱的，就像人咧講的「內行看布底，外行綴人買」。

   來逛科技展覽的，有些人是想學習新知識與技術，有些人是跟著來湊熱鬧，就如人家說的「內行看門道，外行看熱鬧」。

   ▶聽

   Lâi se̍h kho-ki tián-lám--ê, ū ê lâng sī beh o̍h sin ê tì-sik kah ki-su̍t, ū ê lâng sī tuè lâng lâi tàu-lāu-jia̍t--ê, tō tshiūnn lâng teh kóng ê “lāi-hâng khuànn pòo-té, guā-hâng tuè lâng bé”.

9. 阿火仔佇熱天來賣羊肉爐，就若「六月賣火熥」，較加嘛生理䆀。

   阿火在夏天賣羊肉爐，就如同「六月天賣暖爐」，難怪生意慘淡。

   ▶聽

   A-hué--á tī jua̍h-thinn lâi bē iûnn-bah-lôo, tō ná “la̍k--gue̍h bē hué-thang”, khah-ke mā sing-lí bái.

10. 一人一款命，若講事事項項攏欲提來佮人比，較加嘛「人比人，氣死人」。

    每個人有不同的命運，如果凡事都要跟別人做比較，也難怪會「人比人，氣死人」。

    ▶聽

    Tsi̍t lâng tsi̍t khuán miā, nā kóng sū-sū-hāng-hāng lóng beh the̍h-lâi kah lâng pí, khah-ke mā “lâng pí lâng, khì-sí lâng”.

11. 平平仝時陣佇仝一間超商買物件，阿明的發票著頭獎，我的煞摃龜，有影是「人比人，氣死人」。

    一樣都是在同一時間同一間超商買東西，阿明的發票得到頭獎，我的卻落空，真的是「人比人，氣死人」。

    ▶聽

    Pênn-pênn kāng sî-tsūn tī kāng tsi̍t king tshiau-siong bé mi̍h-kiānn, A-bîng ê huat-phiò tio̍h thâu-tsióng, guá ê suah kòng-ku, ū-iánn sī “lâng pí lâng, khì-sí lâng”.

12. 阿輝咧講笑詼，逐家聽了攏笑甲攬腹肚，干焦阿志過一睏才知影是佗位咧好笑，有影是「年頭食鹹菜，年尾才轉嗽」。

    阿輝在說笑話，大家聽了都捧腹大笑，只有阿志過了一會兒才知道好笑在哪裡，真的是「反應遲鈍」。

    ▶聽

    A-hui teh kóng-tshiò-khue, ta̍k-ke thiann-liáu lóng tshiò kah lám pak-tóo, kan-na A-tsì kuè tsi̍t-khùn tsiah tsai-iánn sī tó-uī teh hó-tshiò, ū-iánn sī “nî-thâu tsia̍h kiâm-tshài, nî-bué tsiah tńg-sàu”.